ޗާގޯސްއަކީ ރާއްޖޭގެ ތަނެއްކަމަށް ކަނޑައެޅުމަށް ލިބުނު އެންމެ ފަހު ފުރުޞަތު ގެއްލުވާލީ ކުރީގެ ރައީސް ޔާމީންގެ ސަރުކާރުންކަމަށް ވިދާޅުވެ އެ މައްސަލާގައި ކުށްވެރި ވަނީ އެ ސަރުކާރުކަން ސާބިތު ކުރައްވަނ ފޮރިން މިނިސްޓަރު ޝާހިދު މަސައްކަތް ކުރައްވައިފިއެވެ.

ރާއްޖެއާއި ޗާގޯސްގެ ކަނޑުގެ ސަރަހައްދު ފުށުއަރާ މައްސަލައާއި ގުޅޭގޮތުން މަޢުލޫމާތު ހިއްސާކުރުމަށް ރޭ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝާހިދު ވިދާޅުވީ، މިހާތަނަށް ރާއްޖޭގައި އެކުލަވާލެވުނު އެއްވެސް ޤާނޫނު އަސާސީއެއްގައި އެއްވެސް އިރެއްގައި ޗާގޯސްއަކީ ރާއްޖޭގެ ސިޔާދަތީ ބާރު ހިމެނޭ ރަށްތަކެއްކަމަށް ކަނޑައަޅަފައި ނުވާކަމަށެވެ.

އެގޮތުން 1932ގައި ރާއްޖޭގެ ފުރަތަމަ ޤާނޫނު އަސާސީ އެކުލަވާލެވުނު ތާރީޚުން ފެށިގެން މިހާރު ޢަމަލުކުރެވެމުން އަންނަ ޤާނޫނު އަސާސީއާއި ދެމެދު އެކުލަވާލެވުނު އެއްވެސް ޤާނޫނު އަސާސީއެއްގައި ޗާގޯސްއަކީ ރާއްޖޭގެ ސަރަހައްދެއްކަން އެއްވެސް ވަރަކަށް ބަޔާންކޮށްފައި ނުވާކަމަށްވެސް ޝާހިދު ވިދާޅުވިއެވެ. 

Advertisement

ޝާހިދު އިތުރަށް ވިދާޅުވީ، 2017 މޮރީޝަސް ސަރުކާރުން، ޗާގޯސްއަކީ މޮރީޝަސްގެ ބާރު ހިނގާ ތަނެއްކަމަށާއި، އެތަނުގައި ތިބި މީހުން ގަދަބާރުން ބާލުވާފައިވާކަމަށާ، ވުމާއެކު އެތަނުގެ އަސްލު ވަޒަންވެރިން އެތަނަށް ގެނެސް ޗާގޯސް މޮރީޝަސްއާއި ހަވާލުކުރުމަށް އެދި އދއަށް ޤަރާރެއް ހުށައެޅިކަމަށެވެ. 

މޮރިޝަސް ގެ އެ ގަރާރަށް ރާއްޖެއިން ވޯޓު ދިނީ ދެކޮޅަށްކަމަށާއި، އެ ވޯޓު އދ.ގައި ފާސްވިއިރު، ރާއްޖެއާއި ދެކޮޅަށްފާސްވީ 95 ޤައުމުން ތާޢީުދކޮށް 15 ޤައުމުން ދެކޮޅު ހަދައިގެންނެވެ. އަދި 65 ޤައުމަކަށުން ވަކި ކޮޅަކަށް ވޯޓު ދީފައިނުވާކަމަށްވެސް އޭނާ ވިދާޅުވިއެވެ. 

މިއާއެކު ޝާހިދު ވިދާޅުވީ އެ މައްސަލަ އިސްތިއުނާފްކުރުމަށް އިންޓަރނޭޝަނަލް ކޯޓު އޮފް ޖަސްޓިސްއަށް ހުށައެޅުމުގެ ފުރުޞަތު އޭރުގެ ސަރުކާރަށް ލިބުނުކަަމަށާ، އެހެންނަމަވެސް އެކަން ނުކުރައްވައި އެ ސަރުކާރުން ހަނު ހުންނެވީކަމަށެވެ. އެހެންކަމުން ޗާގޯސްއަކީ ރާއްޖޭގެ ބައެއްކަމަށް ހަދަން ލިބުނު އެންމެފަހުގެ ފުރުޞަތު ގެއްލުވާލީ ރައީސް ޔާމީންގެ ސަރުކާރުންކަމަށްވެސް ޝާހިދު ވިދާޅުވިއެވެ.

"ރައީސް ޔާމީން ހިތުގެ އަޑިން ދައްކާ ވާހަކާގައި އިޚްލާސްތެރިކަމެއް އޮތްނަމަ އިންޓަރނޭޝަނަލް ކޯޓަށް ވަޑައިގަންނަވާނެ. ނަމަވެސް އެ އެއްވެސްކަމެއް ނުކުރައްވާ. އޭރުވެސް މިއީ ރާއްޖޭގެ ތަނެއްކަމަށް ޤަބޫލެއްނުކުރައްވާ. އޭރު އެ ފުރުޞަތު އެ ގެއްލުނީ." މިނިސްޓަރ ޝާހިދު ވިދާޅުވިއެވެ.

މީގެ އިތުރުން ޝާހިދު ވިދާޅުވީ، މިހާރު ބައެއް ފަރާތްތަކުން ޗާގޮސް އަކީ ރާއްޖެއިން ބައެއް ކަމަށް ބުނެ ދައްކަމުންދާ ވާހަކަތައް ބިނާވެފައިވަނީ ހަސަން ރަސްގެފާނު ލިޔުއްވާފައިވާ ސިޓީއެއްގެ މައްޗަށް ކަމަށެވެ. އެހެން ނަމަވެސް ހަސަން ރަސްގެފާނު އެ ސިޓީ ލިޔުއްވީ ދިވެހިރާއްޖެ ޕޯޗުގީޒުންގެ އަޅުވެތިކަމުގައި ޖެއްސުމަށް މަސައްކަތް ކުރައްވަމުންކަމަށާއި އެހެންކަމުން އެ ވާހަކަތަކަކީ އަސާސެއް ނެތް ވާހަކަތަކެއް ކަމަށް އެނާ ފާހަގަކުރެއްވިއެވެ.