އައްޑޫ ސިޓީ، ހިތަދޫ ބައެއް ގޭގޭ ބޭރު ފާރުގައި "އިންޑިއާ އައުޓް" ޖަހައިފިއެވެ. 

ދިވެހިރާއްޖޭއިން އިންޑިއާ ސިފައިން ބޭލުމަށް އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތް މަޑު ޖެހިލާފައި އޮތުމަށްފަހު ހިތަދޫ ގިނަ އަދަދެއްގެ ގޭގޭގެ ބޭރު ފާރުގައި ވަނީ އިންޑިއާ އައުޓް ސްޕްރޭކޮށްފައެވެ.

ހިތަދޫ ގެއެއްގެ ބޭރުގައި އިންޑިއާ އައުޓް ލިޔެފައި

ހިތަދޫ ގޭގޭގެ ފާރުގައި އިންޑިއާ އައުޓް ލިޔެފައިވާއިރު، އިދިކޮޅު ރިޔާސީ ކެންޑިޑޭޓް އައްޑޫސިޓީ ކުރައްވަމުންދާ ދަތުރުފުޅުގައި ފާއިތުވި ހަފްތާ ތެރޭގައި ވަނީ އެރަށަށް ވަޑައިގެންފައިވާކަން ފާހަގަކޮށްލަންޖެހެއެވެ. އަދި އެމަނިކުފާނުގެ އައްޑޫ ސިޓީ ދަތުރުފުޅުގަޔާއި ކެންޕެއިނަށް މީގެ ކުރިން ޒިޔާރަތްކުރި ގިނަ ރަށްރަށުގައި ބޭއްވި ޖަލްސާ ތަކުގައިވެސް އެމަނިކުފާނު ވަނީ ރާއްޖޭގައި އިންޑިއާ ސިފައިން ތިބުމާއި ދެކޮޅަށް އަޑު އުފުލައި އެކަމާއި ގުޅިގެން ނުރުހުން ފާޅުކުރައްވާފައެވެ. 

އައްޑޫ ހިތަދޫ ފާރުތަކުގައި އިންޑިއާ އައުޓް ޖަހާފައި މިވަނީ ރައީސް ޔާމީން އެ އަތޮޅަށް ކުރެއްވި ދަތުރުފުޅު ނިންމަވާލެއްވިތަނާކަން ފާހަގަކޮށްލަންޖެހެއެވެ. 

ހިތަދޫ ގެއެއްގެ ބޭރުގައި އިންޑިއާ އައުޓް ލިޔެފައި

އަދި އައްޑޫ ސިޓީގައި އިންޑިއާ އައުޓް ޖެހި ތަންތަނުގެ ތެރޭގައި އައްޑޫ ސިޓީ ކައުންސިލް އިދާރާގެ ފާާރާއި، އައްްޑޫ ސިޓީގައި ހުންނަ ރައީސް މުހައްމަދު ނަޝީދުގެ އޮފީހުގެ ފާރުވެސް ހިމެނޭ ކަމަށް މައުލޫމާތު ލިބިފައިވެއެވެ. 

ރައީސް ނަޝީދުގެ އޮފީސް ބޭރު އިންޑިއާ އައުޓް ޖަހައިފައި : ފޮޓޯ/އައްޑޫ ލައިވް

އިންޑިއާ އައުޓް ހަރަކާތް ވަރަށް ފޯރީގައި ކުރިއަށް ގެންދިޔުމަށްފަހުއެ ހަރަކާތް މަޑުޖެހުނީ އެއީ ގައުމީ ސަލާމަތަށް ނުރައްކާވާ ހަރަކާތެއް ކަމަށް ވިދާޅުވެ އެކަން ހުއްޓުވުމަށް ދައުލަތުގެ އެންމެހާ މުއައްސަސާތަކަށް ގޮވާލައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގަރާރެއް ނެރުއްވުމާއި ގުޅިިގެންނެވެ. ރައީސް ޞާލިހުގެ މި ގާރާރު ނެރުއްވުމާއި އެކު، އޭރު ރައީސް ޔާމީންގެ ގެކޮޅާއި ޕީޕީއެމްގެ އޮފީސް ބޭރުގައި ދަމާފައިވާ އިންޑިއާ އައުޓް ބެނާ ފުލުހުން ވަނީ ނައްޓާފައެވެ.

ރައީސް ޞާލިހުގެ މި ގަރާރަކީ ގާނޫނާއި ހިލާފު ގަރާރެއް ކަމަށް ބުނެ އިދިކޮޅުން އެ މައްސަލަ ކޯޓަށް ހުށަހަޅާފައިވާއިރު، އޭގެ ފަހުން މިހަރަކާތް އިދިކޮޅުން ކުރިއަށް ގެންދަމުންދަނީ ނުސީދާކޮށް އެ މާނަ ދޭހަވާ ފަދަ ގޮތަކަށެވެ. އެހެންނަމަވެސް، އެގޮތުން، ދެމި ބެނާތަކާއި ދިދަތައް ވެސް ފުލުހުން ވަނީ ނައްޓާފައެވެ.