ސަރުކާރު ހިންގާ މައި ޕާޓީ އެމްޑީޕީގެ އެތެރޭގައި އުފެދިފައިވާ ދެ ފެކްޝަންގެ ކޯޓުން ބޮޑުވެ އަރާރުންވުންތައް ގިނަވުމާއި ގުޅިގެން އެޕާޓީގެ އޮފިޝަލް ވަޓްސްއެޕް ގުރޫޕަށް މެސެޖު ނުކުރެވޭގޮތް ހަދައިފިއެވެ. 

މިފަހަކަށް އައިިސް އެމްޑީޕީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއަށް ތާއީދު ކުރައްވާ މެމްބަރުންނާއި އެމްޑީޕީގެ ލީޑަރު އަދި މަޖިލީހުގެ ރައީސް މުހައްމަދު ނަޝީދަށް ތާއީދު ކުރައްވާ މެމްބަރުންގެ މެދުގައި ސަރުކާރުގެ ސިޔާސަތުތަކާއި ގުޅިގެން ޚިޔާލު ތަފާތުވުންތައް ބޮޑެވެ ހޫނު ބަހުގެ ހަމަލާތަކެއް ވަނީ ރައްދުކުރަން ފަށާފައެވެ. 

ނިމުނު ހަފްތާ ރައްޔިތުންގެ މަޖިލީހުގައި އެމްޑީޕީގެ ދެ ފެކްޝަނުގެ މެމްބަރުން އެއްބަޔަކު އަނެއް ބައެއްގެ ބޮލުގައި ބޮޑެތި ބަދުނާމުތައް އަޅުވާ ބަހުގެ ހަމަލާތަކެއް ރައްދުކޮށްފައިވެއެވެ. 

މެމްބަރުންގެ މެދުގައި ބަދަލުކުރަމުން ދިޔަ ބަހުގެ ހަމަލާތައް ހޫނުވެފައިވަނީ ރައީސް އިބްރާހިމް މުހައްމަދު ސޯލިހުއަސް ދެވަނަ ދައުރެއް ދޭން ނުޖެހޭނެކަމަށް ވިދާޅުވެ ނަޝީދަށް ތާއީދު ކުރާ މެމްބަރުން މަޖިލީހުގައި ދެއްކެވި ވާހަކަތަކަށް ސޯލިހުއަށް ތާއީދުކުރައްވާ މެމްބަރުން ރައްދުދެއްވަން ފެށުމާއި ގުޅިގެންނެވެ. 

ސޯލިހަށް ތާއީދުކުރައްވާ މެމްބަރުން ވަނީ ސޯޝަލް މީޑިއާގެ އެކި މަންސަތަކުގައި ނަޝީދަށް ބޮޑެތި ފާޑުކިޔުންތަކެއް އަމާޒުކުރައްވާ ނަޝީދުގެ ވެރިކަމަށްވެސް ފާޑުކިޔުއްތައް އަމާޒުކުރައްވާފައެވެ. 

އެފަހުން ސޯޝަލް މީޑިއާގެ އެކި މަންސަތުގައި ދެ ފެކްޝަންގެ މެމްބަރުން ރައްދުކުރަމުން އައި ބަހުގެ ހަމަލާތައް ސީދާކޮށް އެމްޑީޕީގެ ވަޓްސްއަޕް ގްރޫޕާއި ހަމަޔަށް ފޯރާ އެ ގްރޫޕުގައިވެސް ދެ ފެކްޝަންގެ މެމްބަރުންގެ ޒުވާބުތައް ވަރަށް ބޮޑަށް ހޫނުވެގެން ގޮސްފައިވެއެވެ. 

އެންމެ ފަހުން، ދެ ފެކްޝަންގެ ކޯޅުން ބޮޑުވެ، ޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލްއަށް ޖެހިވަޑައިގަތީ، މިކަން ކޮންޓޯލްކުުރުމަށް ގްރޫޕަށް މެސެޖް ނުކުރެވޭ ގޮތް ހެއްދެވުމަށެވެ.

މައުލޫމާތު ލިބޭގޮތުގައި ޒުވާބު ބޮޑުވެ ގްރޫޕަށް މެސެޖު ނުކުރެވޭގޮތަށް ފައްޔާޒު ސެޓިން ބަދަލުކުރެއްވީ ރޭ ދަންވަރުގެ ވަގުތެއްގައެވެ. މިހާރު އެ ގްރޫޕަށް މެސެޖު ކުރެވޭނީ ހަމައެކަނި ގްރޫޕުގެ އެޑްމިންގެ ގޮތުގައި ތިއްބަވާ ފަރާތްތަކަށް އެކަންޏެވެ. 

ވަޓްސްއަޕް ގުރޫޕަށް މެސެޖު ނުކުރެވޭގޮތް ހެދި ނަމަވެސް ސޯޝަލް މީޑިއާގައި އަދިވެސް ދެ ފެކްޝަނުންގެ މެމްބަރުން ނުސީދާ ބަހުގެ ހަމަލާތަކެއް ރައްދުކުރަމުންދާކަން ފާހަގަކޮށްލެވެއެވެ.