ﷲ ގެ ރުއްސެވުން އެކަމެއްގައި ނެތް އެއްވެސް ކަމަކުން ހިތްހަމަޖެހުމެއް ނުލިބޭނެ ކަމަށާއި، އެކަމުން ހިތްހަމަޖެހުން ލިބޭ ކަމަށް ހީވި ނަމަވެސް އެއީ ހަގީގީ ހިތްހަމަޖެހުމެއް ނޫން ކަމަށް ޖަމިއްޔަތުއްސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ވިދާޅުވެއްޖެެއެވެ.
ޢަލީ ރަމީޒު މިފަދައިން ވިދާޅުވީ، ށ. މާއުނގޫދޫގައި ބޭއްވި ޢަލީ ރަމީޒާއެކު އިވެންޓްގައި ވާހަކަދައްކަވަމުންނެވެ. މި އިވެންޓްގައި ޢަލީ ރަމީޒުގެ ހަޔާތާއި ގުޅޭ ގިނަ ވާހަކަތަކެއް އޭނާ ކިޔައިދީފައިވާއިރު، އިވެންޓަށް ހާޒިރުވެ ތިބި މީހުންގެ ސުވާލުތަކަށްވެސް އޭނާ ވަނީ ޖަވާބުދެއްވާފައެވެ.
އެގޮތުން، ލަވައާއި މިއުޒިކާއި ގުޅިގެން ކުރިމަތިވި ސުވާލު ތަކަށް ޖަވާބު ދެއްވަމުން ޢަލީ ރަމީޒު ވިދާޅުވީ، ﷲ ގެ ރުއްސެވުން ނެތް ކޮންމެ ކަމަކުން ލިބޭނީ ހިތްދަތި ކަމާއި މާޔޫސް ކަންކަމަށާއި، މިއުޒިކް އަޑު އަހައިގެން ހިތްހަމަޖެހުން ލިބޭ ކަމަށް ހީވި ނަމަވެސް އެއީ ހަގީގީ ހިތްހަމަޖެހުން ނޫން ކަމަށެވެ. އަދި ހަގީގީ ހިތްހަމަޖެހުން ލިބޭނެ ގޮތް ކީރިތި ޤުރުއާނުގައި ބަޔާން ކުރައްވާފައިވާކަން ފާހަގަކުރައްވައި އޭނާ ވަނީ އެ އާޔަތް އެހުންތެރިންނަށް އިއްވާފައެވެ.
މާއުނގޫދޫ ގިނަ ރައްޔިތުން ހާޒިރުވި އެ އިވެންޓްގައި ޢަލީ ރަމީޒުވަނީ އޭނާގެ ހަޔާތުގައި ދިމާވި އެތައް ހިތްދަތި ކަންތައްތަކެއް ކިޔައިދީފައެވެ. އޭގެ އިތުރުން މިއުޒިކް ގެ ހަޔާތުގައި ކުރިމަތިވި ގިނަ ހާދިސާތަކެއްވެސް މި އިވެންޓް ގެ ތެރެއިން އަލީ ރަމީޒު ވަނީ ހިއްސާ ކުރައްވާފައެވެ. އެވާހަކަތަކުން ޒުވާނުންނަށް މުހިންމު މެސެޖުތަކެއް ފޯރުކޮށްދެއްވާފައިވެއެވެ.
މާއުނގޫދޫގައި ކުރިއަށް ދިޔަ "ޢަލީ ރަމީޒާއެކު" އިވެންޓްގެ ތެރެއިން-- ފޮޓޯ: ޖަމިއްޔަތުއްސަލަފް
ލަވައިގެ ދުނިޔޭގެ ވަރަށް ބޮޑު މަޝްހޫރު ކަމެއް ލިބިފައިވަނިކޮށް އަލީ ރަމީޒު ލަވަކިޔުން ހުއްޓާލީ އެއީ ދީނީ ގޮތުން ހުއްދަ ކަމަކަށް ނުވާތީ އެވެ. އޭގެ ފަހުން މިދިޔަ ދުވަސްތަކުގައި އަލީގެ ގިނަ ވަގުތުތައް ހޭދަކޮށްފައިވަނީ ދައުވަތުގެ މައިދާނުގައެވެ. އިލްމުވެރިންނާއެކު ރާއްޖޭގެ ވަރަށް ގިނަ ރަށްރަށަށް ދަތުރުކޮށްފައިވެއެވެ. "އަލީ ރަމީޒާއެކު" ސިލްސިލާ ޕްރަގްރާމްތަކަކީ އޭނާއަށް ހިދާޔަތުގެ އަލިކަން ލިބުނު ގޮތާއި ކުރީން އޮތް ބޮޑު މަޝްހޫރު ކަމުގައި ދިރިއުޅުން ހޭދަކުރި ގޮތް އާންމުންނާއި ހިއްސާކުރުމަށް ބާއްވާ ޕްރަގްރާމްތަކެކެވެ. އެ ޕްރަގްރާމްތަކުގެ ސަބަބުން އެތައް ބަޔެއްގެ ދިރިއުޅުން ރަނގަޅު ކުރުމަށް ފުރުސަތު ފަހިވެގެން ދެއެވެ.
Advertisement
This content is created and paid for by advertisers and does not involve Voice Journalists
