ރައްޔިތުންގެ މަޖިލީހަށް ބަޖެޓެއް ހުށަހަޅައިގެން ފާސްކުރަނީ ހަމަ ނަމަކަށް ކަމަށް ވިލިމާލޭ ދާއިރާގެ މެންބަރު އަޙްމަދު އުޝާމް ވިދާޅުވެއްޖެއެވެ.

މި އަހަރަށް ލަފާކޮށް ސަރުކާރުން ހުށަހެޅި ބަޖެޓު ހުސްވާތީ 5.8 ބިލިއަން ރުފިޔާ ސަޕްލެމެންޓްރީ ބަޖެޓުގެ ގޮތުގައި ހުށަހެޅުމާ ގުޅިގެން އުޝާމް ކުރެއްވި ޓުވީޓެއްގައި ވިދާޅުވީ، މި ސަރުކަާރުން ކޮންމެ އަހަރަކުވެސް ކަންތައް ކުރަނީ މިފަދައިން ކަމަށެވެ.

އެހެންނަމަވެސް، އެއީ ކަނޑައެޅިގެން ގާނޫނުއަސާސީގެ 96 ވަނަ މާއްދާއާ ހިލާފަށް ކުރާކަމެއް ކަމަށާ ސަރުކާރުން އަންނަނީ ބޭނުންހާ ގޮތަކަށް ގާނޫނާ ހިލާފަށް ހަރަދުތައް ކުރަމުން ކަމަށްވެސް އޭނާ ވިދާޅުވިއެވެ. 

Advertisement

"މަޖިލީހަށް ބަޖެޓެއް ހުށަހަޅައިގެން ފާސްކުރަނީ ހަމަ ނަމަކަށް." އުޝާމް ވިދާޅުވިއެވެ. 

ރައްޔިތުންގެ މަޖިލީހަށް 2023 ވަނަ އަހަރުގެ ބަޖެޓު މިއަދު ހުށަހަޅުއްވަމުން ފިނޭންސް މިނިސްޓަރު އަމީރު ވަނީ މި އަހަރުގެ ބަޖެޓު ފޫބެއްދުމަށް ސަޕްލިމެންޓްރީ ބަޖެޓެއް ބޭނުންވާ ކަމަށް ވިދާޅުވެފައެވެ. މިއަހަރުގެ ބަޖެޓުގެ ގޮތުގައި ސަރުކާރުން ހުށަހަޅާފައިވަނީ 37 ބިލިއަން ރުފިޔާއެވެ. އެހެން ނަމަވެސް އަހަރު ނިމޭއިރު އެ އަދަދު 42.8 ބިލިއަނަށް އަރާނެ ކަމަށް މިހާރު ވަނީ އަންދާޒާކޮށްފައެވެ. އިތުރު 5.8 ބިލިއަން ފާސްކުރަން ހުށަހަޅަނީ އެކަން ފޫބެއްދުމަށެވެ.

ބަޖެޓު ފޮތުގައި ބުނެފައިވާ ގޮތުގައި ބަޖެޓު އިތުރު ކުރަން ޖެހުނީ ތެލުގެ ސަބްސިޑީއަށް ކުރާ ހަރަދު އިތުރުވުމާއި، ތަރައްޤީގެ މަޝްރޫއުތަކަށް ކުރާ ހަރަދުތައް އިތުރުވުމާއި ޓީޗަރުންގެ މުސާރަ ބޮޑުކުރުމުން އަދި އެޗްޑީސީގެ ކޭޝްފްލޯ ހަމަޖެއްސުމަށް އެ ކުންފުންޏަށް ފައިސާ ދިނުމުން ކަމަށެވެ.