މަސް ކިރުމަށްފަހު ފައިސާ ނުދީ ގިނަ ދުވަސްވަމުންދާތީ ހުރި ކަންބޮޑުވުންތަކާއެކު މާންދޫގައި މަސްވެރިން އިހުތިޖާޖުކުރަން ފަށައިފިއެވެ.
މި އިހުތިޖާޖުގައި ލ އަތޮޅާއި ތ އަތޮޅުގެ މަސްވެރިންގެ އިތުރުން ބ އަތޮޅުގެ ބަސްވެރިންވެސް ވަނީ ބައިވެރިވެފައެވެ.
މާންދޫ ފިޝަރީޒް ކޮމްޕްލެކްސް އަކީ ސަރުކާރު ކޯލިޝަން ޕާޓުނަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ވިލާ ކުންފުނީގެ ދަށުން ހިންގާ ހޮރައިޒަން ފިޝަރީސް ކުންފުންޏާއި ހަވާލުކޮށްގެން ހިނގާ ތަނެކެވެ.
ހޮރައިޒަނުން އެތަން ހިންގަން ފެށިފަހުން މަސްވެރިންނަށް ބޮޑެތި ތަކުލީފުތަކެއް އުފުލަން ޖެހިފައިވާކަމަށް "ވޮއިސް" އަށް މައުލޫމާތު ދިން މަސްވެރިއަކު ވަނީ ބުނެފައެވެ.
"މީގެ ކުރިން ޗައިނާ ކުންފުންޏަކުން އެތަން ހިންގީ. އޭރު 3 ދުވަސް ތެރޭ ބިލަށް ފައިސާ ޖަމާވެ. މިހާރު ބުނަނީ ބިލަށް ފައިސާ ޖަމާވާނީ 21 ދުވަސް ފަހުންކަމަށް. އެކަމަކު 21 ދުވަސް ފަހުން ބަލާއިރުވެސް ފައިސާ ޖަމާވެފައެއް ނުހުރޭ. ދެން ކިހެނެއް އަހަރުމެން އައިސް ގަންނަނީ، ތެޔޮ ގަންނަނީ. ގާސިމް ބުނާނެ އެތަން ހިންގޭވަރަށް ފައިސާ ނެތޯއޭ، އަހަރެން އަހަން ބޭނުން ގާނޫނަކުން ލާޒިމްކޮށްފަތޯ އޮންނަނީ އޭނާގެ މައްޗަށް ފައިދާ ނުވާ ވިޔަފާރިއެއް ހިންގަން؟"
އިހުތިޖާޖުގައި ބައިވެރިވި ތ އަތޮޅުގެ މަސްވެރިއެއް
އިތުރު މީހަކު ކިޔައިދިން ގޮތުގައި މާންދޫއިން ވަނީ މަސްވެރިންނަށް އައިސް ވިއްކުންވެސް ލިމިޓުކޮށްފައެވެ. އަދި އެތަނުން އެކަށީގެންވާ ވަރަށް ތެޔޮ ލިބެންވެސް ނުހުންނަކަން އެ ފަރާތުން ފާހަގަކޮށްފައެވެ.
މާންދޫގައި މަސްވެރިން އިހުތިޖާޖުކުރަން ފަށާފައިވާއިރު، ތިން އަތޮޅުގެ 14 މަސް ދޯނި މާންދޫގައި ފަޅުގައި އޮތްކަން ފާހަގަކޮށްލެވެއެވެ. އަދި ގިނަ އަދަދެއްގެ މަސްވެރިން ވަނީ މާންދޫއަށް އަރާ ބަނދަރު ސަރަހައްދުގައި އަޑުއުފުލާފައެވެ.
މަސްވެރިންނަށް ސަރުކާރުން ވީ ވައުދުތައް ފުއްދާ، މަސްވެރިން ބާނާ މަސްކޮޅަށް ފައިސާ ދެއްކޭވެ މެނޭޖުމަންޓަކާއި މާންދޫ ފިޝަރީޒް ކޮމްޕްލެކްސް ހަވާލުކުރުމަށްވެސް މަސްވެރިން ވަނީ ގޮވާލާފައެވެ.
Advertisement
This content is created and paid for by advertisers and does not involve Voice Journalists
