މޯލްޑިވްސް މަނިޓަރީ އޮތޯރިޓީން މިދިޔަ އަހަރު ގާއިމުކުރަން ފެށި އޮންލައިން ޕޭމަންޓު ސިސްޓަމް އާއްމުކޮށް ބޭނުން ކުރުމަށް ހުޅުވާލުން އަނެއްކާވެސް ފަސްކޮށްފިއެވެ. މިއީ މިގޮތަށް ފަސްކުރި ހަތަރުވަނަ ފަހަރެވެ. 

އެކަމާއި ގުޅިގެން ރާއްޖޭގެ އޮންލައިން ނޫހަކުން ކުރި ސުވާލަކަށް ޖަވާބުދެއްވަމުން އެމްއެމްއޭގެ ތަރުޖަމާނު މުހައްމަދު ނާސިހު ވިދާޅުވީ އަދިވެސް އެ ސިސްޓަމް ފުރިހަމަވެ ނުނިމޭ ކަމަށާއި މިހާރު ކުރިއަށްދަނީ ބޭންކުތަކާއެކު ހަދަންޖެހޭ ޓެސްޓުތަކުގެ މަސައްކަތް ކަމަށެވެ. ލަފާ ކުރެވޭ ގޮތުގައި އެ ހިދުމަތް ބޭނުން ކުރަން ފެށޭނީ އަންނަ އަހަރުކަމަށް އޭނާ ވިދާޅުވިއެވެ. 

އާ ޕޭމަންޓު ސިސްޓަމެއް އެމްއެމްއޭއިން ތައާރަފްކުރީ އޮންލައިންކޮށް ވިޔަފާރިކުރުމުގައި އާއްމުންނަށް ލުއިފަސޭހަތަކެއް ހޯދައިދިނުމުގެ މަގުސަދުގައެވެ. އެ ސިސްޓަމް ގާއިމުކުރުމުގެ މަސައްކަތް މިދިޔަ އަހަރު ފަށާފައިވާއިރު އެމްއެމްއޭއިން މީގެ ކުރިން ބުނީ އެ ސިސްޓަމް އެ އަހަރުގެ ފަހުކޮޅު އާއްމުކޮށް ބޭނުން ކުރަން ފެށާނެ ކަމަށެވެ.

Advertisement

އެހެން ނަމަވެސް އެކަން އެ މުއްދަތުގެ ތެރޭގައި ނިންމާލެވިފައި ނުވާއިރު، ދެން އެ ސިސްޓަމް އާއްމުކުރެވޭނީ އަންނަ އަހަރުގެ ފެބްރުއަރީ ހިސާބުގައިކަމަށް އެމްއެމްއޭއިން ވަނީ ބުނެފައެވެ. އެ ތާރީހުގައި ވެސް އެކަން ނުކުރެވި އެ އޮތޯރިޓީން ވަނީ މިއަހަރު ފަހުކޮޅު އެ ސިސްޓަމްގެ ހިދުމަތް އާއްމުންނަށް ދޭން ފަށާނެ ކަމަށް ބުނެ އެ ސިސްޓަމް އާއްމުކޮށް ބޭނުން ކުރުން ފަސްކޮށްފައެވެ.

ޕޭމަންޓު ސިސްޓަމާއި ޕޭމަންޓު ހިދުމަތުގެ ބިލަށް 2020 ވަނަ އަހަރު ރައްޔިތުންގެ މަޖިލީހުގައި ބަހުސް ކުރި އިރު، މަޖިލީހުގެ ތަޅުމުގައި ވެސް އެ މަޖިލީހުގެ މެމްބަރުން އެކަމުގެ ހުރި ކަންބޮޑުވުންތައް ވަނީ ފާޅުކޮށްފައެވެ.