މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މިހާރު ހުންނެވީ "ކޮމްޕްރޮމައިސް" ވެފައިކަމަށް އިދިކޮޅުން ބުނެފިއެވެ.
އިދިކޮޅު އިއްތިހާދުގެ ޕާލަމެންޓްރީ ގުރޫޕިގެ ފަރާތުން މިއަދު ބޭއްވި ޕްރެސް ކޮންފަރެންސްއެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ޕީއެންސީގެ ޕީޖީ ލީޑަރު އަދި މަދި މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވީ ރައްޔިތުންގެ މަޖިލީހުގައި އިދިކޮޅަށް މަސައްކަތްކުރުމުގެ ފުރުސަތު ތަނަވަސްކޮށްދެއްވުމަށް މަޖިލީހުގެ ރައީސް ނަޝީދު މަސައްކަތްޕުޅު ކުރައްވާކަމަށެވެ.
އެހެން ނަމަވެސް އެމްޑީޕީގެ ބައެއް މެމްބަރުންގެ އަމަލުތައް ހުންނަ ގޮތުން އެކަމަށް ވަރަށް ބޮޑަށް ހުރަސްއެޅިގެންދާކަމަށް އޭނާ ވިދާޅުވިއެވެ.
ވާދަވެރިންނަށް މަސައްކަތް ކުރެވޭނެ މާހައުލެއް މަޖިލީހުގައި އުފައްދާވާދެއްވުމަށް ނަޝީދު މަސައްކަތްޕުޅު ކުރެއްވި ނަމަވެސް މިހާރު އެމަނިކުފާނުވެސް ހުންނަވަނީ ކޮމްޕްރޮމައިސް ވެފައިކަމަށް އާދަމް ޝަރީފު ވިދާޅުވިއެވެ. އަދި ނަޝީދު ކޮމްޕްރޮމައިސްވެފައިވަނީ އޭނާގެ އިތުބާރު ނެތްކަމުގެ ވޯޓު ނެގުމަށް ޕާޓީގެ ތެރެއިން މަސައްކަތް ކުރަމުންދާތީކަމަށް އާދަމް ޝަރީފު ވަނީ ވިދާޅުވެފައެވެ.
"މިހާލަތުގައި އެނގުވަޑައިގަންނަވާނެ ފަދައިން މަޖިލީހުގެ ރައީސް މިހާރު އެ ހުންނެވީ ހަގީގަތުގައި ކޮމްޕްރޮމައިސް ވެފައި. އެއީ ވަރަށް ގިނަ މެމްބަރުން ނޯ ކޮންފިޑެންސް ވޯޓުގައި ސޮއިކުރައްވާފައި އޮތުމާއި އެކީގައި އަޅުގަނޑުމެންނަށް ގަބޫލުކުރެވޭ ގޮތުން މަޖިލީސްގެ ރައީސް މިވަގުތު މަޖިލިސްގެ ރައީސް ބޭނުންފުޅުވާ ގޮތަށް އެކަން ކޮށްފިކަމަށް ވާނަމަ މަޖިލީސްގެ ރައީސް ވަކިކުރުމުގެ ބިރު އެބޮތް އުފައްދާފައި"
ޕީއެންސީގެ ޕީޖީ ލީޑަރު އާދަމް ޝަރީފް
އާދަމް ޝަރީފް ވިދާޅުވީ ރައްޔިތުންގެ މަޖިލީސް ގަވައިދާއި އެއްގޮތަށް ގެންދިއުމަށް ރައީސް ނަޝީދަށް ބިރުވެރިކަން އޮތްކަމަށެވެ. އަދި އެ ބިރުވެރިކަން އޮތީ އެމަނިކުފާނު ލީޑް ކުރައްވާ ސިޔާސީ ޕާޓީ އެމްޑީޕީގެ ތެރެއިންކަންވެސް އޭނާ ފާހަގަކުރެއްވިއެވެ.
އެއާއެކު އާދަމް ޝަރީފު ވިދާޅުވީ ރައްޔިތުންގެ މަޖިލީހުގެ ރިޔާސަތު ބެލެހެއްޓުމުގެ ޒިންމާ އޭގެ އެންމެ ފުރިހަމަ ގޮތުގައި އަދާކުރެއްވުމުގެ ފުރުސަތު މިހާރު ރައީސް ނަޝީދަށް އޮތްކަމަށް ގަބޫލު ނުކުރައްވާކަމަށެވެ.
އެހެން ނަމަވެސް މިހާލަތުގައި އެމަނިކުފާނު އިސްތިއުފާ ދެއްވައިފިނަމަ، ނުވަތަ ވަކިވެވަޑައިގެންފިނަމަ އެމްޑީޕީގެ ފަރާތުން ދެން އެމަގާމަށް އިސްކުރާ މީހާ ޔަގީނުންވެސް މަޖިލީހުގައި އިދިކޮޅަށް މަސައްކަތް ކުރުމުގެ ފުރުސަތެއް ނުދެއްވާނެކަމަށް އާދަމް ޝަރީފު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
