ދިވެހިރާއްޖޭގެ ފުރަތަމަ ބާ އިމްތިޙާނު ދިވެހިރާއްޖޭގެ ބާ ކައުންސިލުން އިއްޔެ ބާއްވައިފިއެވެ.

ދެ ސެޝަނަކަށް ބަހާލައިގެން މާލެ އަދި އައްޑޫ ސިޓީގައި ކުރިއަށް ގެންދެވުނު ބާ އިމްތިޙާނުގައި 176 ފަރާތަކުން ބައިވެރިވެ، ރަޖިސްޓަރީ ކުރި ކެންޑިޑޭޓުންގެ 98.3 އިން ސައްތަ ވަނީ އިމްތިޙާނަށް ހާޒިރުވެފައިވާ ކަމަށް ބާ ކައުންސިލުން ބުނެއެވެ. 

މީލާދީ ކޮންމެ އަހަރަކު އެއް ފަހަރު ބޭއްވުމަށް ކަނޑައަޅާފައިވާ ބާ އިމްތިޙާނުގެ މަޤްސަދަކީ ދިވެހިރާއްޖޭގެ ޤާނޫނީ ދާއިރާއަށް ނުކުންނަން ބޭނުންވާ ފަރާތްތަކުގައި ހުންނަންޖެހޭ އަސާސީ މިންގަނޑު ކަނޑައަޅައި، ފެންވަރު ވަޒަންކުރުމެވެ. މި އިމްތިޙާނު މެދުވެރިކޮށް މި ދާއިރާއަށް އަލަށް ނުކުންނަ ފަރާތްތަކަށް ޤާނޫނީ މަފްހޫމުތައް އެނގޭ މިންވަރާއި، ޤާނޫނީ މައްސަލަ ދެނެގަތުމުގެ ޤާބިލިޔަތުކަން ހުރި މިންވަރާއި، ޤާނޫނީ ޚިދުމަތް ދިނުމަށް ތައްޔާރުވެފައިވާ މިންވަރު ދެނެގަނެވޭނެއެވެ. އެހެންކަމުން، ބާ އިމްތިޙާނަކީ ރާއްޖޭގައި ޤާނޫނީ ވަކީލެއްގެ ގޮތުގައި މަސައްކަތްކުރުމަށް ހުއްދަ ދޫކުރުމަށް ބޭނުންކުރާ މިނިމަމް ބެންޗްމާކެވެ. 

Advertisement

ޔޫއެސްއެއިޑް، އޭ.ބީ.އޭ، ކެޕްލާން، އަދި އެން.ސީ.ބީ.އީގެ އެހީތެރިކަމާއެކު ބޭއްވުނު މި ބާ އިމްތިޙާނަކީ މަލްޓިޕްލް-ޗޮއިސް ފޯމެޓަށް، 120 ސުވާލު ހިމެނޭ އިމްތިޙާނެކެވެ. އިނގިރޭސި އަދި ދިވެހިބަހުން ފަރުމާކުރެވިފައިވާ މި އިމްތިޙާނުގެ ސިލަބަސް އެކުލަވާލާފައިވަނީ ބާ އިމްތިޙާނުގެ ކޮމިޓީ އޮފް އެކްސްޕަރޓުންނެވެ. 2022 ވަނަ އަހަރުގެ ބާ އިމްތިޙާނުގައި ހިމެނިފައިވާ މާއްދާތަކަކީ ކޮންސްޓިޓިއުޝަނަލް އެންޑް އެޑްމިނިސްޓްރޭޓިވް ލޯ، ޓޯރޓް ލޯ، ލޭންޑް ލޯ އެންޑް ޕްރެކްޓިސް، ކޮންޓްރެކްޓް ލޯ އެންޑް ޕްރެކްޓިސް، ކްރިމިނަލް ލޯ އެންޑް ޕްރޮސީޖަރ، އަދި މޯލްޑިވްސް ލީގަލް ސިސްޓަމްއެވެ.  

ބާ އިމްތިޙާނުގައި ބައިވެރިވުމަށް ބޭނުންވާ ފަރާތްތައް އިމްތިޙާނަށް ތައްޔާރު ކުރުމަށްޓަކައި ބާ ކައުންސިލުން އެކި މަސައްކަތްތައް ކުރިއަށް ގެންގޮސްފައިވެއެވެ. އެގޮތުން، ވޮލަންޓިއަރ އުޞޫލުން ބާ ކައުންސިލަށް ޚިދުމަތްކޮށްދެއްވި ޤާނޫނީ ވަކީލުންގެ އެހީތެރިކަމާއިއެކު، އިމްތިޙާނުގެ ސިލަބަހުގައި ހިމެނޭ ދާއިރާތަކާ ގުޅޭ ރީޑިންގ ލިސްޓު އެކުލަވާލުމާއި، ނަމޫނާ ޕްރެކްޓިސް ސުވާލު ޝާއިޢު ކުރުމުގެ އިތުރުން، މި އިމްތިޙާނަށް ކެންޑިޑޭޓުން ތައްޔާރު ކުރުމަށްޓަކައި 2022 ވަނަ އަހަރު ޖުމްލަ 18 ލެކްޗަރެއް ވަނީ ކުރިއަށް ގެންދެވިފައެވެ.  

ބާ އިމްތިޙާނުން ފާސްވުމަކީ ޤާނޫނީ ފަންނުގެ ޤާނޫނުގެ ދަށުން ރާއްޖޭގައި ޤާނޫނީ ވަކީލެއްގެ ގޮތުގައި މަސައްކަތްކުރުމަށް ހުއްދަ ދޫކުރުވޭ ދެ ޝަރުތުގެ ތެރެއިން އެއް ޝަރުތެވެ. ޤާނޫނީ ފަންނުގެ ދަށުން ލާޒިމުކުރާ ދެވަނަ ޝަރުތަކީ ލައިސަންސިންގ ތަމްރީނު ޕްރޮގްރާމެއް ފުރިހަމަ ކުރުމެވެ.