މީސްމީޑިއާގައި ޚިޔާލު ފާޅުކުރާ ގޮތަކުން ފިޔަވަޅު އަޅާންޖެހިދާނެ ކަމުގެ އިންޒާރު، ސަރުކާރުގެ ވިޔަފާރި ކުންފުނި، އެގްރޯ ނޭޝަނަލް ކޯޕަރޭޝަން (އެގްރޯނެޓް) އިން އެކުންފުނީގެ މުވައްޒަފުންނަށް ދީފިއެވެ.
އެގްރޯނެޓުން އެ ކުންފުނީގެ ހުރިހާ މުވައްޒަފުންނަށް ފޮނުވި ސާކިއުލާއެއްގައި ބުނެފައިވަނީ ގަނޫނުތަކުން ހިޔާލުފާޅުކުރުމުގެ މިނިވަންކަން ލިބިފައިވީ ނަމަވެސް، އެ މިނިވަންކަން ބޭނުންކުރަންވާނީ ކުންފުނީގެ އިމޭޖާއި ކުންފުނީގެ ހިންގުމަށް އަދި ވަޒީފާގެ ގޮތުން މުއާމަލާތުކުރާ އެކިއެކި ފަރާތްތަކަށް ވެސް ބުރޫ ނާރާނެފަދަ ގޮތަކަށް ކަމަށެވެ.
"އެއީ ދެކެވޭ ވާހަކައަކުން ނުވަތަ ކުރެވޭ ޕޯސްޓެއްގެ ޒާތުން އެތަކެއް ނޭދެވެ ކަންކަމާ ދިމާވުން އެކަށީގެންވެ އެވެ. މި ކުންފުންޏަކީ ސަރުކާރުގެ ކުންފުންޏަކަށް ވެފައި މިފަދަ އަމަލެއްގެ ސަބަބުން ކުންފުންޏަށްވެސް އޭގެ ނޭދެވޭ އަސަރެއް ކުރުމަކީ އެކަށީގެންވާ ކަމެކެވެ،" ސާކިއުލާގައި ބުންޏެވެ.
އެހެންކަމުން ސޯޝަލް މީޑިއާ ބޭނުންކުރާއިރު ބޭނުންކުރަންވާނީ ކުންފުންޏަށް އޭގެ ސަބަބުން ހުތުރު ނަމެއް ނުވަތަ ނޭދެވޭ އަސަރެއް ނުކުރާ ގޮތަކަށް ކަމަށާ އަދި އޮފީސް ރަސްމީ ގަޑީގައި ސޯޝަލް މީޑިއާ ބޭނުންކުރަންވާނީ މަސައްކަތަށް ހުރަސްނޭޅޭ ގޮތަށް ކަމަށް ވެސް އެ ސާކިއުލާގައި ބުނެފައިވެ އެވެ.
"އެ ކަންކަމާ ހިލާފަށް އަމަލުކުރާ މުވައްޒަފުންނާމެދު ކުންފުނީގެ ޕޮލިސީތަކުގައި ވާގޮތުގެ މަތިން އިސްލާހީ ފިޔަވަޅު އެޅޭނެ ކަމުގައި ދެންނެވިން" ސާކިއުލާގައި މުވައްޒަފުންނަށް އިންޒާރުދީ ބުނެފައިވެއެވެ.
Advertisement
This content is created and paid for by advertisers and does not involve Voice Journalists
