ސަރުކާރުން ހުށައެޅި ޓެކްސް ބޮޑުކުރާ ބިލާއި ދެކޮޅަށް 26 ވޯޓު ލިބުމަކީ ރައްޔިތުންގެ މަޖިލީހުގެ ސުޕަރ މެޖޯރިޓީ ސަރުކާރަށް ގެއްލިފައިވާކަން ދައްކުވައިދިން ކަމެއްކަމަށް އިދިކޮޅުން ބުނެފިއެވެ.
އިދިކޮޅު އިއްތިހާދުގައި ހިމެނޭ ޕީއެންސީގެ ޕީޖީ ލީޑަރު އާދަމް ޝަރީފް އިދިކޮޅު ކޯލިޝަންގެ ޕީޖީ ގެ ފަރާތުން ދެއްވި ނޫސްވެރިންގެ ބައްދަލުވުމުގައި ވިދާޅުވީ މަޖިލީހުގައި މިއަދު ލީ ވޯޓުން ސަރުކާރަށް މަޖިލީހުގެ ސުޕަރމެޖޯރިޓީ ގެއްލިފައިވާކަން ކަށަވަރުވާކަމަށެވެ.
ސަރުކާރުން ބޭނުންވާ ގޮތަށް ޓެކްސްއާއި ބެހޭ ބިލު ފާސްކުރުމަށް މެމްބަރުންނަށް ބޮޑެތި ނުފޫޒުތަކެއް ފޯރުވާފައިވާކަމަށް އާދަމް ޝަރީފު ވިދާޅުވިއެވެ. އަދި މިއަދު އެ ބިލަށް ވޯޓަށް އެހީވެސް އިތުރު ގޮތެއް ނެތުމުންކަން އޭނާ ފާހަގަކުރެއްވިއެވެ.
އެހެން ނަމަވެސް އާދަމް ޝަރީފު ވިދާޅުވީ ސަރުކާރުގެ ނުފޫޒުތަކަށް ބެލުމެއްނެތި މަސައްކަތް ކުރާނެ މެމްބަރުންތަކެއްވެސް މަޖިލީހުގައި ތިބިކަން މިއަދު ނެގި ވޯޓުން ހާމަވެގެން ގޮސްފައިވާކަމަށެވެ.
"މި ބިލާއި ދެކޮޅަށް 26 މެމްބަރުން ވޯޓުދެއްވި. މިއީ އަޅުގަނޑުމެން ގަބޫލުކުރާ ގޮތުގައި ސަރުކާރުގެ ނުފޫޒު އިންތިހާއަށް އޮތްކަމުގައި ވިޔަސް މިއީ މިކަމުގައި ރައްޔިތުން ތިބި ގޮތާއި ރައްޔިތުންގެ އަޑު އެއްސެވި 26 މެމްބަރުން. މިއަދުގެ ފްލޯއިން ފެނިގެން ދިޔައީ ސަރުކާރަށް ރައްޔިތުންގެ މަޖިލީހުގެ ސުޕަރ މެޖޯރިޓީ ގެއްލިފައިވާކަން"
ޕީއެންސީގެ ޕީޖީ ލީޑަރު އާދަމް ޝަރީފް
އާދަމް ޝަރީފު އިތުރަށް ވިދާޅުވީ ޓެކްސް ބިލާއި ގުޅިގެން ނެގި ވޯޓުގައި ބިލާއި ދެކޮޅަށް 26 ވޯޓު ލިބިގެން ދިއުމަކީ އިދިކޮޅަށް ލިބުނު ކުރިއެރުމެއްކަމަށެވެ.
ކުރިއަށް އޮތް ތަނުގައި ސަރުކާރު ޖަވާބުދާރީ ކުރުވުމުގެ މަސައްކަތުގައި އިދިކޮޅާއި ގުޅޭ މެމްބަރުން އިތުރުވެގެންދާނެކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
