ޕީ.ޕީ.އެމް ގެ މެންބަރު ކަމުން ވަކިކޮށްފައިވާ މާލޭ ސިޓީ ކައުންސިލްގައި ވިލިމާލޭ ދާއިރާ ތަމްސީލުކުރައްވާ ކައުންސިލަރ ނަޙުލާ ޢަލީ އަށް އިދިކޮޅު ޕީޕީއެމް/ޕީއެންސީ ކޯލިޝަންގެ ކަންކަމާއި ބެހި ބަސް ބުނުމުގެ ހައްގެއް ނޯންނާނެ ކަމަށް އެ ކޯލިޝަނުން ބުނެފިއެވެ.
އިދިކޮޅު ކޯލިޝަންގެ ދާއިރާ އިންތިޚާބުގައި ވަކި ކެންޑިޑޭޓަކު ހޮވުމަށް ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ބޭނުންފުޅުވާ ކަމަށް ބުނެ ނަޙުލާ ދައްކަމުން ގެންދާ ވާހަކަ ކުށްވެރިކޮށް އެ ކޯލިޝަނުން ނެރުނު ބަޔާނެއްގައި ބުނީ، 2022 ނޮވެމްބަރ 5 ވަނަ ދުވަހު ބޭއްވުމަށް ހަމަޖެހިފައިވާ އެކޯލިޝަންގެ ދާއިރާ އިންތިޚާބުގައި ޕާޓީގެ އެތެރޭގެ މަސްލަޙަތު ގެއްލޭ ގޮތަށް ބައެއް ފަރާތްތަކުން ޢަމަލުކުރަމުން ގެންދާކަން ފާހަގަވެފައިވާ ކަމަށެވެ.
އެގޮތުން އެޕާޓީއާއި އެއްވެސް ގުޅުމެއް ނެތް ފަރާތްތަކުންވެސް އެ އިންތިޚާބުގެ ތެރެއަށް ވަދެ ޕާޓީ ބައިބައި ކުރުމުގެ މަސައްކަތް ތަކެއްވެސް ކުރަމުންދާކަމަށް އެ ބަޔާނުގައި ވަނީ ބުނެފައެވެ. އެގޮތުން، ޕީ.ޕީ.އެމް ގެ މެންބަރު ކަމުން ވަކިކޮށްފައިވާ ނަޙުލާ، އެ އިންތިޚާބުގައި ވާދަކުރާ ވަކި ކެންޑިޑޭޓަކަށް ވޯޓު ދިނުމަށް ބުނަމުންދާ ކަމާއި، އަދި ޕާޓީގެ ރައީސް ގެ ތާއީދު އޮތީވެސް ވަކި ކެންޑިޑޭޓަކަށް ކަމަށް ބުނެ ގޭގެއަށް ޒިޔާރަތްކޮށް، މީހުންނާ ބައްދަލުކޮށް، އަދި ތަފާތު ފޯރަމްތަކުގައިވެސް އެގޮތަށް ބުނަމުންދާ ކަން ފާހަގަވެފައިވާ ކަމަށް އެ ބަޔާނުގައި ބުނެފައިވެއެވެ.
"އެހެންކަމުން ނަޙުލާ ޢަލީގެ އެ ޢަމަލުތައް ހަރުކަށި އިބާރާތުން ކުށްވެރި ކުރަމެވެ. ނަޙުލާ ޢަލީ އަށް މިކޯލިޝަންގެ އެތެރޭގެ ކަންކަމާއި ބެހި ބަސް ބުނުމުގެ ޙައްޤު އެއްގޮތަށްވެސް ލިބިގެނެއް ނުވާނެއެވެ." އިދިކޮޅު ކޯލިޝަންގެ ބަޔާނުގައި ބުނެފައިވެއެވެ.
މީގެ އިތުރުން އެ ބަޔާނުގައި ވަނީ، ނަޙުލާ ޢަލީ އާއި އަދި އެކޯލިޝަނަށް ނިސްބަތްވާ ޕާޓީއެއްގެ މެންބަރަކަށް ނުވާ ފަރާތްތަކުންވެސް ވަކި ކެންޑިޑޭޓަކު ހޮވުމަށް މަސައްކަތްކޮށް ރައީސް ޔާމީންގެ ނަންފުޅު ބޭނުންކޮށްގެން މަންފާ ހޯދުމަށް ކުރަމުން ގެންދާ މަސައްކަތައް މިހާރުން މިހާރަށް ހުއްޓާލުމަށް ގޮވާލާފައެވެ. އަދި އެފަދައިން ބަޔަކު މަސައްކަތް ކުރިނަމަވެސް އެކަން ބަލައިނުގަތުމަށް އެކޯލިޝަންގެ ދެ ޕާޓީގެ މެންބަރުންނަށްވެސް އިދިކޮޅުން ވަނީ އިލްތިމާސް ކޮށްފައެވެ.
Advertisement
This content is created and paid for by advertisers and does not involve Voice Journalists
