ބަންޑާރަ ނާއިބު ކަމުގެ މަގާމުގައި ހުންނަވައި، ޗާގޯސް މައްސަލަ އަަށް "އުނދުޅި ބޭނިއިރު" ރާއްޖޭގެ އިޤްތިސާދީ ސަރަހައްދު ބޮޑުކޮށް، ދިފާއުކުރަން މަސައްކަތްކޮށްފައިވާނެ ކަމަށް ވިދާޅުވެ މޯލްޑިވްސް އިސްލާމިކް ބޭންކުގެ ބޯޑު މެމްބަރު މުހައްމަދު ނަސީމް ހުސެއިން (ނަފާ ނަސީމް) ދެއްކެވި ވާހަކަތަކަށް ދިވެހިރާއްޖޭގެ ކުރީގެ ބަންޑާރަ ނައިބު ދިޔާނާ ސައީދު ރައްދު ދެއްވައިފިއެވެ.

ދިޔާނާ މިފަދައިން ވިދާޅުވެފައި ވަނީ، ޗާގޯސް މައްސަލައާއި ގުޅޭގޮތުން އޭނާ އާއި ކުރީގެ ބަންޑާރަ ނައިބު އާޒިމާ ޝަކޫރު ގުޅިގެން ނެރުއްވި ބަޔާނާއި ގުޅިގެން އެކަމަށް ފާޑުވިދާޅުވެ ނަފާ ނަސީމް ކުރެއްވި ޓުވީޓަކަށް ރައްދު ދެއްވަމުންނެވެ.

ނަފާ ނަސީމް ކުރެއްވި ޓުވީޓެއްގަ އެނާ ވަނީ ސިޔާސީ "ބިކާރީން" ޗާގޯސް މައްސަލައަށް އުނދުޅި ބާނަން ވާނެ ކަމަށާއި އޭރުން އެކަން ހައްލުވީ ކަމަށް ވިދާޅުވެ، ޗާގޯސް މައްސަލާގައި ރާއްޖޭގެ ހައްގުގައި ވަކާލާތު ކުރުމުން ދިޔާނާ އާއި އާޒިމާއަށް ނުސީދާކޮށް ފާޑުވިދާޅުވެފައެވެ.

ނަފާ ނަސީމް ގެ ޓުވީޓަށް ރައްދު ދެއްވައި ދިޔާނާ ވިދާޅުވީ އެނާ އާއި ކުރީގެ ބަންޑާރަ ނައިބު އާޒިމާ އަތްޕުޅުގައި ނަފާ ނަސީމަށް ވެދުން ކުރާނެ ސިޔާސީ މަޤާމެއް ނެތްކަމަށެވެ. އެހެން ކަމުން އެދެ މީހުންނަކީވެސް "ބިކާރީން" ކަމަށެވެ.

އެހެން ނަމަވެސް ދަންނަވަންތޯ އަޅުގަނޑުމެން "އުނދުޅި ބޭނިއިރު" ރާއްޖޭގެ އެކްސްކްލޫސިވް އިކޮނަމިކް ޒޯން ބޮޑުކޮށް ދިފާއުކުރަން އޮންނާނީ މަސައްކަތްކޮށްފައި. އަދި ކޮބާ، ތިޔަތަނަށް އައްމަކަޅޭ އާއި ޕައްލަންބެ ދިޔަޔަސް، (އަދި ނުދިޔަސް) މެދު ރޮނގުން ބައި އަޅާ އެބައި ލިބޭނެ އިނގޭތޯ" ދިޔާނާ އިތުރަށް ވިދާޅުވިއެވެ.

މީގެ އިތުރުން ދިޔާނާ ވިދާޅުވީ ދައުލަތުގެ އެންމެ މަތީ މަސްލަހަތު ހިމާޔަތްކުރަން ގޮސް އުޅުމަކީ މެދު ރޮނގުން ބައިކޮށްފައި އެއްބަޔަށް ވުރެ ބޮޑަށް ހޯދަން އުޅުން ކަމަށާއި ސަރުކާރުން އެކަން ކުރަން އުޅޭތަން ނުފެންނަ ކަމަށެވެ.

ނަފާ ނަސީމްގެ ޓުވީޓަށް ގިނަ ބައެއްގެ ފާޑުކިޔުންތައް އަމާޒުވާން ފެށުމާއި ގުޅިގެން އޭނާ ވަނީ ފަހުން އެ ޓުވީޓު ފޮހެލައްވާފައެވެ. އަދި އެފަހުން ކުރެއްވި ޓުވީޓެއްގައި "ބައެއް ވަތަނީން ވަރަށް ސީރިއަސްވެއްޖެ" މިހެން ލިޔުއްވާފައިވެއެވެ.