ކުރިއަށް އޮތް ރިޔާސީ އިންތިހާބުގައި އަދުގެ ސަރުކާރު ހިންގާ މައި ޕާޓީ، އެމްޑީޕީ ބަލިކުރަން ކޯލިޝަން ހަދަން ޖެހިއްޖެނަމަ އެކަންވެސް ކުރާނެ ކަމަށް އިދިކޮޅު ޕީޕީއެމް/ޕީއެންސީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.
ނ.އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ރޭ ވެލިދޫގައި ”މަވެސް ޕީޕީއެމް“ މިނަމުގައި ބޭއްވި ޖަލްސާގައި ވާހަކަފުޅު ދައްކަމުން ރައީސް ޔާމީން ވިދާޅުވީ، ސިޔާސީ މަސައްކަތުގައި މިވަގުތު ޕީޕީއެމް/ޕީއެންސީ ފިޔަވާ އެހެން ޕާޓީއަކާ އެމަނިކުފާނުގެ ގުޅުން ނެތް ނަމަވެސް، 2023 ގެ އިންތިހާބުގައި އެމްޑީޕީގެ ކެންޑިޑޭޓު ބަލިކުރެވެން އޮތް ގޮތަކީ ކޯލިޝަނެއް ހެދުން ކަމަށް ވާނަމަ އެކަން ކުރަން ފަސްނުޖެހޭނެ ކަމަށެވެ.
"އެކަމު.. ރިޔާސީ އިންތިހާބާ ހަމައަށް އަޅުގަނޑުމެން ދާއިރު، އެންމެ ޕާޓީއަށް [ޕީޕީއެމަށް] މަސްލަހަތު އޮތް ގޮތަކީ އަދި ރައްޔިތުންގެ ހައްގުތައް ހިމާޔަތްކޮށް، އެމްޑީޕީގެ ކެންޑިޑޭޓު ބަލިކުރެވޭނެ ގޮތްތަކުގެ ތެރޭގައި އެހެން ޕާޓީއަކާއެކު އިއްތިހާދުވެގެން، ކޯލިޝަން ހަދައިގެން ނުކުންނަ ކަމަށް ވަންޏާ، އަޅުގަނޑުމެން ކޯލިޝަން ނަހަދާކަށް ނެތިން،"
އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން
އެގޮތުން ކޯލިޝަން ހަދާ ޕާޓީތަކުގެ ތެރޭގައި އެމްޑީއޭގެ ޝައުގުވެރިކަން އޮތްނަމަ އެކަން "ކޮންސިޑާ" ކުރައްވާނެ ކަމަށާ އެހެން ނަމަވެސް، މިވަގުތު އެފަދަ އެއްވެސް އެއްބަސް ވުމެއް ވެފައިވާ ކަމަށް ރައީސް ޔާމީން ހާމަކުރައްވާފައެއް ނުވެއެވެ.
ރައީސް ޔާމީން އިތުރަށް ވިދާޅުވީ، ކޯލިޝަން ހެއްދެވި ނަމަވެސް އެއްވެސް އިއްތިހާދީ ގޮނޑިއެއް، އެއީ ރައްޔިތުންގެ މަޖިލިސް ވިޔަސް، ކައުންސިލް ގޮނޑިއެއްވިޔަސް އެހެން ޕާޓީއަކަށް ނުދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
