3 ނޮވެމްބަރު 1988 ގައި ރާއްޖެއަށް ކުރިމަތިވިފަދަ ބިރުވެރި ނާމާން 'ސިއްކަގެ ދުވަސް' އަނެއްކާވެސް އެނބުރި އައިސްފައިވާ ކަމަށް ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ. 

މިއަދު ފާހަގަ ކުރަމުންދާ ނަސްރުގެ ދުވަހާއި ގުޅިގެން ރައީސް ޔާމީން ކުރެއްވި ޓުވީޓެއްގައި އެމަނިކުފާނު ވަނީ ނޮވެމްބަރު 3 ވީ އެ ބިރުވެރި ދުވަހު، ދިވެހިންގެ ތެރެއިން ސިއްކަ އާއިލާ އަށް ނިސްބަތްވާ ބަޔަކުވެސް ހިމެނޭހެން ތަމަޅައިންނާއި ގުޅިގެން ރާއްޖެއަށް ހަމަލާދިން ގޮތް ސިފަކޮށް ސިފައިންގެ ތެރެއަށް ތަމަޅައިން ގްރެނޭޑު އުކި ވާހަކަ ގެންނަވާފައެވެ.

އަދި އެ ނާމާން ދުވަހު ދިވެހިޤައުމުގެ ދިފާއުގައި ލަޝްކަރެއް ނިކުމެ ހަނގުރާމަ ކޮށް އޭގެ ތެރެއިން ޝަހީދުވި އަބްޠާލުންގެ ޒިކުރާާ ވެސް ރައީސް ޔާމީން ވަނީ އައު ކުރައްވާފައެވެ. 

ނޮވެމްބަރު 3 ވީ އެ ދުވަސް ބިރުވެރި "ސިއްކަގެ ދުވަސް" ގޮތުގައި ރައީސް ޔާމީން ސިފަ ކުރައްވާފައި މިވަނީ، 3 ނޮވެމްބަރު ގެ އުދުވާނީ ހަމަލާގައި ބައިވެރިވުން އޮވެގެން ޝަރީއަތަށް ސާބިތުވެ އަދަބު ލިބުނު ސިއްކަ އަހުމަދު އިސްމާއިލް މަނިކަށް އިޝާރާތް ކުރައްވައެވެ. ސިއްކަ އަހުމަދު އިސްމާއިލަކީ މިހާރުގެ ފަސްޓް ލޭޑީ ފަޒްނާގެ ބައްޕައެވެ. އަދި ތަމަޅައިން ގޮވައިގެން ދިވެހިރާއްޖެ ހިފަން އައި ލަޝްކަރުގައި އިސްކޮށް ހުރީ ހާޖަރާގެ ލުތުފީގެ އޭރު ވިޔަފާރި ޕާޓްނަރެވެ.