ދިވެހިރާއްޖޭގެ ސަރަހައްދު ގެއްލޭގޮތަށް ކަންކަން ނިންމެވުމަށްފަހު ޕޯޑިއަމްއަށް އަރާ ވަޑައިގެން ވެލިފުކެއްވެސް ދޫކޮށްނުލައްވާނެކަމަށް ވިދާޅުވުމުން އެކަނި ނުފުދޭކަމަށް އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ޗާގޯސް މައްސަލައާއި ގުޅިގެން މަޖިލީހަށް ހުށައެޅި ގަރާރަށް ވާހަކަދައްކަވަމުން ވައްޑެ ވިދާޅުވީ ޗާގޯސް މައްސަލައަކީ މިއަދު ރާއްޖޭގެ ރައްޔިތުންގެ ޚާއްސަކޮށް ދިވެހި މަސްވެރިންގެ ބޮޑު ކަންބޮޑުވުމެއް އޮތް މައްސަލައެއްކަމަށެވެ.
ޗާގޯސް ނުވަތަ ފޯޅަވަހި ސަރަހައްދަކީ ނުވަތަ އެ ސަރަހައްދުގެ މަސް ކަނޑަކީ ދިވެހިން މިހާރުވެސް މަސް ބާނަމުން އަންނަ އެތަނުން މަންފާ ހޯދަމުން އަންނަ ތަނެއްކަމަށް ވައްޑެ ވިދާޅުވިއެވެ. އެކަން އެހެން އެއްވާ ފޯޅަވައްސާއި 2000 މޭލު ދުރުގައި އޮތް އެ ސަރަހައްދު ބެލެހެއްޓުމުގެ ގާބިލުކަން ނެތް ބައެއްގެ އަތްމައްޗަށް އެތަން ދޫކޮށްލުމުން ދިވެހިރާއްޖެއަށް ވެގެންދާނެ ގޮތާއި މެދު ރައްޔިތުންގެ ކަންބޮޑުވުން އިންތިހާއަށް އޮތްކަމަށް އޭނާ ވިދާޅުވިއެވެ.
އަދި މިފަދަ ހައްސާސް މައްސަލައެއްގައި ރައީސުލްޖުމްހޫރިއްޔާ ހަނު ހުންނެވުމަށްފަހު ރައީސް އޮފީހުގެ ތަރުޖަމާނު މިއުވާން މުހައްމަދު މެދުވެރިކޮށް ރައްޔިތުންނަށް ކަންކަން އޮޅޭގޮތަށް ވާހަކަދެއްކުވުމަކީ އަދި ވަކިން ބޮޑު ކަންބޮޑުވުމެއްގެ ގޮތުގައި ވައްޑެ ފާހަގަކުރެއްވިއެވެ.
"މީ ވަރަށް ހައްސާސް މައްސަލައެއް. ކޮންމެ މީހެއްގެ އެތައް ސުވާލަކަށް ޖަވާބު ބޭނުންވާ މައްސަލައެއް. މީގައި ހަމައެކަނި ރާއްޖެ އިސްލާމްވި ދުވަހި އަރާ އިންޗިއެއްވެސް ދޫކޮށް ނުލާނެއޭ، ވެލިފުކެއްވެސް ދޫކޮށްނުލާނެއޭ (ބުނުމުން) އެވަރެއް ނުފުދޭ. ހޯމް މިނިސްޓަރު ތިމަންނަ ހެކިވަމޭ އެވަރުކަމެއް ނުކުރައްވާނެއޭ (ބުނުމަކުން) އެ ވަރެއް ނުފުދޭ"
އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)
ވައްޑެ ވިދާޅުވީ ކަނޑައެޅިގެން ރާއްޖެއަށް ގެއްލުން ނުވާނެކަމުގެ ސައްހަ މައުލޫމާތު ރައްޔިތުންނާއި މަޖިލީހަށް ހިއްސާކުރަން ޖެހޭކަމަށެވެ. ސަރުކާރުން އެކަންކަން ނުރުކުރައްވާތީ އެ ކަންބޮޑުވުން އިންތިހާއަށް އޮތްކަން އޭނާ ފާހަގަކުރެއްވިއެވެ.
ރައްޔިތުންގެ މަޖިލީހާއި އެވާހަކަ ހިއްސާ ނުކުރާއިރު ރައީސުލްޖުމްހޫރިއްޔާ ކެބިނެޓާއިވެސް އެ މަޝްވަރާ ނުކުރައްވާކަމަށް ބައެއް ވަޒީރުން މައުލޫމާތު ދެއްވާފައިވާކަމަށް ވައްޑެ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
