އެމްޑީޕީ އިސްވެއޮވެ ހިންގާ ސަރުކާރެއްގައި އެ ޕާޓީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ގުޅިގެން މަޖިލީސް މެމްބަރުންވެސް މަސައްކަތް ކުރުން މުހިންމުކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.
އިކްރާމް އެފަދައިން ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ހުށައަޅުއްވާފައިވާ ދައުލަތުގެ އޮފީސްތަކާއި އިދާރާތައް ހިންގުމަށާއި، ގުދަންކުރުމުގެ ބޭނުމަށް އަމިއްލަ ފަރާތްތަކުގެ އިމާރާތްތައް ދައުލަތުން ކުއްޔަށް ހިފުމަށް ގިނަ އަދަދެއްގެ ފައިސާ ހޭދަކުރަން ޖެހިފައިވާތީ އެކަމަށް އަވަސް ހައްލެއް ހޯދައިދިނުމަށް ހުށައަޅާފައިވާ ގަރާރަށް ބަހުސް ކުރައްވަމުންނެވެ.
އިކްރާމް ވިދާޅުވީ އަމިއްލަ ފަރާތްތަކުން އިމާރާތްތައް ކުއްޔަށް ހިފައިގެން ދައުލަތުގެ އޮފީސްތައް ހިންގާ މައްސަލަ ހައްލުކުރުމަށް ސަރުކާރުން އެއްވެސް މަސައްކަތެއް ނުކުރާކަމަށް އެ ގާރަރުގައި އޮތުމަކީ އޮޅުވާލުމެއްކަމަށެވެ. އަދި އޮފީސް އިމާރާތެއް ހެދުމުގެ މަސައްކަތް މި ސަރުކާރުން ކުރަމުންދާކަމަށާއި، ޕްލޭނިން މިނިސްޓްރީއިންވެސް އެކަން ހާމަކުރައްވާފައިވާކަމަށެވެ.
މަޖިލީހުގައި ގިނައިން ތިއްބެވީ އެމްޑީޕީގެ މެމްބަރުން ކަމަށް ވާއިރު، އެމްޑީޕީ މެޖޯރިޓީ ސަރުކާރެއް އޮއްވާ، ސަރުކާރާއި ދެކޮޅުގެ މެމްބަރުން ވާހަކަދެއްކެވުމަކީ އެދެވޭ ކަމެއް ނޫންކަމަށް އޭނާ ވިދާޅުވިއެވެ. އަދި މިހާލަތުގައި އެމްޑީޕީގެ އެންމެ އިސް ލީޑަރާއި ގުޅިގެން މަސައްކަތް ކުރުން މުހިންމުކަމަށް އިކްރާމް ވިދާޅުވިއެވެ.
"އިއްޒަތްތެރި މެމްބަރު މުއިއްޒަކީ އެމްޑީޕީގެ މެމްބަރެއް، އަދި މިހާރު ސަރުކާރުގެ މެޖޯރިޓީވެސް އޮތީ އެމްޑީޕީގެ ކަމަށް ވާއިރުގައި ޕްލޭނިން މިނިސްޓަރަކީވެސް އެމްޑީޕީގެ މެމްބަރަކަށް ވާއިރު، އަޅުގަނޑުމެން މިއަދުގެ ސަރުކާރާއެކު މަސައްކަތް ކުރާއިރު، މިޔަށްވުރެ ގާތްކޮށް މަސައްކަތްކުރެވެން ޖެހޭނެކަމަށް އަޅުގަނޑު ފާހަގަކުރަން. އެމްޑީޕީ މެޖޯރިޓީ ވެރިކަމެއްގައި އެމްޑީޕީގެ އެންމެ އިސް ލީޑަރާއި އެކުގައި އަޅުގަނޑުމެން މަސައްކަތް ކުރުމަކީ މުހިންމުކަމެއް"
މަޖިލީހުގެ ދިއްގަރު ދާއިރާގެ މެމްބަރު އިކްރާމް
އެމްޑީޕީގެ އެންމެ އިސް ލީޑަރާއި ގުޅިގެން މަސައްކަތްކުރުމަށް އެމްޑީޕީގެ މެމްބަރުންގެ އަރިހުން އެދިލައްވާފައި ވާއިރު، އެމްޑީޕީގެ ދެ ލީޑަރުންނަށް ތާއީދުކުރައްވާ މެމްބަރުންގެ މެދުގައި ވަނީ ނުތަނަވަސްކަމެއް އުފެދިފައެވެ. އަދި ދެ ފެކްޝަންގެ މެމްބަރުންގެ މެދުގައި ހޫނު ބަހުގެ ހަމަލާތަކެއްވެސް ވަނީ ބަދަލުކުރަން ފަށާފައެވެ.
Advertisement
This content is created and paid for by advertisers and does not involve Voice Journalists
