އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއަކީ އެމްޑީޕީއަށް ނިސްބަތްވާ ވެރިއެއް ނަމަވެސް، އެމަނިކުފާނަށް އެންމެންގެވެސް ލޯބި ލިބިފައި ވުމުން އެނގިގެން ދިޔައީ މައްސަލައަކީ އެމްޑީޕީ ނޫން ކަމަށާއި މައްސަލައަކީ ކުރިން ވެރިކަން ކުރެއްވި އެ ޕާޓީގެ ރައީސް ރައީސް މުހައްމަދު ނަޝީދުކަމަށް ރައްޔިތުން މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒައިނާ މިއަދު ކުރެއްވި ޓްވީޓެއްގައި ވިދާޅުވީ އެމްޑީޕީން ސަޅި ހެޔޮވެރިކަމެއް ކުރާތަން ރައީސުލްޖުމުހުރިއްޔާ އިބްރާހިމް މުހައްމަދު ޞާލިހުގެ ވެރިކަމުގައި ރައްޔިތުންނަށް ފެނިފައިވާ ކަމަށާއި އެމްޑީޕީ މެމްބަރުން މިހާރު މަގުމައްޗަށް ނިކުންނާކަށް ނުޖެހޭ ކަމަށެވެ.
"ފުލުހުންނާއި ސިފައިންގެ ލޯބިވެސް ރައީސުލްޖުމްހުރިއްޔާ އަށް ވަނީ ލިބިފައި. މީގެން އެނގެނީ މައްސަލައަކީ އެމްޑީޕީ ނޫންކަން. އެމްޑީޕީން ކުރިން ވެރިކަން ކުރެއްވި ރައީސް ނަޝީދުކަން." ރޮޒައިނާ ވިދާޅުވިއެވެ.
މިއާއެކު ރައީސް ނަޝީދަށް ވަރަށް ބޮޑަށް ފާޑުވިދާޅުވެ ރޮޒައިނާ ވިދާޅުވީ، ރައީސް ޞާލިހް ގާނޫނާ ހިލާފު ކަންތައްތަކެއް ނުކުރައްވާ ކަމަށާއި އަދި ހުދުމުހުތާރުކަން ދައްކަވައި، ތިމަންނާގެ ކަނާތުން ކުރާކަންތައް ވާތަށް ނޭނގޭނޭ ނުވަތަ، އެންމެން 24 ގަޑިއިރު ހަމައިގައި ހުންނަން ބޭނުންނުވާ ކަމަށް ވިދާޅުވެ ބޭކާރު ވާހަކަވެސް އެމަނިކުފާނު ނުދައްކަވާ ކަމަށެވެ.
ރޮޒައިނާ އިތުރަށް ވިދާޅުވީ އެމްޑީޕީ މެމްބަރުން މިއަދު ރައީސް ދައްކަވާ ވާހަކަ މާނަކޮށްދޭން އުޅެން ނުޖެހޭ ކަމަށާ، ކުރީގެ އެމްޑީޕީ ސަރުކާރާ ހިލާފަށް މިހާރުގެ ވެރިކަން ވަރަށް ބޮލަށް ފަސޭހަ ކަމަށް އެމްޑީޕީ މެމްބަރުންވެސް ބުނަމުންދާ ކަމަށެވެ.
"އޭރު އަބަދު އުޅެން ޖެހެނީ ރައީސް ނަޝީދު ދައްކަވާ ކޮންމެވެސް ވާހަކައެއް މާނަކޮށްދީ އެއީ އެހެނެއް ނޫނޭ މީހުންނަށް ކިޔައިދޭށޭ. މިއަދުގެ ރައީސުލްޖުމްހޫރިއްޔާ ގެ ވާހަކަފުޅުތައް ހާދަ ފަސޭހައޭ." ރޮޒައިނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
