އައްޑޫސިޓީ ހިތަދޫ ދެކުނު ދާއިރާގެ އެމްޑީޕީ މަޖިލިސް މެންބަރު އިބްރާހިމް ނާޒިލްގެ ކޮއްކޮވެސް ޕީޕީއެމަށް ސޮއިކޮށްފިއެވެ. 

އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އައްޑޫ ސިޓީއަށް މިހާރު ކުރައްވަމުންދާ ދަތުރުފުޅުގައި އައްޑޫ ސިޓީގެ މިހާތަނަށް ވަޑައިގެންފައިވާ ހުރިހާ ރަށަކުންވެސް ޕީޕީއެމާއި ގިނަ ފަރާތްތަކެއް ގުޅިފައިވާ ކަމަށް އިދިކޮޅުން ބުނެއެވެ. އަދި އެ ގުޅުނު ފަރާތްތަކުގެ ފޯމާއި އެމަނިކުފާނު ވަނީ ހަވާލުވެވަޑައިގެންފައެވެ. 

އެގޮތުން ޕީޕީއެމާއި ގުޅުނު މީހުންގެ ތެރޭގައި މެންބަރު ނާޒިލްގެ ކޮއްކޮ އާއި އެމްޑީޕީގައި އިސްކޮށް ހަރަކާތްތެރިވާ ނަސްލު ވެސް އެމްޑީޕީ ދޫކޮށް ޕީޕީއެމާއި ގުޅިފައިވާ ކަމަށް އެޕާޓީން ބުނެއެވެ. އަދި އެ އެންމެހާ ފަރާތްތަކަށް ޕީޕީއެމުން ވަނީ މަރުހަބާ ކިޔާފައެވެ. 

Advertisement

މެންބަރު ނާޒިލްގެ ކޮއްކޮ ޕީޕީއެމާއި ގުޅިފައިވާއިރު، އައްޑޫ ސިޓީ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ގެ މަންމަ އާއި އެ އާއިލާއަށް ނިސްބަތްވާ އިތުރު 6 މީހަކުވެސް އިއްޔެވަނީ ޕީޕީއެމާއި ގުޅިފައެވެ. 

އާދީއްތަ ދުވަހު، ރައީސް ޔާމީން އައްޑޫސިޓީ އަށް ކުރައްވާ ދަތުރުފުޅު ފައްޓަވާފައިވާއިރު، މިދަތުރު ފުޅުގައި އައްޑޫގެ ހުރިހާ ރަށަކަށް ވަޑައިގެން، އެ ސިޓީގެ ރައްޔިތުންނާއި ބައްދަލުކުރައްވައި، ރަށްރަށުގައި އޮތް ޕީޕީއެމްގެ ސްޓިއަރިން ކޮމެޓީތަކާއި، ކައުންސިލްތަކާއިވެސް ބައްދަލުކުރެއްވުމަށް ވަނީ ނިންމަވާފައެވެ.