އިއްޔެ ހުޅުމާލޭ ފޭސް ދެއަކުން ކަރަންޓާއި ފެން ކެނޑުނީ ފަހި ދިރިއުޅުން ކޯޕަރޭޝަންގެ ފަރާތުން އިމާރާތް ކުރަމުންދާ މަޝްރޫއެއްގެ ކޮންޓްރެކްޓަރު ހުއްދަ ނުނަގައި މަގު ކޮންނަނިކޮށް ކޭބަލެއް ބުރިވެގެން ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.

ހުޅުމާލޭ ދެވަނަ ފިޔަވަހީގައި ހުންނަ 25 ބުރީގެ 16 ޓަވަރުން އިއްޔެ ކަރަންޓު ކެނޑުނީ ހުޅުމާލެ 2 ގައި އިމާރާތެއް ކުރަމުން ގެންދިޔަ ބަޔަކު ކޮންނަނިކޮށް، އެ ޓަވަރުތަކަށް ކަރަންޓު ދޭ ކޭބަލެއް ހަލާކުވެގެންނެވެ. ކޭބަލްގެ މައްސަލަ ރަނގަޅުކޮށް، އަލުން ކަރަންޓު ދޭން ގިނަ ވަގުތު ނަގާނެތީ ސްޓެލްކޯއަށް ޖެހުނީ ވަގުތީ ކޭބަލެއް ބޭނުންކޮށްގެން ހިޔާ ފްލެޓްތަކަށް ކަރަންޓް ދޭށެވެ. ވަގުތީ ކޭބަލެއް އަޅައިގެން ވެސް ހިޔާފްލެޓް ތަކަށް ކަރަންޓް ދެވުނީ އެތަންތާ ކަރަންޓް ނެތްތާ ހަތަރު ގަޑި އިރު ފަހުންނެވެ.

އެކަމާ ގުޅިގެން މިއަދު އެޗްޑީސީން ނެރުނު ބަޔާނެއްގައި ބުނީ ހިޔާ ޓަވަރުތަކަށް ކަރަންޓު ދޭ މައި ކޭބަލެއް ހަލާކުވީ އެ ސަރަހައްދުގައި ފަހި ދިރިއުޅުން ކޯޕަރޭޝަންގެ ފަރާތުން އިމާރާތް ކުރަމުންދާ މަޝްރޫޢުއެއްގެ ކޮންޓްރެކްޓަރ މަގު ކޮނުމުގެ މަސައްކަތުގެ ތެރެއިން ކަމަށެވެ. 

އަދި އެ ކޯޕަރޭޝަނުން ބެލި ބެލުމުން އެގުނު ގޮތުގައި އެ މަސައްކަތް ކޮށްފައިވަނީ ހުއްދަ ނުނަގައި ގަވާއިދާއި ޚިލާފަށް ކަމަށް ފާހަގަކުރެވިފައިވާ ކަމަށާއި، އަދި އެކަމާއި ގުޅިގެން ގަވާއިދުގެ ތެރެއިން އަޅަންޖެހޭ ފިޔަވަޅު އަޅާނެ ކަމަށްވެސް އެޗްޑީސީން ބުނެ އެވެ.

އެޗްޑީސީން އިތުރަށް ބުނީ ހުޅުމާލޭގެ އެއްވެސް ސަރަހައްދެއްގައި މަގު ކޮނުމުގެ މަސައްކަތްތައް ކުރުމުގައި އެކޯޕަރޭޝަންގެ ހުއްދަ ނަގަންޖެހޭނެ ކަމަށެވެ. އަދި ހުއްދަ ދިނުމުގައި ކަރަންޓާއި ފެނުގެ ޚިދުމަތްދޭ ފަރާތްތަކަށް އެ ކޯޕަރޭޝަންގެ ފަރާތުން އަންގަާނެ ކަމަށާ އަދި އިންސްޕެކްޓަރުންގެ ޓީމުން ސައިޓަށްގޮސް މަސައްކަތް ކުރާގޮތް ގަވާއިދުން ބަލާނެ ކަމަށްވެސް ބުނެފައިވެއެވެ.