އިންޑިއާގެ ކަނޑުގެ ސަރަހައްދަށް އޮޅިގެން ވަދެވުނު ދިވެހި މަސްދޯނި ތަކަކަށް އެގައުމުގެ ސިފައިން ވަރަށް އިހާނެތި އަނިޔާކޮށްފައިވާ ކަމަށް މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) ވިދާޅުވެއްޖެ އެވެ.

ޕީޕީއެމްގެ ޖަގަހަ ޖަލްސާގައި ރޭ ވާހަކަދައްކަވަމުން ޓޮމް ވިދާޅުވީ، ދިވެހިރާއްޖޭގެ މަސްކަނޑުތައް ބެލެހެއްޓުމުގެ ޒިންމާ ދިވެހި ސިފައިންގެ ބޮލުގައި އެޅިފައިވީ ނަމަވެސް، ސިފައިން އެ ޒިންމާ އަދާ ނުކުރާތީ އެކަން ކުރަމުންދަނީ ދިވެހި މަސްވެރިން ކަމަށެވެ. އެގޮތުން ރާއްޖޭގައި ގިނަ ވާނީ  މަސްވެރިން ރިޕޯޓް ކޮންގެން ކޯސްޓުގާޑުން އައިސް ބޭރުގެ ދާ އަޅާބޯޓުތައް ހުއްޓުވާ މައްސަލަތައް ކަމަށެވެ. 

އެއާއެކު ޓޮމް ވަނީ މީގެ އަހަރެއްހާ ދުވަހެއް ކުރިން ރާއްޖޭގެ ނ. އަތޮޅުން 40 މޭލު ބޭރުން ދާއަޅައިގެން މަސްވެރިން ކުރަން އުޅުނު އިންޑިއާގެ ބޯޓެއް ދިވެހި ކޯސްޓްގާޑުގެ ބެލުމުގެ ދަށަށް ގެނައުމަށްފަހު، ހަތަރު ދުވަހު ފަހުން އަމިއްލަ ގައުމަށް ފޮނުވާލީ އެއްވެސް ފިޔަވަޅެއް ނާޅާ ކަން ފާހަގަކުރައްވާފައެވެ. 

Advertisement

"އެމީހުން [އިންޑިއާ ދޯނި] ހދ. ކުޅުދުއްފުއްޓަށް ގެންގޮސްފަ އެމީހުންނާ ކާއެއްޗެއްސާ، ތެލާ ދިވެހި ސަރުކާރުން އަޅާފަ އެމީހުން ފޮނުވާލީ." ޓޮމް ވިދާޅުވިއެވެ. 

ރާއްޖެއިން އިންޑިއާ ބޯޓާއި މެދު އެފަދައިން ކަން ކުރި ނަމަވެސް އިނޑިއާ ސިފައިން ދިވެހި މަސްވެރިންނާއި މެދު އަމަލުކުރަނީ އެއަށްވުރެ މާ އިހާނަތިކޮށް މާ އަނިޔާވެރިކޮށް ކަމަށް ޓޮމް ވިދާޅުވިއެވެ. 

އެގޮތުން މީގެ ހަފްތާއެއްހާ ދުވަސް ކުރިން ރާއްޖޭގެ ތިން މަސްދޯންޏަކަށް އިންޑިއާ ކަނޑުގެ ސަރަހައްދަށް އޮޅިގެން ވަދެވުމުން އެ ދޯނިތަކަށް އިންޑިއާ ސިފައިން އަރައި މަސްވެރިންނަށް އަނިޔާ ކުރި ކަމަށް ޓޮމް ވިދާޅުވިއެވެ. 

"މިއަދު ދިވެހި މަސްވެރިންގެ ތިން ދޯނި، އޭގެ ތެރޭގައި އިހަވަންދޫ ދޯންޏަކާއި، މަހިބަދޫ ދޯންޏަކާ އަދި އިތުރު އެއް ދޯނި، ތިން ދޯންޏަށް އިންޑިއާ ސިފައިން އަރައި، އެމީހުންނަށް އަނިޔާކޮށް ބޫޓުން ޖަހައި މޫދަށް ވައްޓާލާފަ ވަނީ،" ޓޮމް ވިދާޅުވި އެވެ.

އެ ހާދިސާއާއި ގުޅޭ ގޮތުން ޓޮމް އަށް މައުލޫމާތު ލިބުމާއި އެކު އޭނާ ނިސްބަތްވާ މަހިބަދޫ ދޯނީގެ މައުލޫމާތު ހޯދައި އެ ދޯނީގެ މަސްވެރިއަކަށް ގުޅައި އެކަމާއި ބެހޭ އިތުރު މައުލޫމާތު ހޯއްދެވިކަމަށް ޓޮމް ވިދާޅުވިއެވެ. 

އެގޮތުން އެ ދޯނީގެ ކެޔޮޅު ކިޔައިދިން ގޮތުގައި އިންޑިއާ ސިފައިން ރާއްޖޭގެ އެ ތިން މަސްދޯންޏަށް އެރީ މީގެ ގާތްގަނޑަކަށް ހަފްތާއެއްހާ ދުވަސްކުރިން ހއ. އިން ބޭރުން އިންޑިއާ ރާއްޖޭގެ ބޯޑަރު ހިމެނޭ ސަރަހައްދުން ގާތްގަނޑަކަށް އަށް މޭލު އިންޑިއާގެ ސަރަހައްދަށް  ވަދެފައިވާ ކަމަށް ބުނެ ކަމަށެވެ. 

"އެއް ދޯންޏަށް އެރީ ރޭގަނޑު، އެ މަސްވެރިން ނިދާފަ ތިއްބަ، އަރައި، ފޭރޭ މީހުންގޮތަށް އެމީހުންނަށް ބިރުދައްކައި، އެމީހުން ޑެކު މައްޗަށް ނެރި ހަތިޔާރުން ބިރުދައްކައި، އެ ދޯނީގަ ހުރި ބައެއް އެއްޗިހިވެސް ހިފައިގެން އެމީހުން [އިންޑިއާ ސިފައިން] ދިޔައީ،" ޓޮމް ވިދާޅުވި އެވެ.

އެރޭ ދެވަނަ ދޯންޏަށްވެސް އަރައި އެފަދަ ގޮތަކަށް އިންޑިއާ ސިފައިން އަމަލުކުރި ކަމަށާއި، މަހިބަދޫ ދޯންޏަށް އިންޑިއާ ސިފައިން އެރީ އޭގެ އަނެއް ދުވަހު ހެނދުނު ގާތްގަނޑަކަށް 10 ޖަހާއިރު ކަމަށް އޭނާ ވިދާޅުވި އެވެ.

"އަރައި، އެ މަސްވެރިންނަށް ހަތިޔާރުން ބިރުދައްކައި، ޑެކު މައްޗަށް ނެރި، ކުޑަކަކުލަށް ތިރިކޮށް، އެ ދޯނި ސާޗުކޮށް ހަދާފަ ދިޔައީ. އަދި ދަމުން އެ ދޯނީގައި ހުރި މަސްވެރިއެއްގެ ގައިގައި ބޫޓުން ޖަހައި މޫދަށް ވައްޓާލި، ކަނޑަށް ވައްޓާލި،" ޓޮމް ވިދާޅުވި އެވެ.