ވ އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް މިއަދުގެ ކްރިމިނަލް ކޯޓުގައި ވަނީ ކުރިއަށް ގެންގޮސްފައެވެ. 

މިއަދުގެ އަޑުއެހުމުގައި އޮތީ ހެކިންނާއި ގުޅޭގޮތުން ވާހަކަދެއްކުމެވެ. އަދި ދައުލަތުގެ ފަރާތުން ހުށައެޅި އިތުރު ހެކިތަކާއި ގުޅޭގޮތުން ގޮތެއް ނިންމުމެވެ. 

މިއަދުގެ އަޑުއެހުން ފައްޓަވަމުން މައްސަލަ ބައްލަވާ އިސް ފަނޑިޔާރު ޝަކީލު ވިދާޅުވީ އެ މައްސަލައިގައި ދައުވާލިބޭ ޔޫސުފް ނައީމް އާލާސްކަންފުޅާއި އުޅުއްވާތީ ކޯޓުގެ ހެނދުނުގެ ދަންފަޅިއަށް ވަޑައިގަތުމަށް އުޒުރުވެރިވެފައިވާ ވާހަކައެވެ. އެހެން ނަމަވެސް ހެއްކާއި ގުޅޭގޮތުން ވާހަކަ ކުރިއަށް ގެންދެވުމަށް ގާޒީ އެދިލެއްވިއެވެ. 

އެހެން ނަމަވެސް ދައުލަތުން ވަނީ ޔޫސުފް ނައީމުގެ ގައިރު ހާޒިރުގައި ހެއްކާއި ގުޅޭގޮތުން ވާހަކަދެއްކެވުމަށް އިއުތިރާޒުކޮށްފައެވެ. 

ދައުލަތުގެ ފަރާތުން ޕަބްލިކް ޕްރޮސެކިއުޓާ މަރިޔަމް ޝަހުމާ ވިދާޅުވީ، އެ މައްސަލައަކީ އެއް ބާވަތެއްގެ މައްސަލައަކަށް ވެފައި، ހެކިންނާއި ގުޅޭގޮތުން ދައްކަން ހުރީ އެއްކަހަލަ ވާހަކަތަކެއްކަމަށް ވުމުން، ޔޫސުފް ނައީމުގެ ޣައިރު ހާޒިރުގައި ވާހަކަދައްކަވަން ބޭނުން ނުވާކަމަށެވެ. އަދި ދައުލަތުން ވާހަކަދައްކަވަން ބޭނުންވަނީ ދެ ހެކިންގެ ހާޒިރުގައިކަމަށް ވިދާޅުވިއެވެ. 

ރައީސް ޔާމީންގެ ފަރާތްޕުޅުންވެސް ވަނީ ދައުލަތުގެ އިއުތިރާޒަށް ތާއީދުކުރައްވާފައެވެ. އަދި ހެކިންގެ ހާޒިރުގައި ހެކިންނާއި ގުޅޭގޮތުން ވާހަކަދެއްކެވުމަށް އެދިވަޑައިގެންފައެވެ. 

ދެ ފަރާތުގެ ވާހަކަތައް އަޑުއެހުމަށްފަހު ގާޒީ ވިދާޅުވީ، މި މައްސަލައަކީ ތަފާތު ތިން މައްސަލައެއްކަމަށެވެ. 

މިއަދު ހެކިންނާއި ގުޅޭގޮތުން ވާހަކަދެއްކުމުގެ މަރުހަލާ ކުރިއަށް ގެންދަވާނެކަމަށާއި، އެގޮތުން މިއަދުގެ 13:00 އަށް ޔޫސުމް ނައީމު ކޯޓަށް ހާޒިރުކުރައްވާނެކަމަށް ގާޒީ ވިދާޅުވިއެވެ. އަދި އެ ދަންފަޅީގައި ހެކިންނާއި ގުޅޭގޮތުން ވާހަކަދައްކަވާނެކަމަށް ގާޒީ ވަނީ ވިދާޅުވެފައެވެ. 

އެއާއެކު ގާޒީ ވަނީ މިއަދު ކުރިއަށް ގެންދިޔަ އަޑުއެހުމުގެ ހެނދުނުގެ ދަންފަޅު ކުރުކޮށްލައްވާފައެވެ. ދެން އަޑުއެހުން ފެއްޓޭނީ މިއަދުގެ 13:00 ގައެވެ.