ރައްޔިތުން އަތުން ނަގާ ޓެކްސް ބޮޑުކުރުމަަށް ހުށެއެޅި ބިލު މަޖިލީހުން ފާސްކުރުމަކީ ސަރުކާރުން ކުރަމުންދާ މަސައްކަތަށް ލިބިގެން ދިޔަ ބަާރެއްކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

މިނިސްޓަރު އަމީރު މިފަދައިން ވިދާޅުވެފައިވަނީ އަންނަ އަހަރުގެ ޖެނުއަރީއިން ފެށިގެން ޖީއެސްޓީއާއި ޓީޖީއެސްޓީ ބޮޑުކުރުމަށް ސަރުކާރުން ހުށައެޅި ބިލު ފާސްކުރުމާއި ގުޅިގެން ކުރެއްވި ޓްވީޓެއްގައެވެ. 

އަމީރު ކުރެއްވި އެ ޓްވީޓުގައި ވިދާޅުވީ ސަރުކާރުން ހުށަހަޅާފައި އޮތް ގޮތަށް، ޓެކްސް ރޭޓްސް މަޖްލިހުން ފާސްވެގެން ދިޔުމަކީ މާލީ ދެމެހެއްޓެނިވިކަން ކަށަވަރުކޮށް، ރައްޔިތުންގެ އުންމީދުތައް ޙާސިލްކޮށްދިނުމަށް ސަރުކާރުން ކުރިޔަށް ގެންދާ މަސައްކަތްތައް ބާރުމިނުގައި ކުރިޔަށް ގެންދިޔުމަށް ލިބުނު އިތުރު ބާރެއްކަމަށެވެ. 

Advertisement

ސަރުކާރުން ވަނީ ފާއިތުވި އަހަރުތަކުގައި ދިމާވި، ބޮޑެތި އިޤްތިސާދީ ދަތިތަކުން އަރައިގަނެ ދުނިޔެއަށް މިސާލު ދައްކާފައި ކަމަށާއި، ކުރިމަތިވި ގޮންޖެހުންތަކާއެކުވެސް، ހަމަހަމަކަމާއެކު މުޅި ރާއްޖެއަށް ބޭނުންވެފައިވާ އެތައް އުމްރާނީ، އިޖްތިމާއީ ތަރައްޤީގެ މަޝްރޫއުތަކެއް ކުރިއަށް ގެންގޮސްފައިކަމަށް އަމީރު ވިދާޅުވިއެވެ. 

އަންނަ އަހަރަށް ލަފާކޮށް ސަރުކާރުން ހުށައެޅި ބަޖެޓުގައިވެސް ގިނަ މަޝްރޫއުތަކެއް ހިމަނާފައިވާއިރު، ސަރުކާރުން ބުނާ ގޮތުގައި ޓެކްސް ބޮޑުކުރުމަށް ނިންމީ ރަށްރަށުގައި މަޝްރޫއުތައް ކުރިއަށް ގެންދިއުމަށެވެ. 

ރައްޔިތުންގެ މަޖިލީހުން ޓެކްސް ބޮޑުކުރުމަށް ހުށައެޅި ބިލު ފާސްކޮށްފައިވަނީ އެ ބިލާއި ގުޅޭގޮތުން ހޫނު ބަހުސްތައް ކުރެވުމަށްފަހުގައެވެ. 

ޓެކްސް ބޮޑުކުރުމާއި ގުޅޭގޮތުން ސަރުކާރު ހިންގާ މއި ޕާޓީ އެމްޑީޕީގެ މެމްބަރުންގެ ވިސްނުންވެސް ދެކަފިވެފައިވާއިރު، ސަރުކާރުން އެދުނު ގޮތަށް ޓެކްސް ބިލު ފާސްކުރުމަށް އެމްޑީޕީގެ ޕީޖީގެ ލީޑަރޝިޕުން ވަނީ ވިޕްލައިނެއްވެސް ނެރެފައެވެ. 

އަންނަ ޖެނުއަރީމަހުން ފެށިގެން ރައްޔިތުން އަތުން ނަގާ ޓެކްސް ނުވަތަ ޖީއެސްޓީ ބޮޑުކުރުމަށް ސަރުކާރުން މަޖިލީހަށް ހުށަހެޅި ބިލު ފާސްވެފައިވާއިރު، މިއާއެކު ޖީއެސްޓީ 6 އިންސައިން 8 އިންސައްތައަށް އަދި ޓީޖީއެސްޓީ 12 އިން 16 ޕަސެންޓަށް އުފުލިގެންދާނެއެވެ. އެއާއެކު ތަނެތީގެ އަގުތަކަށްވެސް ބޮޑެތި ބަދަލުތަކެއް އަންނާނެއެވެ.