އެމްޑީޕީގެ ތަރުޖަމާނަކަށް އަނަސް އަބްދުއްސައްތާރު ހަމަޖައްސަވައިފިއެވެ.
އަނަސް ތަރުޖަމާނުގެ މަގާމަށް އައްޔަން ކޮށްފައި މިވަނީ އެންމެ ފަހުން އެ މަގާމުގައި ހުންނެވި މާފަންނު އުތުރު ދާއިރާގެ މެންބަރު އިމްތިޔާޒް ފަހްމީ (އިންތި) މަގާމުން އިސްތިއުފާ ދެއްވުމާއި ގުޅިގެން އެ މަގާމު ހުސްވެފައިވަނިކޮށެވެ.
2012 ވަނަ އަހަރުން ފެށިގެން އެމްޑީޕީގެ ސްޕޯކްސްޕާސަން ކަމުގައި ހުރުމަށްފަހު، މިއަހަރުގެ ފެބްރުއަރީގައި އިންތި މަގާމުން އިސްތިއުފާދެއްވީ ޕާޓީގެ ޗެއާޕާސަން ކަމަށް ކުރިމަތިލުމަށެވެ. ނަމަވެސް އެ އިންތިހާބު ކާމިޔާބުކުރީ މިނިސްޓަރު ފައްޔާޒު އިސްމާއީލް އެވެ.
އަނަސް އެންމެފަހުން ހުންނެވީ އެމްޑީޕީގެ އިސްތިއުނާފް ފަނޑިޔާރު މަޖިލިސްގެ ރައީސްކަމުގައެވެ. އޭގެ ކުރިން 2015 އަހަރުން ފެށިގެން 2020 ވަނަ އަހަރާ ހަމައަށް އޭނާ ވަނީ އެމްޑީޕީގެ ސެކްރެޓަރީ ޖެނެރަލްކަންވެސް ކުރައްވާފަ އެވެ.
އަނަސް ވަނީ ނިމިދިޔަ ކައުންސިލް އިންތިހާބުގައި އެމްޑީޕީގެ ޓިކެޓުގައި މާލޭ ސިޓީގެ މޭޔަރު ކަމަށް ވާދަ ކުރައްވާފައެވެ. އެ އިންތިހާބުން ބަލިވުމުން އަނަސް ވަނީ ފިނޭންސް މިނިސްޓްރީގެ ސްޓޭޓް މިނިސްޓަރަކަށް ސަރުކާރުން އައްޔަން ކޮށްފަ އެވެ. އޭނާ މިހާރު ވެސް ހުރީ އެމަގާމުގައެވެ.
ސްޓޭޓް މިނިސްޓަރު ކަމުގެ ކުރިން އަނަސް އަދާކުރައްވާފައިވަނީ ވަކާލާތު ޗޭންބާސްގެ މެނޭޖިންގް ޕާޓްނަރުގެ މަގާމެވެ. 2019 ވަނަ އަހަރުން ފެށިގެން 2021 ވަނަ އަހަރުގެ ޖޫން މަހުގެ ނިޔަލަށް ދިވެހިރާއްޖޭގެ ބާ ކައުންސިލްގެ އެޤްޒެކެޓިވް ކޮމިޓީ މެމްބަރެއްގެ މަޤާމު ވެސް ފުރުއްވާފައިވެއެވެ.
Advertisement
This content is created and paid for by advertisers and does not involve Voice Journalists
