އައްޑޫސިޓީ މަރަދޫ ދާއިރާގެ އެމްޑީޕީ މެންބަރު އިބްރާހީމް ޝަރީފް (މަވޯޓާ) ގެ މަންމަ އާއި އެ އާއިލާއަށް ނިސްބަތްވާ އިތުރު 6 މީހަކު ޕީޕީއެމަށް ސޮއިކޮށްފިއެވެ.
އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އައްޑޫ ސިޓީއަށް މިހާރު ކުރައްވަމުންދާ ދަތުރުފުޅުގައި އިއްޔެ މަރަދޫ-ފޭދޫއާއި މަރަދޫއަށް އަދި ހިތަދޫއަށް ވަޑައިގެންފައިވާއިރު، އެ ހުރިހާ ރަށަކުންވެސް ޕީޕީއެމާއި ގުޅުމު ފަރާތްތަކުގެ ފޯމާއި އެމަނިކުފާނު ވަނީ ހަވާލުވެވަޑައިގެންފައެވެ.
އެގޮތުން މަރަދޫއިން ޕީޕީއެމާއި ގުޅުނު މީހުންގެ ތެރެއިން މަވޯޓާ ޝަރީފްގެ އާއިލާއަށް ނިސްބަތްވާ 7 މީހުން ހިމެނޭ ކަމަށާ، އޭގެ ތެރޭގައި އޭނާގެ މަންމަވެސް ހިމެނޭ ކަމަށް ޕީޕީއެމުން މައުލޫތު ދެއެވެ.
މަވޯޓާ ޝަރީފްގެ މަންމަ އާއި އާއިލާ މެންބަރުން ޕީޕީއެމްއަށް ސޮއި ކުރި ނަމަވެސް މަވޯޓާ ޝަރީފަކީ ވެރިކަންކުރާ އެމްޑީޕީގެ މެންބަރެކެވެ. އަދި އޭނާ އަކީ ރައްޔިތުންގެ މަޖިލީހުގަޔާއި މީސް މީޑިއާ ގައިވެސް ރައީސް އިބްރާހިމް މުހައްމަދު ޞާލިހްގެ ދިފާއުގައި އެންމެ ވަރުގަދައަށް ވާހަކަދައްކަވާ އެއް މެންބަރެވެ.
އާދީއްތަ ދުވަހު، ރައީސް ޔާމީން އައްޑޫސިޓީ އަށް ކުރައްވާ ދަތުރުފުޅު ފައްޓަވާފައިވާއިރު، މިދަތުރު ފުޅުގައި އައްޑޫގެ ހުރިހާ ރަށަކަށް ވަޑައިގެން، އެ ސިޓީގެ ރައްޔިތުންނާއި ބައްދަލުކުރައްވައި، ރަށްރަށުގައި އޮތް ޕީޕީއެމްގެ ސްޓިއަރިން ކޮމެޓީތަކާއި، ކައުންސިލްތަކާއިވެސް ބައްދަލުކުރެއްވުމަށް ވަނީ ނިންމަވާފައެވެ.
Advertisement
This content is created and paid for by advertisers and does not involve Voice Journalists
