ސަރުކާރުން ހުށައެޅި ޓެކްސް ބޮޑުކުރާ ބިލާއި ދެކޮޅަށް 26 ވޯޓު ލިބުމަކީ ރައްޔިތުންގެ މަޖިލީހުގެ ސުޕަރ މެޖޯރިޓީ ސަރުކާރަށް ގެއްލިފައިވާކަން ދައްކުވައިދިން ކަމެއްކަމަށް އިދިކޮޅުން ބުނެފިއެވެ. 

އިދިކޮޅު އިއްތިހާދުގައި ހިމެނޭ ޕީއެންސީގެ ޕީޖީ ލީޑަރު އާދަމް ޝަރީފް އިދިކޮޅު ކޯލިޝަންގެ ޕީޖީ ގެ ފަރާތުން ދެއްވި ނޫސްވެރިންގެ ބައްދަލުވުމުގައި ވިދާޅުވީ މަޖިލީހުގައި މިއަދު ލީ ވޯޓުން ސަރުކާރަށް މަޖިލީހުގެ ސުޕަރމެޖޯރިޓީ ގެއްލިފައިވާކަން ކަށަވަރުވާކަމަށެވެ. 

ސަރުކާރުން ބޭނުންވާ ގޮތަށް ޓެކްސްއާއި ބެހޭ ބިލު ފާސްކުރުމަށް މެމްބަރުންނަށް ބޮޑެތި ނުފޫޒުތަކެއް ފޯރުވާފައިވާކަމަށް އާދަމް ޝަރީފު ވިދާޅުވިއެވެ. އަދި މިއަދު އެ ބިލަށް ވޯޓަށް އެހީވެސް އިތުރު ގޮތެއް ނެތުމުންކަން އޭނާ ފާހަގަކުރެއްވިއެވެ. 

Advertisement

އެހެން ނަމަވެސް އާދަމް ޝަރީފު ވިދާޅުވީ ސަރުކާރުގެ ނުފޫޒުތަކަށް ބެލުމެއްނެތި މަސައްކަތް ކުރާނެ މެމްބަރުންތަކެއްވެސް މަޖިލީހުގައި ތިބިކަން މިއަދު ނެގި ވޯޓުން ހާމަވެގެން ގޮސްފައިވާކަމަށެވެ. 

އާދަމް ޝަރީފު އިތުރަށް ވިދާޅުވީ ޓެކްސް ބިލާއި ގުޅިގެން ނެގި ވޯޓުގައި ބިލާއި ދެކޮޅަށް 26 ވޯޓު ލިބިގެން ދިއުމަކީ އިދިކޮޅަށް ލިބުނު ކުރިއެރުމެއްކަމަށެވެ. 

ކުރިއަށް އޮތް ތަނުގައި ސަރުކާރު ޖަވާބުދާރީ ކުރުވުމުގެ މަސައްކަތުގައި އިދިކޮޅާއި ގުޅޭ މެމްބަރުން އިތުރުވެގެންދާނެކަމަށް އޭނާ ވަނީ ވިދާޅުވެފައެވެ.