ރޭ ދަންވަރު މ. ނިރުފެހިގައި އަލިފާން ރޯވެ ހިނގި އަލިފާނުގެ ހާދިސާގައި އަލިފާން ރޯވެފައިވާ ގަރާޖަކީ ހުއްދަނެތި ހިންގާ ތަނެއްކަން ހާމަވެއްޖެއެވެ.

"ވޮއިސް" އަށް ލިބިފައިވާ ކަށަވަރު މައުލޫމާތުތަކަށް ބަލާއިރު، މ. ނިރުފެހި ގޭގެ ތިރީގައި ވެހިކަލް މަރާމާތުކުރާ ވޯކްޝޮޕެއް ހެދުމަށް އެ ގަރާޖުން މާލެ ސިޓީ ކައުންސިލްގައި އެދިފައިވެއެވެ. އެގޮތުން 9 ފެބްރުއަރީ 2021 ވަނަ ދުވަހު ގަރާޖު ހިންގުމުގެ ހުއްދައަށް އެދި މާލެ ސިޓީކައުންސިލަށް ހުއްދަ ހޯދުމަށް ފޯމުލާފައިވެއެވެ.

މާލެ ސިޓީގައި ހިންގާ ގަރާޖު، ވޯކްޝޮޕް ގުދަނުގެ ހުއްދަ ދެމުން ގެންދާ ސިޓީކައުންސިލުން މ. ނިރުފެހިގައި ގަރާޖު ހެދުމުގެ ހުއްދަ ނުދެވޭނެކަމަށް ބުނެ ސިޓީއެއް ފޮނުވާފައިވެއެވެ.

Advertisement

އެގޮތުން އިޤްތިސާދީ މަސައްކަތްކުރާ ތަންތަން ހެދުމަށް ހުއްދަދިނުމާއި ހިންގުމުގެ ޤަވާއިދުގެ 1.1.1 ގައި މާލެ ގެ ދިރިއުޅުމަށް ދޫކުރުމަށް ދޫކުރެވޭ ގޯއްޗާއި، އެފަދަ ސަރަހައްދުތަކުގައި ވަޑާންގެ، ވޯކްސޮޕް އަދި ވެހިކަލް މަރާމާތުކުރާ ތަންތަން ހެދުމުގެ ހުއްދަ ދެވެން ނެތްވާހަކަ ސިޓީކައުންސިލްއިން ވަނީ އެފަރާތައް 10 ފެބްރުއަރީ 2021 ގައި އަންގާފައެވެ.

ގަރާޖު ހިންގާތާ ދެއަހަރުވެފައިވާނެކަމަށް ގަރާޖުގެ ވެރިޔާ މައުލޫމާތު ދީފައިވާއިރު، ސިޓީ ކައުންސިލްގެ ހުއްދަނެތި މިފަދަ ތަންތަން ރެޖިސްޓްރީ ނުކުރެވޭނެއެވެ. 

މާލެ ސިޓީގެ ގަރާޖުތައް މީހުން ދިރިނޫޅޭ ސަރަހައްދައް ބަދަލުކުރުމަށް ކުރީ ސަރުކާރުން މާލެ އިންޑަސްޓްރިއަލް ސަރަަހައްދު ހިއްކައި، އެމަކާއި ގުޅޭ އެއްބަސްވުންތަކާއި، ކުރެހުންތައް ވަނީ ނިންމާފައެވެ. ނަމަވެސް ސަރުކާރު ބަދަލުވުމާއެކު އެކަން ވަނީ މި ސަރުކާރުން ކެންސަލްކޮށް އެ ސަރަހައްދުގެ ޕްލޭން ބަދަލުކުރަން ނިންމާފައެވެ. 

މިކަމާއި ގުޅިގެން މާލެ ސިޓީގެ ހުޅުމާލެ ދާއިރާގެ ކައުންސިލް މެންބަރު ވިދާޅުވީ ންޑަސްޓްރިއަލް ވިލެޖު ކައުންސިލުގެ ދަށުން ފޭރިގަތީ މި ސަރުކާރުންކަމަށާއި، މާލެ ސިޓީގެ ކަމިކަލް ގުދަނެއް ރޯވެ އަލިފާނުގެ ހާދިސާއެއް ހިނގިތާ މާދުވަހެއް ނުވޭ.ސަރުކާރުން އިންޑަސްޓްރިއަލް ވިލެޖު ފޭރި ނުގަތް ނަމަ ގުދަންތަކާއި ކެމިކަލް ގަރާޖުތައް އެތަނަށް މާލެ ސިޓީ ކައުންސިލުން ބަދަލުކުރާނެކަމަށެވެ.

ރޭ ހިނގި އަލިފާނުގެ ހާދިސާއަކީ ރާއްޖޭގައި މިހާތަނައް ހިނގި އެންމެ ހިތާމަވެރި އަލިފާނުގެ ހާދިސާއެވެ. މިހާތަނަށް 10 މީހުން ނިޔާވެފައިވާއިރު، އޭގެ ތެރޭގައި ލަންކާއާއި، ބަންގްލަދޭޝްގެ އިތުރުން އިންޑިއާ މީހުން ހިމެނޭނެ ކަމަށް މިހާތަނަށް ލިބުނު މައުލޫމާތުން ކަށަވަރުވާކަމަށް ރައީސް އިބްރާހިމް މުހައްމަދު ޞާލިހު ވަނީ ވިދާޅުވެފައެވެ.