އިސްލާމް ދީން ނޫން އެހެން ދީން ތަކުގެ ޝިޢާރުތައް ފައުޅުނުކުރެވޭނެ ކަމަށް އަދުގެ ސަރުކާރުން ބުނަމުންދަނީ އެކަން ކަމަށް މަގުފަހިކޮށްދީފައި ކަމަށް ވިދާޅުވެ ޖަމިއްޔަތުއްސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ނުރުހުން ފައުޅުކޮށްފިއެވެ. 

ފަހަކަށް އައިސް ރާއްޖޭގައި އެހެން ދީންތަކުގެ ޝިއާރުތައް، ޚާއްސަކޮށް ހިންދޫ ދީނުގެ ޝިއާރުތައް ފާޅުގައި އިންޑިއާގެ އެކިއެކި ފަރާތްތަކުން ފައުޅުކުރާތަން އަންނަނީ ފެންނަމުންނެވެ. އެގޮތުން ދާދިފަހުން އައްޑޫ ސިޓީ ހިތަދޫގެ ކެނަރީމަގުގައި ތާރު އެޅުމުގެ މަސައްކަތް ފަށާފައިއިރު، އެ މަސައްކަތް ހިންދޫއިންގެ އަޅުކަމާއެކުގައި ފެށި މައްސަލައެއް ވަނީ ފެންމަތިވެފައެވެ. އަދި އެކަން ކުށްވެރިކުރައްވައި، އެމައްސަލަ ބެލުމަށް ފުލުހުންނަށް ހުށަހަޅާފައިވާ ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވަނީ އިއްޔެ ވިދާޅުވެފައެވެ.

އެކަމާއި ގުޅިގެން ޢަލީ ރަމީޒު ކުރެއްވި ޓުވީޓެއްގައި ވިދާޅުވީ، އިސްލާމްދީން ނޫން އެހެން ދީންތަކުގެ ޝިއާރުތައް ޢާއްމުކޮށް ފައުޅުކުރުމަކީ، ބަލައިގަނެވޭނެ ކަމެއް ނޫންކަމަށާ، އެފަދަ ކަންކަމަށް އިންކާރުކުރާ ކަމަށް އަޑުބާރު ލާފައި ބުނާއިރު, އެފަދަ ކަންކަމަށް ހިތްވަރުދީ، އެ ޖަރީމާތައް ހިންގުމަށް މަގުފަހި ކޮށްދެނީވެސް ސަރުކާރުން ކަމަށެވެ. 

Advertisement

އައްޑޫގައި ހިންދޫ ދީނުގެ އަޅުކަން ފާޅުގައި ކުރި މައްސަލައިގެ އިތުރުން މީގެ ކުޑަ ދުވަސްކޮޅެއްކުރިން ބިލެއްދޫގައިވެސް އިންޑިއާ ބަޔަކު ހިންދޫ ދީނުގެ ޚާއްސަ ދުވަހެއް ފާހަގަކުރުމަށް އަޅުކަމެއް ހިންގާފައިވާ މައްސަލައެއްވެސް ވަނީ ފެންމަތިވެގެން ގޮސްފައެވެ. 

މި ނޫނަސް މިފަދަ އެތައް މައްސަލައެއް ފެންމަތިވެގެން ގޮސްފައިވާއިރު މިއިން އެއްވެސް ކަމަކަށް މިހާތަނަށް އެއްވެސް ފިޔަވަޅެއް އަޅާފައި ނުވާކަން ފާހަގަކޮށްލެވެއެވެ.