ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެޕޯލޯ ހޯލްޑިންގްސް އަށް ދައްކަންޖެހޭ ބޮޑު ދަރަންޏެއްގެ ބަދަލުގައި، އެފްއޭއެމްގެ ހުޅުމާލޭ ބިމުން ބައެއް ދިނީ އެއްބަސްވުމާ ހިލާފަށް ކަމަށް އެޗްޑީސީން މިއަދު ބުނެފި އެވެ.

އެޗްޑީސީން، ހުޅުމާލެއިން އެފްއޭއެމް އަށް، ބިންދޫކުރީ ފުޓްބޯލް ޓްރެއިނިން ފެސިލިޓީއެއް ހަދާށެވެ. މި ބިމުގައި ދެ ފުޓްބޯޅަ ދަނޑު ހެދުމަށް އެއްބަސްވެ ބިން ހަވާލުކޮށްފައިވަނީ 2018 ވަނަ އަހަރު އެވެ. އެހެންނަމަވެސް އެފްއޭއެމަށް ދީފައިވާ ބިމުން ބައެއް ދިގު މުއްދަތަކަށް އެޕޯލޯ ހޯލްޑިންގްސްއަށް ދިންކަން ސިވިލް ކޯޓުގެ ހުކުމަކާއެކު ވަނީ ފެންމަތިވެފައެވެ. 

އެކަމާއި ގުޅިގެން އެޗްޑީސީގެ މެނޭޖިން ޑިރެކްޓަރު އަހުމަދު އާތިފު ވިދާޅުވީ، އެފްއޭއެމް އާއި އެޗްޑީސީއާ ދެމެދު ހަދާފައިވާ އެއްބަސްވުމުގެ ދަށުން އެއްވެސް ބަޔަކަށް ކޮމާޝަލް އުސޫލުން އެ ބިން ދޫނުކުރެވޭނެ ކަމަށެވެ. ނަމަވެސް އެފްއޭއެމުން ވަނީ އެ ބިމާ ގުޅިގެން އެއްބަސްވުމަށް ބަދަލުތަކެއް ހުށަހަޅާފައި ކަމަށް އޭނާ ވިދާޅުވި އެވެ.

Advertisement

އާތިފު ވިދާޅުވީ، މިކަން ބަލަމުން އަންނަ ކަމަށާއި ނަމަވެސް މިކަމުގައި އަދި ގޮތެއް ނުނިންމާ ކަމަށެވެ.

މާލީ މައްސަލަ ގަނޑެއްގެ ތެރޭގައި އޮތް އެފްއޭއެމާ ދެކޮޅަށް ޝަރީއަތުގައި އެތައް މައްސަލައެއް ހިނގަމުންދާއިރު، މުވައްޒަފުންނަށް މުސާރަ ނުދޭ މައްސަލަވެސްވަނީ ފެންމަތިވެފައެވެ.