ށ. ފުނަދޫ ބަނދަރުގައި އަޅާފައި އޮތް މަސް ދޯންޏެއްގައި އަލިފާން ރޯވެއްޖެއެވެ.
މި ހާދިސާ އާއި ގުޅިގެން ފުލުހުންގެ މީޑިއާ އޮފިޝަލް 'ވޮއިސް' އަށް މައުލޫމާތު ދެއްވަމުން ވިދާޅުވީ، ށ. ފުނަދޫ ފަޅުގައި އަޅާފައި އޮތް ދޯންޏެއްގައި އަލިފާން ރޯވެފައިވާ ކަމަށް މިއަދު ހެނދުނު 11:15 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.
އަދި އެ އަލިފާންގަނޑު މިހާރު ނިއްވާލެވިފައިވާ ކަމަށާ، އެ ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
އެ އަލިފާން ރޯވި ސަބަބު ފުލުހުން ހާމަކޮށްފައި ނުވާއިރު މީޑިއާ އޮފިޝަލް އިތުރަށް ވިދާޅުވީ، އެ މައްސަލަ އާއި ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަ ކަމަށެވެ.
މި ހާދިސާ އާއި ގުޅޭ ވީޑިއޯ މީސްމީޑިއާގައި އާއްމުވެފައިވާ އިރު, ވީޑިއޯއިން ފެންނަ ގޮތުން އެ ފައިބަރުން ހަދާފައިވާ އެ ދޯނީގެ ވަރަށް ބޮޑު ބައެއް ވަނީ އަދާފައެވެ. އަދި ދޯނީގައި ރޯވެފައިވާ އަލިފާން ނިއްވުމުގެ މަސައްކަތް ގިނަ އަދަދެއްގެ އާއްމުންނާއި ފުލުހުން ވެސް ކޮށްފައިވާއިރު، އަލިފާން ރޯވުމުގެ ސަބަބުން އެ ސަރަހައްދަށް ވަރަށް ބޮޑަށް ދުމުގެ އަސަރު ވަނީ ކޮށްފައެވެ.
Advertisement
This content is created and paid for by advertisers and does not involve Voice Journalists
