ދިވެހިބަހުގެ ގަވާއިދު ފޮތަށް ޚިޔާލު ހުށަހެޅުއްވުމުގެ ފުރުސަތު ދިވެހި ބަހުގެ އެކަޑަމީން ހުޅުވާލައިފިއެވެ. 

މިކަމާއި ގުޅޭ ގޮތުން ދިވެހިބަހުގެ އެކަޑަމީން ކުރި ޢިއުލާނެއްގައި ވަނީ، މި ވޭތުވެ ދިޔަ ދުވަސްތަކުގައި ޢިލްމީ ގޮތުން މުޖުތަމަޢަށް އައި ކުރިއެރުމާއެކު މީހުންގެ ވިސްނުމަށާއި ހޭލުންތެރިކަމަށް ވެސް ވަނީ ބަދަލުތަކެއް އައިސްފައިވާކަން ފާހަގަކޮށް މުޖުތަމަޢަށް މި އައި ބަދަލުގެ ސަބަބުން ބަހާމެދު މީހުން ތަފާތު ގޮތްގޮތަށް ވިސްނާން ފަށައިފައިވާ ކަމަށް ބުނެފައެވެ.

އެގޮތުން އެތައް ބަޔަކު ބަހާ ބެހޭ ޢިލްމީ ދިރާސާތަކެއް ކޮށް، ބަހުގެ ގަވާއިދުގެ ތެރެއިން ވެސް އާ ކަންތައްތަކެއް ފާހަގަ ކުރެވިފައިވާކަމަށް އެ އިއުލާނުގައި ވެއެވެ. 

ވުމާއެކު، މި ޒަމާނަށް ފެތޭ ގޮތަށް ދިވެހިބަހުގެ ގަވާއިދު ފޮތެއް އެކުލަވައިލުމުގެ މަސައްކަތް އެ އެކެޑަމީގެ ގަވާއިދު ކޮމެޓީ މެދުވެރިކޮށް މި ކުރަމުންގެންދާކަމަށާ، މި ގަވާއިދު ފޮތް އެކުލަވައިލުމުގައި ބަހާމެދު ވިސްނާއި ޚިޔާކުރާ މީހުންގެ ޚިޔާލުފުޅުތައް ހިމެނުމަކީ މުހިންމުކަމެއްކަމަށް އެ އެކަޑަމީއިން ދެކޭ ކަމަށްވެސް ބުނެފައިވެއެވެ. 

ވީމާ ދިވެހިބަހުގެ ގަވާއިދާ ބެހޭ ގޮތުން ދިވެހިބަހުގެ ޑިގްރީ ކޯހެއްގައި ނުވަތަ މާސްޓާރސް ކޯހެއްގައި ނުވަތަ އަމިއްލަ ގޮތުން ނަމަވެސް އެއްވެސް ދިރާސާއެއް ކޮށް އާ ކަންތައްތަކެއް ހޯދާފައިވާ ނަމަ، ނުވަތަ ގަވާއިދަށް ނުވަތަ ދިވެހިބަސް ބޭނުންކުރުމުގެ ހަމަތަކަށް ގެންނާން ފެންނަ އެއްވެސް އިޞްލާޙެއް ފާހަގަކުރެވިފައި އޮތް ނަމަ، އެ އިޞްލާޙުތައް ލިޔުމުން ހުށަހެޅުމުގެ ފުރުޞަތު މިއަދުން ފެށިގެން މި މަހު 30 ގެ ނިޔަލަށް  ޢާންމުކޮށް ހުޅުވައިލައިފައިވާ ވާހަކަ އެ އެކަމީން ބުނެއެވެ.  

މިކަމާއި ބެހޭ އިތުރު މަޢުލޫމާތު ހޯދުމަށް 3014800 ގުޅައިގެން ނުވަތަ [email protected] އަށް އީމެއިލް ކޮށްގެން ލިބޭނެ ކަމަށްވެސް އެ އިއުލާނުގައި ބުނެފައިވެއެވެ.