ދުނިޔޭގެ ހުރިހާ ކަންކޮޅުތަކެއްގެ މީހުން ދިވެހިރާއްޖެ ދެކެ ވާ ލޯބި ވަރަށް ސާފުކޮށް ފެނިއްޖެ ކަމަށް އެމްއެމްޕީއާރުސީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވެއްޖެއެވެ.

ތޮއްޔިބު މިހެން ވިދާޅުވީ 29 ވަނަ ވޯލްޑް ޓްރެވަލް އެވޯޑްސްގައި ވޯލްޑްސް ލީޑިން ޓޫރިސްޓް ބޯޑް 2022ގެ މަގާމު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަނުން ކާމިޔާބުކުރުމާ ގުޅިގެންނެވެ.

އޮމާންގެ ރިޓްޒް ކާލްޓަންގެ ހޮޓެލެއްކަމުގައިވާ އަލް ބުސްތާން ޕެލަސްގައި ބޭއްވި ވޯލްޑް ޓްރެވަލް އެވޯޑްސް 2022ގެ ހަފްލާގައި ވާހަކަ ދައްކަވަމުން ތޮއްޔިބު ވިދާޅުވީ ދުނިޔޭގެ ލީޑިން ޑެސްޓިނޭޝަންގެ ލަގަބު ޖެހިޖެހިގެން ތިން އަހަރު ހޯދުމަކީ ހަގީގަތުގައި ވެސް ލިބުނު ޝަރަފެއް ކަމުގައެވެ.

Advertisement

މި އަހަރަކީ ދިވެހިރާއްޖޭގެ ފަތުރުވެރިކަމުގެ ރަން ޔޫބީލްކަމުން، އަޅުގަނޑުމެންގެ އައްސޭރިފަށަށް ފަތުރުވެރިންނަށް މަރުހަބާ ކިޔަންފެށިތާ 50 އަހަރު ފުރުން ފާހަގަކުރުމަށް މިއަށް ވުރެ ރަނގަޅު ކާމިޔާބީއެއް ނެތްކަމަށްވެސް ތޮއްޔިބު ވިދާޅުވިއެވެ.

އަދި މި އަހަރަކީ އެމްއެމްޕީއާރުސީން ދުނިޔޭގެ ލީޑިންގ ޓޫރިސްޓް ބޯޑުގެ ޝަރަފު ކާމިޔާބުކުރި ފުރަތަމަ އަހަރުކަމުން، ފާއިތުވި އަހަރުތަކުގައި ދުނިޔެއަށް ކުރިމަތިލާން ޖެހުނު އެކި އެކި ގޮންޖެހުންތައް ތަހައްމަލުކޮށް، އެމްއެމްޕީއާރުސީގެ ޓީމުން ކުރި ބުރަ މަސައްކަތުގެ އަގު ދުނިޔެއިން ވަޒަންކޮށްފައިވާކަން ތޮއްޔިބު ފާހަގަކުރެއްވިއެވެ.

މީގެއިތުރުން ޑަބްލިއުޓީއޭގައި ރާއްޖެއަށް އަދި އެމްއެމްޕީއާރުސީއަށް ވޯޓު ދެއްވި ހުރިހާ ބޭފުޅުންނަށް ޝުކުރު އަދާކުރައްވާ، ސަނީ ސައިޑް އޮފް ލައިފް އަށް މަރުހަބާ ކިޔާނެ ފުރުސަތު ލިބޭނެ ކަމަށް އުންމީދުކުރައްވާ ކަމަށްވެސް ތޮއްޔިބު ވިދާޅުވިއެވެ.

ރާއްޖޭގެ ތާރީޚުގައި ފުރަތަމަ ފަހަރަށް ވޯލްޑްސް ޓްރެވަލް އެވޯޑްސްގެ ލީޑިން ޓުއަރިސްޓް ބޯޑުގެ ޝަރަފް އެމްއެމްޕީއާރުސީން ހޯދާ، ދުނިޔޭގެ ފެންވަރުގައި މަންޒިލް މާކެޓްކުރުމަށް ކުރާ މަސައްކަތްތަށް މިވަނީ އައު ހަރުފަތަކަށް ގެންގޮސްފައެވެ.

29 ވަނަ ވޯލްޑް ޓްރެވަލް އެވޯޑްސްގައި ވޯލްޑްސް ލީޑިން ޓޫރިސްޓް ބޯޑް 2022ގެ މަގާމު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަނުން ކާމިޔާބުކޮށްފަވާއިރު މިއީ ރާއްޖޭގެ ތާރީޚުގައިވެސް ދުނިޔޭގެ އެންމެ ޝަރަފުވެރި ޓޫރިސްޓް ބޯޑުގެ މަގާމު އެމްއެމްޕީއާރުސީއިން ކާމިޔާބުކުރި ފުރަތަމަ ފަހަރެވެ.

މި އަހަރު ރާއްޖެއިން ވަނީ ޖެހިޖެހިގެން ތިންވަނަ ފަހަރަށް ޑަބްލިއުޓީއޭގެ އެންމެ ޝަރަފުވެރި އެވޯޑް ކަމުގައިވާ ދުނިޔޭގެ ލީޑިންގ ޑެސްޓިނޭޝަންގެ މަގާމު ވެސް ކާމިޔާބުކޮށްފައެވެ.

 މި އަހަރަކީ ދުނިޔޭގެ ފަތުރުވެރިކަމަށް ވަރަށް ގިނަ ބަދަލުތަކެއް އައިސްފައިވާ އަހަރެކެވެ. ކޮވިޑް-19އާ ގުޅިގެން ބޯޑަރުތައް ބަންދުކޮށްގެން ގިނަ ދުވަސްތަކަކަށް ފަހު ގިނަ ގައުމުތަކުން މިހާރު ވަނީ ބައިނަލްއަގްވާމީ ދަތުރުފަތުރަށް ބޯޑަރުތައް އަލުން ހުޅުވާލާފައެވެ.