މަސްވެރިކަމުގެ ސިނާއަތް ފަނަރަ އަހަރު ދުވަހުގެ ތެރޭގައި އުވިގެންދާނެ ކަމަށް ގަބޫލު ކުރައްވާ ކަމަށް އިކޮނަމިކް މިނިސްޓަރު ފައްޔާޒު އިސްމާއިލް ވިދާޅުވި ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ. 

ރައީސް ޔާމީން އައްޑު އަތޮޅަށް ކުރެއްވާ ދަތުރުފުޅުގެ ތެރެއިން މަރަދޫއަށް ވަޑައިގެން އެރަށު ޒުވާނުންނާއި ވާހަކަދައްކަވަމުން ވިދާޅުވީ، ރާއްޖޭގެ މަސްވެރިކަން އެންމެ ރަނގަޅު އެއް ރަށް ކަމަށްވާ އިހަވަންދޫގެ ކައުންސިލުން މަސްވެރިކަމާއި ގުޅޭގޮތުން ކަންބޮޑުވުންފާޅުކޮށް މިނިސްޓަރު ފައްޔާޒުގެ އަރިހަށް ވަޑައިގެންނެވި ކަމަށެވެ. 

މިއާއެކު ރައީސް ޔާމީން ވަނީ، މަސްވެރިކަމާއި މެދު އެފަދަ ދަށު ދަރަޖައިގައި ވިސްނާ ބަޔަކު މަސްވެރިކަން ކުރިއަރުވަން މަސައްކަތް ކުރައްވަނީ ކީއްކުރަންތޯ ސުވާލު ކުރައްވާފައެވެ. 

ވުމާއެކު އެ ވާހަކައަށް އެކަނި ވިސްނާލުނަށްފަހު، މަސްވެރިކަމާއި ގުޅިގެން ރައީސް ޔާމީން ދައްކަވާ ވާހަކައާއި އެވާހަކައާއި އަޅައި ކިރާލުމުންވެސް މަސްވެރިންނަށް ހެޔޮގޮތް އެދޭ ފަރާތް އެނގޭނެކަމަށް ޔާމީން ވިދާޅުވިއެވެ. އެހެނީ، އެއް ކޮޅުން 15 އަހަރުތެރޭގައި މަސްވެރިކަން ނެތި، މަހުގެ ޕްރޮޑަކްޓްތައް ނުވިކޭނެ ކަމަށް ބުނާއިރު، އެމަނިކުފާނު ވިދާޅުވަނީ، އަދިވެސް ދިވެހިރާއްޖޭގެ އިގްތިސާދުގެ މައި ތަނބަކީ މަސްވެރިކަން ކަމަށް ޔާމީން ވިދާޅުވިއެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ވަޑައިގެންނެވީ މަސްވެރިންނަށް ވަރަށް ގިނަ ވައުދުތައް ވެވަޑައިގެންފައެވެ. އެގޮތުން، ބާނާ މަސް ކިރޭނެ ގޮތް ހަމަޖައްސައި، މަހަށް ހަމަ އަގު ހޯދައިދީ، ގޭދޮށު މަސްފެކްޓަރީ އެޅުން ހިމެނެއެވެ. އެހެންނަމަވެސް އެއިން އެއްވެސް ވައުދެއް މިހާތަނަށް ވެސް ނުފުއްދޭ ކަމަށް ބުނެ މަސްވެރިން އަންނަނީ ޝަކުވާކުރަމުންނެވެ.