ދިވެހިރާއްޖޭގެ ޕެންޝަނާބެހޭ ޤާނޫނުގައި ކަނޑައަޅާފައިވާ ގޮތުގެމަތިން ޕެންޝަން އޮފީހުގެ ޗީފް އެގްޒެކެޓިވް އޮފިސަރގެ މަގާމަށް، އަލްފާޟިލާ ސުޖާތާ ޙަލީމް ޢައްޔަން ކުރައްވައިފިއެވެ.
ޕެންޝަން އޮފީހުން ބުނީ، ދިވެހިރާއްޖޭގެ ޕެންޝަނާބެހޭ ޤާނޫނުގައި ކަނޑައަޅާފައިވާ ގޮތުގެމަތިން ޕެންޝަން އޮފީހުގެ ބޯޑުން، އެ އޮފީހުގެ ޗީފް އެގްޒެކެޓިވް އޮފިސަރގެ މަގާމަށް، މިއަދުން ފެށިގެން 5 އަހަރު ދުވަހުގެ މުއްދަތަށް ސުޖާތާ ޢައްޔަން ކުރައްވާފައިވާ ކަމަށެވެ.
ސުޖާތާ ޙަލީމްވަނީ އެކްޓިންގ ޗީފް އެގްޒެކެޓިވް އޮފިސަރގެ ހައިސިއްޔަތުން ޕެންޝަން އޮފީސް ހިންގެވުމުގެ ޒިންމާ 2 އަހަރަށްވުރެ ދިގު މުއްދަތެއް ވަންދެން އަދާކުރައްވާފައެވެ. މީގެ އިތުރުން، 2015 ވަނަ އަހަރުން ފެށިގެން ޕެންޝަން އޮފީހުގެ ޗީފް އޮޕަރޭޓިންގ އޮފިސަރގެ މަގާމުވެސް މިއަދާ ހަމައަށް ފުރުއްވާފައިވެއެވެ.
ދިވެހިރާއްޖޭގައި ދެމެހެއްޓެނިވި އަދި ޒަމާނީ ޕެންޝަން ނިޒާމެއް ތަޢާރަފު ކުރުމަށް ކުރެވުނު މަސައްކަތްތަކުގެ އެންމެ ކުރީ ސަފުގައި މެދުނުކެނޑި 16 އަހަރު ސުޖާތާ ޙަލީމް ޚިދުމަތް ކުރައްވާފައިވެއެވެ. މިގޮތުން، ވޯލްޑް ބޭންކުން ދިވެހިރާއްޖޭގައި ކުރިއަށް ގެންދެވި ޕެންޝަން އެންޑް ސޯޝަލް ޕްރޮޓެކްޝަން އެޑްމިނިސްޓްރޭޝަން ޕްރޮޖެކްޓް ހިންގެވުމާއި، ދިވެހިރާއްޖޭގެ ޕެންޝަނާބެހޭ ޤާނޫނު އެކުލަވާލުމަށް ކުރެވުނު މަސައްކަތުގައި އަދި އެ ޤާނޫނު ތަންފީޛު ކުރުމުގައި އިސް ދައުރެއްވަނީ އަދާކުރައްވާފައެވެ.
ޕެންޝަން އޮފީހުގެ ބޯޑުގެ އަމާޒަކީ، ސުޖާތާ ޙަލީމްގެ އިސްނެންގެވުމުގެ ދަށުން ޕެންޝަން އޮފީސް އިތުރު ހަރުފަތަކަށް ގެންދިއުމަށްޓަކައި، ކާމިޔާބު މަސައްކަތްތަކެއް ކުރެވިގެން ދިއުމެވެ.
Advertisement
This content is created and paid for by advertisers and does not involve Voice Journalists
