ޓުވިޓާ ބޭނުންކުރާ ފަރާތްތަކުގެ ތެރެއިން ވެރިފައިޑް އެކައުންޓުތައް ބޭނުންކުރާ ހުރިހާ ފަތާތެއްވެސް ފީ ގެ ގޮތުގައި މަހަކު 8 ޑޮލަރު ދައްކަންޖެހޭނެ ކަމަށް އެ ކުންފުނީގެ އާ ވެރިޔާ އީލޮން މަސްކް ބުނެފި އެވެ.

އާއްމުކޮށް ހައި ޕްރޮފައިލް ފަރާތްތަކުގެ އެކައުންޓް ވެރިފައިޑް ކޮށްފައިވާ ކަން އެންގުމަށްޓަކައި އިންނަ ނޫކުލައިގެ ހެޔޮ ފާހަގަ އަކީ މީގެ ކުރިން ހިލޭ ލިބޭ އެއްޗެކެވެ. އެހެން ނަމަވެސް ދުނިޔޭގެ އެންމެ މުއްސަނދި މަހުޖަނު ކަމުގައިވާ މަސްކް 44 ބިލިއަން ޑޮލަރަށް ޓުވިޓާ ގަތުމަށްފަހު މިވަނީ ވެރިފައިޑް އެކައުންޓުތަކުން 8 ޑޮލަރުގެ ފީއެއް ނަގާނެ ކަމަށް އިއުލާން ކޮށްފައެވެެ. 

އެކަމާއި ގުޅިގެން ގިނަ ބައެއްގެ ފާޑުކިޔުންތައް އަމާޒުވެފައިވަނިކޮށް އޭނާ ކުރި ޓްވީޓެއްގައި "ޝަކުވާކުރާ މީހުން ޝަކުވާކުރަންވީ" ކަމަށާއި އެކަމަކު ވެރިފައިޑް އެކައުންޓަކުން 8 ޑޮލަރުގެ ފީއެއް ނަގާނެ ކަަމަށާ، އަދި ބާރު ލިބޭނީ ވެރިފައިކުރާ މީހުންނަށް ކަމަށް ބުނެފައެވެ. 

އަދި މީގެ އިތުރުން މަސްކް ބުނީ، 8 ޑޮލަރުގެ ފީއެއް ނެގި ނަމަވެސް ގައުމުތަކުގެ ނިސްބަތަށް ބަލައި އެކި ގައުމުތަކުގައި އަގު ބަދަލުވެދާނެ ކަމަށެވެ. އަދި ވެރިފައިކުރާ މީހުންނަށް، ރިޕްލައި ކުރުމާއި ސާޗުކުރުމާއި ދިގު ވީޑިއޯ/އޯޑިއޯ ލެވޭނެ ގޮތް ވެސް ހަދާނެ ކަމަށް އޭނާ ބުންޏެވެ.

ޓްވިޓާ ގަންނަން މިދިޔަ އޭޕްރީލް މަހު ފުރަތަމަ އެއްބަސްވުމަށް ފަހު، މަސްކް ވަނީ މަސްތަކެއް ވަންދެން ޑީލް ކުރިއަށް ނުގެންދަން މަސައްކަތްކޮށްފައެވެ. އެގޮތުން ޓްވިޓާގައި ހުރި ބޮޓްތަކުގެ އަދަދާ މެދު އޭނާ ކަންބޮޑުވުން ފާޅުކުރިއެވެ.
ޓްވިޓާ ގަތުމުގެ އެއްބަސްވުން ނިމުނު ތަނާހެން މަސްކް ވަނީ ޓްވިޓާގެ ސީއީއޯ ޕަރަގް އަގްރަވާލް އާއި ލީގަލް އެގްޒެކެޓިވް ވިޖަޔާ ގައްޑޭ އާއި ޗީފް ފައިނޭންޝަލް އޮފިސަރު ނެޑް ސެގާލް އަދި ޖެނެރަލް ކައުންސެލް ޝޯން އެޖެޓް މަގާމުން ދުރުކޮށްފައެވެ.

މިއާއެކު މަސްކް ވަނީ "ދަ ބާޑް އިޒް ފްރީޑް" ޖަހާ ޓްވިޓާ ލޯގޯގައި އޮންނަ ދޫނި މިނިވަން ވީ ކަމަށް ބުނެ ޓްވީޓެއް ކޮށްފައެވެ.