ހޫޕޯ ނުވަތަ ދިވެހި ނަމުން ނަމަ ހުދުހުދު ދޫނި ރާއްޖޭގެ ބައެއް ރަށްރަށުން ފެންނަމުންދާތީ ގިނަ ބައެއްގެ ސަމާލުކަން އެ ދޫންޏަށް ހުއްޓިއްޖެއެވެ. 

ހުދުހުދަކީ ރާއްޖޭގައި ދިރިއުޅޭ ދޫންޏެއް ނޫން ނަމަވެސް ދޭތެރެ ދޭތެރެއިން، އިރުވައި މޫސުމުގެ ވަޔާއި އެނޫންވެސް މޫސުމީ ކަންކަމާއި ގުޅިގެން މިދޫނި ރާއްޖެއިން ފެނެއެވެ. އެގޮތުން މިފަހުން މި ދޫނި ފެނިފައިވަނީ ޅ. އަތޮޅުންނާއި، ހޮލިޑޭ އިން ރިސޯޓް ކަނޑޫމާ މޯލްޑިވްސް އިންނެވެ. 

ހުދުހުދު ހޮލިޑޭ އިން ރިސޯޓް ކަނޑޫމާ މޯލްޑިވްސްގައި-- ފޮޓޯ: އުޝާން މުހައްމަދު 

ހުދުހުދަކީ މައިގްރޭޓަރީ ދޫންޏެކެވެ. އެއީ އަބަދު އެއްތަނެއްގައި ހުރުމުގެ ބަދަލުގައި އެކި ދުވަސް ވަރު އެކި ސަރަހައްދުތަކަށް ދަތުރުކުރާ ދޫންޏެކެވެ. މި ދޫނި އާއްމު ކޮށް ދިރިއުޅެނީ އެފްރިކާއާއި، އޭޝިއާއާއި އަދި ޔޫރަޕުގެ ގައުމުތަކުގައެވެ. ރީތި ފިޔަތަކެއް ލިބިފައިވާ މި ދޫނީގެ އެންމެ ޚާއްސަ އެއް ސިފައަކީ އޭގެ ބޮލުގައި ތާޖެއް ފަދައިން ހުންނަ ފިޔަތަކެވެ. 

މީގެ އިތުރުންވެސް މި ދޫންޏަކީ އިސްލާމީ ތާރީޚުގައިވެސް ވަރަށް ޚާއްސަ މަގާމެއް ދެވިފައިވާ ދޫންޏެކެވެ. އެގޮތުން ސުލައިމާނު އަލައިހިއްސަލާމްގެ ޒަމާނުގައި ދިރިއުޅުނު އިރަށް އަޅުކަންކުރާ އަންހެން ރަސްކަލެއްގެ ވާހަކަ ސުލައިމާނު ގެފާނާއި ހަމައަށް ގެނެސްދީފައިވަނީ ހުދުހުދެވެ. 

ރީތި ހުދުހުދު ދޫނި ރާއްޖެއިން ފެނިފައިވާއިރު، ދާދިފަހުން، ރާއްޖޭގެ ވަރަށް ގިނަ ރަށްރަށުން ގުޑުގުޑާ ދޫނި ނުވަތަ ފްލެމިންގޯވެސްވަނީ ފެނިފައެވެ. އެ ދޫންޏަށްވެސް ގިނަ ބައެއްގެ ސަމާލުކަން ވަނީ ހުއްޓިގެންގޮސްފައެވެ. ބޭރުގައުމުތަކުން ފެންނަ މިފަދަ ރީތި ދޫނިތައް ދޭތެރެ ދޭތެރެއިން މޫސުމީ އެކި ކަންކަމާއި ގުޅިގެން ރާއްޖެއިން ފެނެއެވެ. އެއަށްފަހު އެ ދޫނިތައް އުޅޭ ސަރަހަށްދަށް އެނބުރި އެ ދޫނިތައް ދެއެވެ.