އުކުޅަހު ސުކޫލު ޕްރީސުކޫލް ދަރިވަރުން ލައްވައި މިއުޒިކާއި އެކު ނަށުވަން ދެކޮޅު ހެދި ދެ ޓީޗަރުން ސަސްޕެންޑްކޮށްފިއެވެ. 

އުކުޅަހު ސުކޫލު ޕްރީސުކޫލު ދަރިވަރުންނަށް ކިޔަވައި ދެމުންދާ އެ ދެ ޓީޗަރުން ސަސްޕެންޑް ކޮށްފައި މިވަނީ، އެ ކުލާސް ތަކުގެ ދަރިވަރުންނަށް އަމާޒުކޮށްގެން ބޭއްވުމަށް ހަމަޖެހިފައިވާ ކޮންސާޓެއްގައި މިއުޒިކާއި އެކު ދަރިވަރުން ނެށުވުމަށް އިންކާރު ކުރުމާއި ގުޅިގެން އެ ޓީޗަރުންނަށް އެކި ފަހަރު މަތިން އިންޒާރުވެސް ދިނުމަށްފަހުގައެވެ. 

"ޕްރީ ސުކޫލުގެ ކުދިންގެ މި ކޮންސާޓުގައި މިއުޒިކު ނުލައިވެސް ކުދިންގެ ވަރަށް ގިނަ ހުނަރުތައް ދައްކާލެވޭ ހަރަކާތްތައް ޓީޗަރުން އެބަ ހުރި ރާވާފައި. ބެލެނިވެރިންގެ މެޖޯރިޓީ ބޭނުމެއް ނުވޭ މިއުޒިކް ލައިގެން ކުދިން ނަށުވާކަށް. އެގޮތަށް އެކަން ކުރުވާނަމަ ކުދިން ބައިވެރިވެސް ނުކުރާނެ ކަމަށް ބެލެނިވެރިން ބުނަނީ. ވީއިރު އެތައް ކުދިންގެ ހައްގު ތަކެއް ގެއްލިގެން މިދަނީ. އެކަމަކު ޕްރިންސިޕަލް މި ބޭނުންވަނީ މިއުޒިކާއި އެކު އެކަން ކުރުވަން." މި މައްސަލަ އާއި ގުޅިގެން މީގެ ކުރިން އުކުޅަހު ސުކޫލު ޓީޗަރަކު ވޮއިސް އަށް މައުލޫމާތު ދެއްވަމުން ވިދާޅުވިއެވެ. 

Advertisement

މިފަދައިން ޓީޗަރުން އެއްބަސްވެފައި ވަނިކޮށް އެކި ފަހަރު މަތިން ޓީޗަރުންނާއި ބައްދަލުކޮށް ކޮންސާޓުގައި މިއުޒިކު ހިމެނުމަށް އެ ސުކޫލު ޕްރިންސިޕަލް ޝަހުލާ ޢިމާދު ދިޔައީ އަމުރު ކުރަމުންނެވެ. އަދި މިއުޒިކާއި ނުލައި ދަރިވަރުން ލައްވައި ނަށުވަން ތައްޔާރު ކަން ޓީޗަރުން ބުނަމުން ދިޔައިރުވެސް ޕްރިންސިޕަލް ވަނީ މިއުޒިކާއި އެކު އެ ކޮންސާޓުގެ ނެށުން ކުރިއަށް ގެންދިޔުން ނޫން އިތުރު "ޗޮއިސް" އެއް ޓީޗަރުން ނަށް ނެތް ކަމަށާއި، އެއީ ކަރިކިއުލަމް ގައިވެސް ބުނެފައިވާ ގޮތް ކަމަށާ، އެގޮތަށް ޢަމަލު ނުކުރާނަމަ ފިޔަވަޅު އަޅާނެ ކަމުގެ އިންޒާރު ތަކުރާރުކޮށް ދެމުންނެވެ. 

އިންޒާރުތަކާއި އެކުވެސް، ކަރިކިއުލަމްގައި އެފަދައިން މިއުޒިކާއި އެކު ކުދިން ލައްވައި ނެށުވުން މަޖުބޫރު ނޫން، ކަމަށާ، އެއީ އޮޕްޝަން އެއް ކަމަށް ޓީޗަރުން ބުނަމުން ދިޔައިރު، ޕްރިންސިޕަލް ބުނަމުން ދިޔައީ، ޓީޗަރުންނަށް މިއުޒިކު ހިމެނުން ނޫން އިތުރު އޮޕްޝަން އެއް ނެތް ކަމަށެވެ. އަދި އޭނާ ކަންކުރަމުންދާނީ "އެންމެ އިސް ފަރާތުން" އަންގާ ގޮތަށް ކަމަށްވެސް ޕްރިންސިޕަލް ދިޔައީ ތަކުރާރުކޮށް ބުނަމުންނެވެ.

އަދި ޕްރިންސިޕަލް ކަންކަން ނިންމަވަމުން ދަނީ އެންމެ އިސް ފަރާތާއި، ވާހަކަ ދައްކަވައިގެންކަމަށާ، އޭނާ އާއި ޓީޗަރުންނަކީ އެޑިކޭޝަން މިނިސްޓްރީން އަންގާ ގޮތަށް ކަންކަން ކުރަން ފޮނުވާފައިވާ ބައެއް ކަމަށްވެސް ޓީޗަރުން ކައިރީ އޭނާ ބުނެފައިވެއެވެ. އަދި ކަރިކިއުލަމް ގައި މިއުޒިކާއި ނުލައި ކުރިއަށް ދިޔުމުގެ އޮޕްޝަން އޮތް ނަމަވެސް އުކުޅަހު ސުކޫލު ޓީޗަރުންނަށް އެ އޮޕްޝަން ނެތް ކަމަށާ އެއީ މިނިސްޓްރީން ޕްރިންސިޕަލަށް އަންގާފައިވާ ގޮތް ކަމަށްވެސް އޭނާ ބުނެފައިވެއެވެ. 

އަދި ޕްރިންސިޕަލް އެފަދައިން އަމުރު ކުރުމުންވެސް އެކަން ނުކުރާނެ ކަމަށް ޕްރިންސިޕަލް އަށް އެންގި ދެ ޓީޗަރުން 7 ދުވަހަށް ސަސްޕެންޑް ކުރިކަން އަންގައި މިއަދު ވަނީ އެ ދެ ޓީޗަރުންނަށް ލިޔުން ފޮނުވާފައެވެ.