ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަަށް ބަޑިން ހަމަލާދީ ޒަހަމުކޮށްލައިފި އެވެ.

ބޭރުގެ މީޑިއާ ތަކުން ރިޕޯޓް ކޮށްފައިވާ ގޮތުގައި އިމްރާންގެ ގަޔަށް ބަޑިން ހަމަލާދީފައިވަނީ އަވަސް އިންތިހާބަކަށް ގޮވާލާ މުޅި ޕާކިސްތާނުގައި ކުރިއަށް ގެންދާ އެއްވުމުގެ ތެރެއިން ގުޖުރާންވާލާގައި ބޭއްވި އެއްވުމެއްގެ ތެރެއިންނެވެ. އަދި އެ ޕާޓީގެ އޮފިޝަލް އަޒްހަރު މަޝްވާނީ އާއި ހަވާލާދީ އަލްޖަޒީރާއިން ރިޕޯޓް ކޮށްފައިވާ ގޮތުގައި ބަޑިން ދިން ހަމަލާ އަމާޒުވީ އިމްރާންގެ ފަޔަށެވެ. ނަމަވެސް އިމްރާންގެ ހާލު ރަނގަޅު ކަމަށްވެސް އޭނާ ވިދާޅުވިއެވެ. 

އެ އެއްވުމުގެ ތެރެއިން އިމްރާންގެ އިތުރުން އޭނާގެ ސަޕޯޓަރެއްގެ ގަޔަށް ބަޑި ޖެހުމުގެ ސަބަބުން މަރުވެސް ވެފައިވާކަމަށް ރިޕޯޓްތައް ބުނެއެވެ. އަދި އިމްރާން ނިސްބަތްވާ ޕާޓީ ކަމަށްވާ ޕާކިސްތާން ތަހްރީކް އިންސާފް ޕާޓީގެ އެހެން ބައެއް މެންބަރުންނަށްވެސް އަނިޔާވެފައިވެއެެވެ.

އިމްރާން ޚާނަށް ބަޑިން ހަމަލާދިން ކަމަށް ތުހުމަތު ކުރެވޭ މީހާ މިހާރު ހައްޔަރު ކޮށްފައިވާއިރު އޭނާގެ ވީޑިއޯއެއް ފުލުހުން ވަނީ އާއްމު ކޮށްފައެވެ. އަދި އެ ވީޑިއޯގައި އޭނާ ވަނީ އިމްރާން ޚާން ގަޔަށް ބަޑިޖެހު ސަބަބުވެސް ވަނީ ހާމަކޮށްފައެވެ. 

"އޭނާ (އިމްރާން ޚާން) އުޅެނީ އެހެން މީހުން މަގުފުރައްދަން. އަހަރެންނަށް އެކަން ހަޖަމެއް ނުވޭ." އިމްރާން ޚާން ގަޔަށް ބަޑިޖެހި މީހާ ބުނެފައިވެއެވެ. 

މީގެ އިތުރުން، އެ މީހާ ބުނީ، އޭނާ ބޭނުންވީ އިމްރާން މަރާލަން ކަމަށާ، އިތުރު އެއްވެސް މީހަކަށް ގެއްލުމެއް ދޭކަށް އޭނާ ބޭނުމެއް ނުވެއެވެ. އަދި އެކަން ކުރީ އެއްވެސް މީހެއްގެ ނުފޫޒެއް އޮވެގެން ނޫން ކަމަށާ، އެއީ އަމިއްލަ އަށް ބޭނުންވެގެން ކުރިކަމެއް ކަމަށްވެސް އޭނާ ބުނެފައިވެއެވެ.  

އިމްރާން އަށް ދެވުނު މިހަމަލާ ކުށްވެރިކޮށް ޕާކިސްތާނުގެ މިހާރުގެ ބޮޑުވަޒީރު ޝެހްބާޒް ޝަރީފް ވަނީ އެ މައްސަލަ ވީ އެންމެ އަވަހަށް ތަހުގީގު ކުރުމަށް ކަމާބެހޭ އިދާރާތަކަށް ގޮވާލާފައެވެ.