މިއަދު 'ވޮއިސް'ގެ ބަދިގެއިން މި ގެނެސްދެނީ މަޑުމަޑުކޮށް މީރު މީރުކޮށް ސިނަމަން ރޯލްސް ހަދާލާނެ ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ.

1 ޖޯޑު ތާފަނާ ދިޔާ ފުލްކްރީމް ކިރު

¼ 2 ސައިސަމުސާ އިންސްޓަންޓް ޔީސްޓް

4 މޭޒުމަތީ ސަމުސާ ހަކުރު

3 ޖޯޑު ފުށް

2 މޭޒުމަތީ ސަމުސާ ދިޔާ ކޮށްފައިހުރި އަން-ސޯލްޓެޑް ބަޓަރު (ހޫނު ވެގެން ނުވާނެ)

1 ބިސް

½ ސައިސަމުސާ ލޮނު
އިތުރު ދެ މޭޒުމަތީ ސަމުސާ ބަޓަރ (ޓްރޭ އާއި ރޯލްސް މަތީގައި އުނގުޅަން)

6 މޭޒުމަތީ ސަމުސާ އަން-ސޯލްޓެޑް ބަޓަރ (ފިނި ކަނޑުވައި މަޑުކޮށްފައި)

1/4 ޖޯޑު ހަކުރު

1 1/2 މޭޒުމަތީ ސަމުސާ މުގުރާފައި ހުރި ފޮނިތޮށި

4 މޭޒުމަތީ ސަމުސާ އަން-ސޯލްޓެޑް ބަޓަރ ( ފިނި ކަނޑުވައި މަޑުކޮށްފައި)

1/2 މޭޒުމަތީ ސަމުސާ ވެނީލާ އެސެންސް

1 ޖޯޑު އައިސިން ޝުޖަރ

100 ގ ކްރީމް ޗީޒް (ފިނި ކަނޑުވައި މަޑު ކޮށްފައި)

1- ބޮޑު ތަށްޓެއްގައި ކިރާއި އީސްޓް އެކުލަވައިލާށެވެ. އެއަށްފަހު އޭތި ރަނގަޅަށް ގިރަމުން އޭގެ ތެރެއަށް ބިހާއި، ހަކުރާއި، ބަޓަރ އަދި ލޮނު ކޮޅު އަޅާލާށެވެ.

2- ދެން އޭގެ ތެރެއަށް ފުށް އަޅަމުން ޕްލާސްޓިކް ނުވަތަ ލަކުޑި ސަމުސަލަކުން އެކުލަވާލާށެވެ. 3 ޖޯޑު ފުށް އެޅުމަށްފަހު ފުށް ގަނޑު އަތުގައި ނުވަތަ ތަށީގައި ތަތް ލާ ނަމަ އިތުރު އެއް ސަމުސާ ފުށް އަޅާލުމަށްފަހު އެކުލަވާލާށެވެ. ފުށްގަނޑު ތަތް ކޮށް އެކަމަކު އަތުގައި ތަތް ނުަލަވާވަރު ވަންދެން އެގޮތަށް ސަމުސަލަކުން ސަމުސަލަކުން އިތުރަށް ފުށް އަޅާލާށެވެ.

3- އެއަށްފަހު ގާތްގަނޑަކަށް 3 މިނެޓް ވަންދެން އަތުން ފުށްގަނޑު މޮޑެލާށެވެ. ދެން އޭގެ މަތި ރަނގަޅަށް ބަންދު ކޮށްލުމަށްފަހު 30 މިނެޓް ވަރު، ފުށް ގަނޑުގެ ސައިޒް ޑަބަލް ވަންދެން ބަހައްޓާލާށެވެ.

4- ދެން ސާފު ތަނެއް މަތީގައި ފުށްކޮޅެއް ބުރުއްސާލާށެވެ. ދެން އޭގެ މަތީގައި ފުށްގަނޑު ބާއްވާލާފައި ގޮން މުއްކަވާފައި ފުށްގަނޑަށް އޮބާށެވެ. އެއީ ވައިތައް ދުއްވާލާށެވެ. ދެން ފުށްގަނޑުގެ މައްޗަށް ކުޑަ ފުށްކޮޅެއް ބުރުއްސާލާފައި ރޮށިދަމާއެތި ބޭނުން ކޮށްގެން ފުށްގަނޑު ދިގަށް ދަމާށެވެ. ދަމާނީ ދިގުމިނުގައި 16 އިންޗި، ފުޅާމިނުގައި 14 އިންޗި ހުންނާނެ ވަރަށެވެ. އަރިމަތިތައް ވީހާވެސް ސީދާ ކުރެވޭތޯ ބަލައްޗެވެ.

5- އެއަށްފަހު 6 މޭޒުމަތީ ސަމުސާ ބަޓަރ ފުށްގަނޑު މަތީގައި ރީތިކޮށް އުނގުޅާލާށެވެ. އަރިމަތީގައި ވެސް އުނގުޅާލަން ވާނެއެވެ.

