މަކަރާއި ހީލަތުން ހޯދާފައިސާ އަކީ ހަރާމް އެއްޗެއް ކަމަށްވާއިރު އެ އެއްޗެހި ތިމާގެ އަނބިދަރިންނަށް ކާން ދޭއިރު ވިސްނާލާންޖެހޭ ކަމަށް ޚުތުބާގައި ބުނެފިއެވެ.
"މަކަރާއި ހީލަތް ހެދުން" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ވަނީ މަކަރާއި ހީލަތް ހެދުން އަދި އޮޅުވާލުމަކީ އިސްލާމްދީނުގައި ހަރާމް ކަމެއް ކަމަށާ އެއީ ބޮޑު ފާފައެއްކަން ފާހަގަކޮށް އެކަމުގެ ހުރި ނުބައި ކަމާއި ގުޅޭގޮތުން އަލިއަޅުވާލާފައެވެ.
އެގޮތުން ޚުތުބާގައި ބުނީ ކޮންމެ މީހަކުވެސް ދުންޔެވީ ޙަޔާތުގައި މަސައްކަތް ކުރަމުންދަނީ އުޚްރަވީ ޙަޔާތުގެ ބާއްޖަވެރިކަން ހޯދުމަށް ކަމަށާ، ވިޔަފާރިއާއި، އެ ނޫން މުޢާމަލާތުތަކުގައި ވެސް މަކަރު ހަދައި އޮޅުވާލުމަކީ ތިމާގެ ދެ ދުނިޔެ އަބާއްޖަވެރިވެގެންދާނެ ކަމެއް ކަމަށެވެ. އަދި މަކަރާއި ހީލަތް ހަދައި، އޮޅުވާލައިގެ މީސްތަކުންގެ އަތުން ނާޖާއިޒު ފައިދާ ނަގަމުންދާއިރު، އެކަމާ މެދު ކުޑަކޮށްވެސް ވިސްނާލިންތޯ ޚުތުބާގައި ވަނީ ސުވާލުކޮށްފައެވެ.
"މާތްﷲ ޙަރާމް ކުރައްވާފައިވާ ގޮތްގޮތުން ހޯދާ ފައިސާ ތިޔަ ހޭދަކުރަމުންދަނީ، ތިމާގެ އަމިއްލަ ނަފްސަށާއި ތިމާ ލޯބިވާ އަނބިދަރިންނާއި، މައިންބަފައިންނާއި، ގާތްތިމާގެ މީހުންނަށް ނޫން ހެއްޔެވެ؟ ތިމާގެ އަތުން ތިމާ ލޯބިވާ މީހުންނަށް ޙަރާމް މުދަލާއި ފައިސާއިން ކާންދެމުން ގެންދާއިރު މިކަމުގެ ނުބައިކަމާ މެދު ވިސްނާލިން ހެއްޔެވެ؟" ޚުތުބާގައި ބުނެފައިވެއެވެ.
އެހެންކަމުން އަޅުގަނޑުމެންގެ އަނބިދަރިން ކާން ބޭނުންކުރާ ތަކެއްޗާއި އެހެނިހެން ކަންކަމަށް ބޭނުންކުރާ ތަކެއްޗަކީ ﷲ ހުއްދަ ކުރައްވާފައިވާ ގޮތަށް ހޯދާ ތަކެތި ކަމުގައިވުމަކީ ލާޒިމު ކަމެއް ކަމުގައިވެސް ޚުތުބާގައި ބުނެފައިވެއެވެ.
މީގެ އިތުރުން ޚުތުބާގައި ބުނީ، ވިޔަފާރި ކުރުމުގައި ބައެއް ފަރާތްތަކުން މަކަރު ހަދައި އޮޅުވާލައި ފެންވަރު ދަށް މުދާ، ނަން މަޝްހޫރު ބްރޭންޑުތަކުގެ ނަމުގައި އަގު ބޮޑު އަގުގައި ވިއްކުމަކީ މަކަރާއި ހީލަތް ހެދުމުގެ ތެރޭގައި ހިމެނޭ ކަމެއް ކަމަށެވެ.
"ހަރާމް އެއްޗެއް ކައިގެން މަސް ޖަހާފައިވަ ހަށިގަނޑު ސުވަރުގެ ނުވަންނަ ހުއްޓެވެ. އެ ހަށިގަނޑަށް އެންމެ އައުލާކަން ބޮޑީ ނަރަކަ އެވެ،" ހަރާމް މުދަލާއި ފައިސާ ކެއުމާ ބެހޭގޮތުން ރަސޫލާ ހަދީޘް ކުރައްވާފައިވާ ކަމަށް ހުތުބާގައި ބުންޏެވެ.
Advertisement
This content is created and paid for by advertisers and does not involve Voice Journalists
