އަމީނީމަގުގެ ދެވަނަ ސެގްމެންޓުގެ މަސައްކަތް ފެށުމަށް ވާންޖެހޭ ތައްޔާރިތައް ވަމުން އަންނަ ކަމަށް ރޯޑް ޑިވެލޮޕްމަންޓު ކޯޕަރޭޝަނުން ބުނެފިއެވެ.

އާރުޑީސީން ކުރި ޓްވީޓެއްގައި ވަނީ އަމީނީމަގު ސެގްމެންޓް އެކެއްގައި ތާރު އެޅުން ފިޔަވައި އެހެން މަސައްކަތްތައް މިހާރު ވަނީ ނިމިފައި ކަމަށާއި އަދި ދެވަނަ ސެގްމެންޓުގެ މަސައްކަތް ފެށުމަށް ވާން ޖެހޭ އެންމެ ފަހުގެ ތައްޔާރީތައް ވަމުން އަންނަ ކަމަށެވެ.

އަމީނީމަގު ސެގްމެންޓް 1ގެ ފެނާ ނަރުދަމާ އަދި ކޭބަލްޓްރޭ އެޅުމުގެ މަސައްކަތް ނިންމާލީ އޮކްޓޯބަރު މަހުގެ ފަހުކޮޅުގައެވެ.

އަމީނީ މަގުގެ މަސައްކަތުގެ އެންމެ ފަހުގެ މައުލޫމާތު ހާމަކޮށް ރޯޑް ޑިވެލޮޕްމަންޓު ކޯޕަރޭޝަނުން ބުނީ އަމީނީމަގު ސެގްމެންޓް 1ގެ ފެނާ ނަރުދަމާ އަދި ކޭބަލްޓްރޭ އެޅުމުގެ މަސައްކަތް ނިމިފައިވާ ކަމަށެވެ.

އަމީނީ މަގުގެ މަސައްކަތް އާރްޑީސީއާ ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށް 84 މިލިއަން ރުފިޔާއަށެެވެ. އެންމެ ފުރަތަމަ މަގު ހަދަން ފަށާފައިވަނީ ހެންވޭރުކޮޅުން، ކަލާފާން ސްކޫލާ ހަމައަށެވެ. މަގުގެ މަސައްކަތް 13 ސެގްމަންޓަކަށް ވަނީ ބަހާލާފައެވެ.

އާރްޑީސީގެ އަމާޒަކީ އަމީނީ މަގު ރަނގަޅު ފެންވަރަކަށް ތަރައްޤީކޮށް ދެމެހެއްޓެނިވި ގޮތެއްގައި ރައްޔިތުންނަށް ގިނަ ދުވަހު ބޭނުންކުރެވޭނެ ގޮތަކަށް އެ މަގު ތަރައްޤީކުރުމެވެ. އެއީ މާލޭގައި އެންމެ ފެންބޮޑުވާ އެއް މަގެވެ.

އާރްޑީސީން ކުރިޔައްގެންދާ، މި މަސައްކަތުގެ ދަށުން ހިނގާ ބިނގާވެ އުޅޭ ފަރާތްތަކަށާއި ދުއްވާ އުޅަނދުތަކަށްވެސް ފަސޭހަވާނެފަދަ ގޮތަކަށް އަދި ޒަމާނީ ފެންވަރުގެ މަގަކަށް ބޭނުންވާނެ ހުރިހާ ވަސީލަތްތަކަކާއި އެކު ވީހާވެސް އަވަހަށް އަމީނީ މަގަށް ދިމާވެފައިވާ މައްސަލައަށް ދާއިމީ ހައްލެއް ލިބިގެންދާނެއެވެ.

އަމީނީ މަގުގައި ތާރުއެޅުމަށް ހަމަޖެހިފައިވަނީ "މާލޭ ސްޓްރީޓް ސްކޭޕިންގ ޕްރޮޖެކްޓް"ގެ ސްކޯޕަށް ބޮޑެތި ބަދަލުތަކެއް ގެނައުމަށްފަހު ކަމަށް ވާއިރު، މި މަޝްރޫޢުގެ ދަށުން މާލޭގެ 105 މަގެއް ހިމެނޭހެން 18 ކިލޯމީޓަރުގެ މަގު ޒަމާނީ ފެންވަރަށް ތަރައްޤީކުރުމަށް ނިންމާފައިވެއެެވެ.

މާލެ ސްޓްރީޓް ސްކޭޕިން މަޝްރޫއު އަކީ، މާލެ ސިޓީ ކައުންސިލުން އާރުޑީސީއާ ދެމެދު ގާއިމުކޮށްފައިވާ އެއްބަސްވުމެއްގެ ދަށުން ހިންގަމުން އަންނަ މަޝްރޫއެކެވެ. މަގުތައް ޒަމާނީ ފެންވަރަކަށް ބަދަލު ކުރުމަށް 462 މިލިއަން ރުފިޔާ ހަރަދު ކުރުމަށް ހަމަޖެހިފައިވެއެވެ.