ޕާކިސްތާނުގެ ކުރީގެ ބޮޑުވަޒީރު އިމްރާން ޚާންއަށް ދިން ހަމަލާ ދިވެހިރާއްޖެއިން ކުށްވެރި ނުކުރާތީ ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ކަންބޮޑުވުން ފާޅުކުރައްވައިފިއެވެ. 

އިމްރާންގެ ގަޔަށް ބަޑިން ހަމަލާދީފައިވަނީ އަވަސް އިންތިހާބަކަށް ގޮވާލާ މުޅި ޕާކިސްތާނުގައި ކުރިއަށް ގެންދާ އެއްވުމުގެ ތެރެއިން ގުޖުރާންވާލާގައި ބޭއްވި އެއްވުމެއްގެ ތެރެއިންނެވެ.

އިމްރާން ޚާންއަށް ދިން އެ ހަމަލާ ދުނިޔޭގެ ވަރަށް ގިނަ ގައުމުތަކުން އަދި ސިޔާސީ މަޝްރަހުގައި ހަރަކާތްތެރިވާ ފަރާތްތައްވެސް ވަނީ ކުށްވެރިކޮސްފައެވެ. 

Advertisement

އެހެން ނަމަވެސް ދިވެހި ސަރުކާރުން މިހާތަނަށް އެ ހަމަލާ ކުށްވެރިކޮށްފއެއް ނުވެއެވެ. 

އެކަން ފާހަގަކުރައްވާ ޑރ ޝަހީމް ކުރެއްވި ޓްވީޓެއްގައި ވިދާޅުވީ ރާއްޖެއާ އެކުވެރި ދައުލަތެއްކަމަށްވާ ޕާކިސްތާނުގެ ވެރިކަންކުރައްވާފައިވާ ބޭފުޅަކު އަވަހާރާކޮށްލަން ދިން ޙަމަލާ ދުނިޔޭގެ ޤައުމުތަކުން ކުށްވެރިކޮށް ބަޔާންތައް ނެރެމުންދާއިރު، ދިވެހި ސަރުކާރުން އެކަން ކުށްވެރިނުކޮށް ހަނު ތިބުމަކީ ދިވެހި ދައުލަތުގެ މަތިވެރިކަމަށް އުނިކަން ގެނުވާނެ ކަމެއްކަމަށެވެ. 

ޑރ ޝަހީމު ވަނީ އެފަދަ ހިތާމަވެރި ހާދިސާއެއް އަވައްޓެރި ޕާކިސްތާނުގައި ހިނގާފައިވާއިރު، ސަރުކާރުން އެކަމާއި ގުޅިގެން އެއްވެސް އެއްޗެއް ބުނެފައި ނުވާތީ ކަންބޮޑުވުން ފާޅުކުރައްވާފައެވެ. 

ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަށް ދިން އެ ހަމަލާއާއި ގުޅިގެން އޭނާގެ ފުރާނައަށް ނުރައްކާ ވާވަރުގެ ގެއްލުންތަކެއް ލިބިފައެއް ނުވެއެވެ. އެހެން ނަމަވެސް ކޮންމެސް ވަރެއްގެ އަނިޔާތަކެއް ލިބިފައިވާއިރު މިހާރު ހާލުކޮޅު ރަނގަޅުކަމަށް ޕާކިސްތާނުގެ މީޑިއާތަކުން ރިޕޯޓު ކުރެއެވެ.