ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ދާދިފަހުން އައްޑޫ ސިޓީ އަށް ކުރެއްވި ދަތުރުފުޅުގައި އެމަނިކުފާނަށް މަރުހަބާ ދަންނަވަން ދިޔަ ފެނަކައިގެ މުވައްޒަފަކު ސަސްޕެންޑްކުރި މައްސަލައެއް ފެންމަތިވެއްޖެއެވެ.
މިކަން ހާމަކޮށް ހުޅުމާލޭ ކައުންސިލްގެ މެންބަރު އިބްރާހިމް ޝުޖާއު ކުރެއްވި ޓުވީޓެއްގައި ވަނީ، އެ މުވައްޒަފު ސަސްޕެންޑު ކުރިކަން އަންގައި ފެނަކައިން ފޮނުވި ސިޓީ ގެ ފޮޓޯއެއް ހިއްސާ ކުރައްވާފައެވެ.
އެ ސިޓީގައި ވާގޮތުން ފެނަކަ އިން ސަސްޕެންޑް ކޮށްފައި ވަނީ އެކުންފުނީގެ މުވައްޒަފެއް ކަމަށްވާ މުހައްމަދު ދީދީގެ ނަމަކަށް ކިޔާ މީހެކެވެ. އަދި އޭނާއަށް ފެނަކައިން ފޮނުވި ސިޓީގައި ބުނެފައި ވަނީ މުހައްމަދު ދީދީގެ މައްސަލައެއް ތަހްގީގު ކުރަމުން ގެންދާތީ މިއަދުން ފެށިގެން 30 ދުވަހަށް އޭނާ ސަސްޕެންޑް ކޮށްފައިވާ ކަމަށެވެ.
ފެނަކައިން ފޮނުވި ސިޓީގައި އޭނާ ސަސްޕެންޑް ކުރި ސަބަބު އެ ހާމަކޮށްފައި ނުވި ނަމަވެސް ޝުޖާއު ކުރެއްވި ޓުވީޓުގައި އޭނާ ވަނީ އެ މުވައްޒަފު ސަސްޕެންޑު ކުރީ ރައީސް ޔާމީނަށް މަރުހަބާ ދަންނަވަން ދިޔުމުން ކަމަށް ތުހުމަތު ކުރައްވާފައެވެ.
ކޮންމެ ދިވެހިރައްޔިތަކަށް އެމީހަކު ތާއިދުކުރާ ފިކުރަކަށް، ޕާޓީ އަކަށް ނުވަތަ ލީޑަރަކަށް ތާއީދު ކުރުމުގެ މިނިވަންކަން ”ތައްމިނަށް“ލިބިގެންދާނެ-ޖަޒީރާ މެނިފެސްޓޯއެއް މި ސަރުކަާރުން އެކުލަވާލައިފައިވާއިރު އެ މެނިފެސްޓޯ ތަންފީޒް ނުކުރެވޭ ކަމަށް ވިދާޅުވެ ޝުޖާއު ވަނީ އަދުގެ ސަރުކާރަށް ފާޑުވިދާޅުވެފައެވެ.
"ފެނަކާގެ ވެރިން ދަންނަންވީ މިކަން މިނިމެނީކަން. ކޮށްފައިވާ ވައްކަންތައް ބަލަން އަހަރެމެން ތިޔަ ތަނަށް ވަންނާނެކަން. ބަދަލު ހިފުމުގެ ރޫހަކުނޫން. ޤައުމު ސަލާމަތް ކުރުމުގެ ރޫހުގަ. އަނިޔާވެެރި ނުވޭ. މެނިފެސްޓޯ ތަންފީޒުކުރޭ. ގޯސް ނުހަދާ. ހައްޤުގެއްލޭ ހުރިހާ އެންމެންގެ ހައްގުތައް ހޯދައިދޭނަން" ޝުޖާއު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
