ބަންޑާރަ ނައިބު ލަފާފުޅެއް އެރުވި ނަމަވެސް ރާއްޖޭގެ ސަރަހައްދުން ބައެއް ގެއްލޭގޮތަށް އެއްވެސް ނިންމުމެއް ނިންމަން ރައީސުލްޖުމްހޫރިއްޔާއަށް ޖެހިވަޑައި ނުގަންނަވާނެކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ. 

ޝިޔާމު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގައި މިއަދު ވާހަކަދައްކަވަމުންނެވެ. 

ރާއްޖޭގެ ސަރަހައްދުން ބޮޑު ބައެއް ގެއްލޭގޮތަށް ސަރުކާރުން ޗާގޯސް މައްސަލައިގައި މޮރިޝަސް ކޮޅަށް ޖެހުމުން އެކަމުގެ ގެއްލުން ދިވެހި މަސްވެރިންނަށް ކުރާނެކަމަށް ޝިޔާމު ވިދާޅުވިއެވެ. އޭނާ ވިދާޅުވީ ފޯޅަވަހި ސަރަހައްދަކީ މިހާރުވެސް ދިވެހިން މަސް ބާނަމުންދާ ސަރަހައްދެއްކަމަށެވެ. އެއާއި ޚިލާފަށް މޮރިޝަސްއަކީ އެމީހުންގެ ސަރަހައްދުން މަސްވެރިކަން ކުރުމަށް އެހެން ގައުމުތަކަށް ލައިސެންސް ދޫކުރާ ބައެއްކަމަށެވެ. 

Advertisement

ފޯޅަވަހި ސަރަހައްދުން 91 އަކަ ކިލޯމީޓަރުގެ ސަރަހައްދެއް މޮރިޝަސްއަށް ދިނުމާއި ގުޅިގެން އެ މީހުން ހުއްދަދޭ ގައުމުތަކުން އެ ސަރަހައްދުން ލޭނު އަޅައިގެން މަސްވެރިކަން ކުރަން ފަށާނެކަމަށާއި އެ ހިސާބުން ދިވެހި މަސްވެރިންނަށް ބޮޑެތި ގެއްލުންތައް ލިބިގެންދާނެކަމަށް ޝިޔާމު ވިދާޅުވިއެވެ. 

އެއާއެކު އޭނާ ވިދާޅުވީ ދިވެހި މަސްވެރިންނަށް މިހާ ބޮޑު ގެއްލުމެއް ލިބެން އޮތް ކަމެއްގައި އޭޖީގެ ލަފާފުޅެއް ރައީސުލް ޖުމްހޫރިއްޔާއަށް އެރުވި ނަމަވެސް އެކަން އެގޮތަށް ކުރައްވަން އެމަނިކުފާނަށް ޖެހިވަޑައެއް ނުގަންނަވާނެކަމަށެވެ. 

ޝިޔާމު ވިދާޅުވީ އެޓާނީ ޖެނެރަލްގެ އިތުބާރު ނެތްކަމުގެ ވޯޓު މަޖިލީހުން ނަގަން ޖެހޭކަމަށެވެ. 

ޗާގޯސް މައްސަލައިގައި ސަރުކާރުން ކުއްލިގޮތަކަށް މޮރިޝަސްކޮޅަށް ޖެހުމުން ގިނަ ފާޑުކިޔުންތަކެއް ވަނީ އަމާޒުވެގެން ގޮސްފައެވެ. އެގޮތުން ސަރުކާރުގެ އެ ނިންމުމަކީ އަވައްޓެރި އިންޑިއާއިން ނުފޫޒު ފޯރުވައިގެން ނިންމި ނިންމުމެއްގެ ގޮތުގައި އިދިކޮޅު ފަރާތްތައްވެސް ގެންދަނީ ތުހުމަތުކުރަމުންނެވެ.