6- ދެން ވަކިތަށްޓެއްގައި ސިނަމަން ފިލިންގްސް ހަދަން ބެހެއްޓި ހަކުރާއި ފޮނިތޮށި އެކުލަވައިލުމަށްފަހު ފުށްގަނޑު މަތީގައި އުނގުޅާށެވެ. އުނގުޅާނީ ވީހާވެސް އެއްވަރަކަށެވެ. އަދި އަރިމައްޗާއި ހަމައަށް އުނގުޅަން ސަމާލުކަން ބަހައްޓަންވާނެއެވެ.

7- ދެން މަޑުމަޑުން ފުށްގަނޑު އޮލާލާށެވެ. އޮޅާނީ ކުރު ފަޅިންނެވެ. އެއިރުން ސިނަމަން ރޯލްގައި ގިނަ ފަށަލަ ހުންނާނެއެވެ. އޮޅާނީ މަޑު މަޑުން ފަރުވާތެރި ކަމާއިއެކު ބާރު ކޮށެވެ. އަރިމައްޗާއި ހަމައަށް ދެވުނީމައި ކުޑަކޮށް އޮބާލައިގެން ހުޅުވިފައި އޮތްތަން ލައްޕާލާށެވެ. އޮޅާ ނިމޭއިރު އެކިތަން އެކިވަރަށް އޮތްނަމަ އަރިމަތީގައި މަޑުމަޑުން އަތުން ޖަހާލައިގެން އެއްވަރު ކޮށްލެވޭނެއެވެ.

8-  ދެން އޮޅި ފުށްގަނޑު އެއްވަރުގެ 12 ބަޔަށް ތޫނު ވަޅިއަކުން ބައިކޮށްލާށެވެ. ބަހާލީމައި އެތިކޮޅެއްގެ ބޯމިނުގައި ހުންނާނީ ގާތްގަނޑަކަށް ދޮޅު އިންޗިއެވެ.

9- އެއަށްފަހު ޓްރޭއެއްގައި 1 މޭޒުމަތީ ސަމުސާ ބަޓަރ އުގުޅާލުމަށްފަހު  އޭގައި ކޮށި ސިނަމަން ރޯލްސްތައް އަތުރާށެވެ. އަތުރާއިރު ދެއެތިކޮޅުގެ ދޭތެރޭގައި އިންޗިއެއްހާތަން ދޫކުރަންވާނެއެވެ. ދެން ތަބަކުގެ މަތީގައި ސާފު ފޮތިގަނޑެއް އަޅާފައި 20 މިނިޓު ބަހައްޓާލާށެވެ. އެހާއިރުވާއިރު އަނެއްކާވެސް ތަބަކުގައި ހުރި ފުށްކޮޅުތައް ހުންނާނީ ދެގުނައަށް ފުފިފައެވެ.

10- އަވަން 170 ޑިގްރީސް ސެލްސިއަސްއަށް ހޫނުކުރަން ޖައްސާށެވެ. މިކަން ކުރާނީ ފިހަން އަވަނަށް ލުމުގެ 10 މިނިޓު ކުރިންނެވެ.

11- ދެގުނައަށް ފުށްކޮޅުތައް ފުފި ނިމުނީމައި އޭގެ މަތީގައި 1 މޭޒުމަތީ ސަމުސާ ދިޔާ ކޮށްފައި ހުރި ބަޓަރ އުނގުޅާލާށެވެ. ދެން ހޫނު ކުރަން ޖެއްސި އަވަނުގެ މެދު ރެކުގައި ތަބައް ބަހައްޓައިގެން 170 ޑިގްރީސް ސެލްސިއަސްގައި ފިހާށެވެ. ފިހާނީ މައްޗަށް ރަން ކުލަ އަރަން ދެނެވެ. އެކަމަށް ގާތްގަނޑަކަށް 30 މިނިޓު ނަގާނެއެވެ.

12-  ސިނަމަން ރޯލްތައް ފިހެވެމުން ދާއިރު ރޯލްސް މަތީގައި އުނގުޅާނެ ކްރީމް ޗީޒް ފިލިންގްސް ހަދަން ފަށާށެވެ. ފުރަތަމަ، ބޮޑު ބޯތަށްޓެއްގެ ތެރެއަށް ކްރީމް ޗީޒް އާއި، ބަޓަރ އިލެކްޓްރިކް ހޭންޑް މިކްސަރަކުން  އެކުލަވާލާށެވެ. ދެން އެއަށް ވެނީލާ އެސެންސާއި އައިސިން ޝުޖަރ އަޅާފައި ހުރިހާ އެއްޗެއް ރަނގަޅަށް އެއްވަންދެން 4-3 މިނެޓް ވަންދެން ހައިސްޕީޑްގައި އެކުލަވައިލާށެވެ.

13- ސިނަމަން ރޯލްތައް ފިހެވުނީމައި އަވަނުން ޓްރޭ ނަގާފައި ގާތްގަނޑަކަށް 15  މިނިޓުވަރު ވަންދެން ހިހޫ ކުރަން ބަހައްޓާށެވެ. ދެން ރޯލްތަކުގެ މައްޗަށް  ކްރީމް ޗީޒް ފިލިންގްސް އޮއްސާލައި ފަތުރާލާށެވެ. އެއިރުން އެ ހުރީ މީރު މީރު ސިނަމަން ރޯލްސް ތައްޔާރު ކުރެވިފައެވެ.