މާލޭގެ ބޮޑުތަކުރުފާނު މަގުން ސްޓެލްކޯއާ ދިމާލުން ފަޅައިގެން ދިޔަ ހޮޅީގެ މައްސަލަ ހައްލުކޮށްފައިވާ ކަމަށާއި ވީހާވެސް އަވަހަކަށް އެ މަގު ހުޅުވައިލާނެ ކަމަށް އެ ކުންފުނިން މިއަދު ބުނެފި އެވެ.
ސްޓެލްކޯ އިން މާލެ އަށް ކަރަންޓު ދޭން ބޭނުން ކުރާ ޕްލާންޓެއްގެ އިންޖީނުތަކުގެ ކޫލިން ސިސްޓަމުގައި ބޭނުންކުރާ އައުޓްފްލޯ ހޮޅިއެއް ފަޅައިގެން ގޮސް މަގަށް ލޮނު ލީކުވާ މައްސަލަ ހައްލުކުރުމުގެ މަސައްކަތް މިދިޔަ ހަފްތާގައި ފަށާފައިވާއިރު، އެކަން ރޭގެ ދަންވަރުގެ ވަގުތެއްގައި ހައްލު ކުރެވިފައިވާ ކަމަށް މެނޭޖިން ޑިރެކްޓަރު އަހުމަދު ޝަރީފު މިއަދު ވިދާޅުވިއެވެ.
ޝަރީފް އިތުރަށް ވިދާޅުވީ، އެ ހޮޅި ހެދުމަށް ކޮނެފައިވާ ވަޅު މިރޭ ބައްދައިލަން ކޮންކްރީޓު އަޅާނެ ކަމަށާ، އެއާއެކު ވީހާ ވެސް އަވަހަކަށް އެ މަގު އެއްކޮށް ހުޅުވައިލާނެ ކަމަށް ވިދާޅުވި އެވެ.
އެ މަސައްކަތް ދަންވަރު ކުރަނީ، މާލެ އަށް ހިދުމަތްދޭ އެއްވެސް ޖަނަރޭޓަރެއް ދުވާލު، ޕީކު ގަޑީގައި ނިއްވައިލެވެން ނެތުމުން ކަމަށްވެސް އޭނާ ވިދާޅުވިއެވެ.
އެ މައްސަލަ ދިމާވި ހިސާބުން ފެށިގެން ސްޓެލްކޯގެ އަމާޒަކަށް ވީ ކަރަންޓުގެ ހިދުމަތް މެދުކެނޑިޔަ ނުދީ ހައްލު ކުރުން ކަމަށް އެމްޑީ ވިދާޅުވި އެވެ.
"އެއްވެސް ހާލެއްގައި ސިޓީ ކައުންސިލަށް ބަދު ބަހެއް ބުނުމުގެ ބޭނުމެއް ނެތް. އަަދި ތިބޭފުޅުންނަށް ކަމެއް ނުކުރެވޭނެ ކަން ދެއްކުމުގެ ވިސްނުމެއް ވެސް ނެތް. އަޅުގަނޑުމެން ބޭނުން ވަނީ އަޅުގަނޑުމެން ކުރަން ބޭނުންވާ ކަންކަން ފުރިހަމަކޮށް، އެ ހިދުމަތް ދޭން" ޝަރީފު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
