ނިމިގެން މިދާ ރިޔާސީ ދައުރަކީ ފެހި ޤާނޫނުއަސާސީގައި ރާއްޖެ ދެކޭ ސިޔާސީ ހަލަބޮލިކަން އެންމެ ކުޑަ ދުވަސްވަރު ކަމަށް މިނިސްޓަރ އޮފް ސްޓޭޓް ފޮރ ހޯމްއެފެއަރޒް އަލީ ނަޒީރު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވީ ރަސްމީ ޖަލްސާގައި ވާހަކަ ދައްކަވަމުންނެވެ.
ސްޓޭޓް މިނިސްޓަރ ވިދާޅުވީ ވޭތުވެދިޔަ 4 އަހަރު ރާއްޖޭގައި ސިޔާސީ ހަލަބޮލިކަން ކުޑަވެފައި ވަނީ ވިސްނުންތަކަކާއި ފިކުރުތަކަކާއި ޚިޔާލު ތަކެއްގެ ނަތީޖާ ކަމަށާއި އެއީ ކާމިޔާބު ލީޑަރޝިޕެއްގެ ހެޔޮ އަސަރު ކަމަށެވެ.
އަދި ކަތިވަމުންދިޔަ ދިވެހިރާއްޖޭގެ ޖުމްހޫރިއްޔާގެ މިސްރާބު ދިވެހިން އެދޭ ގޮތަށް، ވަކިން ޚާއްސަކޮށް ދިވެހި ޒުވާނުންގެ ވިންދާ އެއްގޮތަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ޒަޢާމަތުގައި ބަދަލުވަމުންދާ ކަމުގެ އިޙްސާސް ކުރެވޭ ކަން އެނާ ފާހަގަކުރެއްވިއެވެ.
"މިއަދުގެ ޒުވާން ޖީލު އޮތީ ދުނިޔެއަށް ލޯ ހުޅުވި، ދުނިޔޭގެ އާޖުފާޖަށް ރޯފިލާފާކަން ގަބޫލު ކުރަންޖެހޭ ކަމަށާއި އުފެދި ބޮޑުވަމުން އަންނަ ޒުވާން ޖީލުގެ ވިސްނުމަކީ މިރާއްޖޭގައި ހަމަޖެހުމާއި ސުލްހަވެރިކަން ޤަރާރުވެފައި އޮތުން. އަދި ޒުވާން ޖީލު އެދެނީ ދެމެހެއްޓެނިވި މަގުން ކަންކަން ރާވައި އިންތިޒާމު ކުރުމާއެކު މިރާއްޖޭގެ އިޖުތިމާއީ މައްސަލަތައް ޙައްލުވެފައި އޮތުމާއި އިޤްތިސާދީ ނަހަމަކަން ކުޑަވުން."
ސްޓޭޓް މިނިސްޓަރ އަލީ ނަޒީރު
ސްޓޭޓް މިނިސްޓަރ އަލީ ނަޒީރު ވިދާޅުވީ އެކަންކަން ޙާސިލް ކުރުމަށްޓަކައި ކޮންމެހެން ކުރަންޖެހޭ ކަމަކީ ސިޔާސީ ހަމަޖެހުން މިރާއްޖޭގައި ޤާއިމްވެ ގަރާރުވެފައި އޮތުމާއެކު ސުލްޙަވެރި ސިޔާސީ ހަރަކާތް ހިންގަން މަގުފަހިވެފައި އޮތުން ކަމަށެވެ.
އެއްވެސް ހިފެހެއްޓުމެއް ނެތް މިންވަރަށް ސުލްޙަވެރި ސިޔާސީ ހަރަކާތް ހިންގުމުގެ މާހައުލެއް ގާއިމްވެފައި އޮތުމާއެކުވެސް ނިމިގެންމިދާ ރިޔާސީ ދައުރަކީ ފެހި ޤާނޫނުއަސާސީގެ ހަޔާތުގައި މިރާއްޖެ ދެކޭ އެންމެ ސިޔާސީ ހަލަބޮލިކަން ކުޑަ ދުވަސްވަރުކަން އެއީ ދެބަސްވެވެން ނެތް ހަގީގަތެއް ކަމަށްވެސް މިނިސްޓަރ އޮފް ސްޓޭޓް ފޮރ ހޯމްއެފެއަރޒް އަލީ ނަޒީރު ވިދާޅުވިއެވެ.
ދިވެހި ޖުމްހޫރީ ޙަޔާތުގެ މައްޗަށް އަލިއަޅުއްވާލައްވަމުން ސްޓޭޓް މިނިސްޓަރ ވިދާޅުވީ ރާއްޖޭގެ ފުރަތަމަ ޖުމްހޫރިއްޔާ އުވުނުތާ 15 ވަރަކަށް އަހަރު ފަހުން އަލުން އަނބުރާ ޖުމްހޫރިއްޔަތަކަށް ރާއްޖެ ބަދަލުވެގެން ދިއުމުން ދަސްކުރަންޖެހޭ އެންމެ މުހިންމު ފިލާވަޅަކީ ދިވެހިންގެ ކަންކަން ދިވެހިން އަމިއްލައަށް ނިންމައި، ދިވެހިން އެދޭ ގޮތް ނޫން ގޮތަކަށް މި ރާއްޖޭގައި ވެރިކަން ހިންގަން ދިވެހިން ފުރުސަތު ނުދޭނެ ކަންކަމަށެވެ.
Advertisement
This content is created and paid for by advertisers and does not involve Voice Journalists
