ރަސޫލުﷲ صَلَّى اللهُ عَلَيْهِ وَسَلَّمَ ގެ ޙަދީޘްއެއްގައި އައިސްފައިވެއެވެ. ބުޅަލެއްގެ ސަބަބުން އަންހެނަކު ނަރަކައަށް ވަންނަންޖެހުނެވެ. އެ އަންހެންމީހާ އެ ބުޅާ އައްސައި، އެއަށް ކާއެއްޗެއް ނުދިނެވެ. އަދި އޭތި އަމިއްލައަށް ކައިބޮއެ އުޅުމަށް ދޫކޮށެއްވެސް ނުލިއެވެ.

އެހެން ޙާދިސާއެއްގައިވެއެވެ.

އިމާމް ބުޚާރީ އާއި އިމާމް މުސްލިމް، އަބޫ ހުރައިރާ رَضِيَ اللهُ عَنْهُ ގެ ކިބައިން ރިވާކުރައްވާފައިވެއެވެ. ރަސޫލުﷲ صَلَّى اللهُ عَلَيْهِ وَسَلَّمَ ބަޔާންކޮށްދެއްވި އެވެ. މީހަކު މަގަކުން ހިނގަމުން އަންނަނިކޮށް ވަރަށް ބޮޑަށް ކަރުހިއްކަން ފެށިއެވެ. ފެންފޮދެއް ލިބޭނެ ގޮތެއް ހޯދަމުން އަންނަނިކޮށް ފެން ވަޅެއް ފެނުނެވެ. އެހެންނަމަވެސް، އެ ވަޅުން ފެންނެގޭނެ އެއްވެސް އެއްޗެއް ނެތެވެ. އޭނާއަށް ކުރިމަތިވެފައިވާ ކަރުހިއްކުމުގެ ބޮޑުކަމުން ވަޅަށް ފައިބައިގެން ފެން ބޮއެފިއެވެ. އޭނާ ހިތް އެދޭ ވަރަށް ފެން ބުއިމަށްފަހު ވަޅުގެ އަނގަމަތިން ބޯ އުފުލާލިހިނދު ފެނުނީ ކުއްތާއެކެވެ. ކަރުހިއްކައިގެންފައިވާލެއް ބޮޑުކަމުން އެ ކުއްތާގެ ދޫ ވަނީ ބޭރަށް ނުކުމެފައެވެ. އަދި ކަރުހިއްކުން ފިލުވުމަށްޓަކައި ބިމުގައިވާ ވެލިކަމުން ދިޔައެވެ. އެހިނދު އެމީހާ ހިތާހިތާ ބުނެލިއެވެ. "ތިމަންނައަށް ކަރުހިއްކުން ކުރިމަތިވި ވަރަށް މި ސޮރަށްވެސް މިވަނީ ކަރުހިއްކުން ކުރި މަތިވެފައެވެ." ދެން އެމީހާ އެ އެތީގެ ޙާލަތާމެދު ހަމްދަރުދީވެ، އަލުން ވަޅުތެރެއަށް ފޭބުމަށްފަހު، އޭނާގެ ޚުއްފަށް ފެންއަޅައިގެން، އަނގައިން އޭތި ހިފައިގެން ވަޅުން އަރައިފިއެވެ. ޚުއްފަކީ އިސްޓާކީނުގޮތަށް ފަޔަށް އެރުވުމަށް ހަމުން ހަދާފަ ހުންނަ އެއްޗެކެވެ. އެމީހާ ވަޅުން އެރުމަށްފަހު އެ ކުއްތާއަށް ފެންދިނެވެ. މާތް ﷲ އެމީހާގެ އެ ޢަމަލަށް ޝުކުރުވެ ވޮޑިގެންނެވިއެވެ. އަދި އެމީހާގެ ފާފަތައް ފުއްސަވައި ދެއްވިއެވެ.

މި ޙާދިސާއިން އެނގިގެން ދަނީ މާތް ﷲގެ ދީލަތިވަންތަ ކަމެވެ. އެކަލާނގެ އަޅުތަކުންގެ ނަޒަރުގައި ކުރާ ވަރަށް އާދައިގެ ކަންކަންވެސް، އެކަލާނގެއަށް އިޚްލާޞްތެރިކަމާއެކު ކޮށްފިކަމުގައިވާނަމަ، ބޮޑުވެގެންވާ ޘަވާބާއި އަޖުރު ދެއްވާކަމެކެވެ. ހަމައެހެންމެ، އިންސާނުންނަށްޓަކައި އެކަލާނގެ ޚަލްޤުކުރެއްވި ޖަނަވާރުންނަށް އިޙްސާންތެރިވުމުގެ މަތިވެރި ޘަވާބާއި ދަރުމައެވެ. އެތަކެއްޗާމެދު އޯގާތެރިވުމުގެ މާތްކަމެވެ.

މިއަދު އަހަރެމެންގެ ހިތް އުފަލަށްޓަކައި ތަފާތު އެކި ދޫނިތަކާއި މަސްތަކާއި އެނޫންވެސް ޖަނަވާރުތައް ގެންގުޅޭއިރު އެތަކެއްޗަށް އަނިޔާވެރި ނުވާނޭހެން ގެންގުޅެންޖެހެއެވެ. އެތަކެއްޗަށް ދޭންޖެހޭ ޙައްޤުތައް ދޭންޖެހޭނެއެވެ. އެކަންކަމުގައި ފަރުވާކުޑަކުރުމަކީ އެކަމުގެ ސަބަބުން ކިތަންމެ ބޮޑު ޢުޤޫބާތެއްވެސް ލިބިގެން ހިނގައިދާނެ ކަމެކެވެ.