ރޭ ދަންވަރު ހިނގައިދިޔަ ނުރައްކާތެރި އަލިފާނުގެ ހާދިސާ ހިނގި ސަރަހައްދުގައި އިންޑިއާގެ އެމްބަސީގެ ޓީމުން ހަރަކާތްތެރިވެއްޖެއެވެ. 

ރޭ ދަންވަރު މ. ނިރުފެހިގައި އަލިފާން ރޯވެ ހިނގި އަލިފާނުގެ ހާދިސާއައި ގުޅިގެން، އެތަނުގެ ހާލަތު ބަލައި އެނޫންވެސް އިތުރު މައުލޫމާތު އެއްކުރުމަށް އިންޑިއާގެ އެމްބަސީގެ ޓީމެއް ވަނީ އެ ސަރަހައްދުގައި ހަރަކާތްތެރިވެފައެވެ. އެގޮތުން އެ ސަރަހައްދުގައި ދިރިއުޅެމުންދިޔަ އެހެން ބިދޭސީން ކައިރިން އެ ޓީމުން ވަނީ މައުލޫމާތު ހޯދާފައެވެ. 

ރޭގެ ހާދިސާގައި 10 މީހުން ނިޔާވެފައި ވާއިރު އެމީހުންނަކީ ކޮން ގައުމަކަށް ނިސްބަތްވާ ބައެއްކަން އަދި ކަށަވަރުވެފައި ނުވާކަމަށް ކަމާބެހޭ އިދާރާތަކުން މައުލޫމާތު ދެއެވެ. އެހެންނަމަވެސް، އޭގެ ތެރޭގައި ލަންކާއާއި، ބަންގްލަދޭޝްގެ އިތުރުން އިންޑިއާ މީހުން ހިމެނޭނެ ކަމަށް މިހާތަނަށް ލިބުނު މައުލޫމާތުން ކަށަވަރުވާކަމަށް ރައީސް އިބްރާހިމް މުހައްމަދު ޞާލިހު ވަނީ ވިދާޅުވެފައެވެ.

Advertisement

ރޭ ހިނގި އަލިފާނުގެ ހާދިސާއާ ގުޅިގެން ސަރުކާރުގެ ކަމާގުޅޭ ފަރާތްތަކާއިއެކު ރައީސް ވަނީ މަޝްވަރާ ބައްދަލުވުމެއް ބާއްވަވާފައެވެ. 

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ މިހާދިސާއާ ގުޅޭ މަޢުލޫމާތު ވީހާވެސް ހާމަކަންބޮޑު ގޮތެއްގައި ފޯރުކޮށްދެމުން ގެންދިއުމަށާއި، ހާދިސާ ހިނގަން މެދުވެރިވި ސަބަބު އަވަހަށް ތަޙުޤީޤު ކުރެއްވުމަށާއި މި ހާދިސާގައި ނިޔާވި ފަރާތްތައް ދެނެގަތުމާއި، ޖަނާޒާގެ ކަންކަން ކުރިޔަށްގެންދިއުމާއި ގުޅޭގޮތުންނާއި މިހާދިސާއާ ގުޅިގެން ހާލުގައިޖެހިފައި ފަރާތްތަކަށް އެހީ ފޯރުކޮށްދިނުމުގެ މަސައްކަތް ކުރިޔަށްގެންދެވުމަށް ކަމާބެހޭ ފަރާތްތަކަށް އިރުޝާދު ދެއްވާފައެވެ.