ލައިގެން ހުރި ބޮކްސާގެ ތެރޭގައި ފޮރުވައިގެން މާލެއިން އައްޑޫ އަށް މަސްތުވާތަކެތި ގެންދިޔަ މީހަކު އުމުރަށް ޖަލަށްލައި އެއްލައްކަ ރުފިޔާއިން ޖޫރިމަނާ ކުރަން ކްރިމިނަލް ކޯޓުން އިއްޔެ ހުކުމްކޮށްފި އެވެ. 

ކްރިމިނަލް ކޯޓުން މި ހުކުމް ކޮށްފައިވަނީ ސ.ހިތަދޫ ފަރަހާނާ މަންޒިލް، ޝަމްޢޫން މުހައްމަދުގެ މައްޗަށެވެ. އެނާގެ މައްޗަށް ދައުލަތުން އުފުލާފައިވަނީ މަސްތުވާތަކެތީގެ ބާވަތެއް ކަމުގައިވާ ޑައިމޯފިން ޓްރެފިކްކުރުމުގެ ކުށުގެ ދައުވާ އެވެ. 

އެގޮތުން ދައުލަތުން ކޮށްފައިވާ ދައުވާގައި ބުނ،ީ 2020 ވަނަ އަހަރުގެ ޖެނުއަރީ 14 ގައި އޭނާ ހައްޔަރުކުރީ ވައިގެ މަގުން ގަމަށް މަސްތުވާތެކެތި އެތެރެކުރަން އުޅޭކަމުގެ މައުލޫމާތު ލިބިގެން ފުލުހުން ހިންގި އޮޕަރޭޝަނެއްގައި ގަން އިންޓަނޭޝަނަލް އެއާޕޯޓުން ކަމަށެވެ. 

އަދި އޭނާ ހައްޔަރުކޮށް ބަލައި ފާސްކުރަން މަސައްކަތް ކުރުމުން، ލައިގެން ހުރި ބޮކްސާ ތެރޭގައި މަސްތުވާތަކެތި ހުރިކަމަށް ބުނެ އަމިއްލައަށް އެތަކެތި ނަގައި ފުލުހުންނާ ހަވާލުކުރި ކަމަށާ، އޭނާ ހަވާލުކުރި އިންސްލޭޝަން ޓޭޕު އަޅާފައިވާ ޖޫސްޕެޓީ ކޮތަޅުގައި 99 ގްރާމް ޑައިމޯފިން ހުރިކަމަށް ތަހުލީލު ރިޕޯޓުން ދައްކާ ކަމަށްވެސް ދައުވާގައި ބުނެފައިވެއެވެ. 

މި މައްސަލައިގެ އަޑުއެހުމުގައި އޭނާ އެ ދައުވާއަށް އިންކާރުކުރި ނަމަވެސް, މަސްތުވާތަކެތި ފުލުހުންނާ އަމިއްލަ އަށް ހަވާލު ކުރުމުގެ އިތުރުން ބަންދު މުއްދަތު މަޖިލީހުގައި ވެސް އޭނާ ކުށަށް އެއްބަސްވެފައިވާ ކަމަށް ކްރިމިނަލް ކޯޓުން ކުރި ހުކުމުގައި ބުނެފައިވެއެވެ. 

އެ މީހާ ހުއްޓުވައި، ކޯޓު އަމުރެއްނެތި ފާސްކުރި ކަމަށް ދިފާއުން ބުނެފައިވާއިރު، ހުކުމުގައިވާ ގޮތުން އެކަމުގައި ގޯހެއް ނެތެވެ. ސަބަބަކީ މަސްތުވާތަކެތި ގެންދާކަމުގެ މައުލޫމާތު ފުލުހުންނަށް ލިބުނު ވަގުތާއި އެ މީހާ ހައްޔަރުކުރި ވަގުތާ ދެމެދު ގިނަ ވަގުތުތަކެއް ނުވާތީ ކޯޓު އަމުރެއް ނެތި ހުއްޓުވުމުގައި އެކަށީގެންވާ ސަބަބެއް އޮތުމެވެ. އަދި ފުލުހުން އެ މީހާ ހުއްޓުވީ ލިބުނު މައުލޫމާތަކާ ގުޅިގެން ކަމަށް ވާތީ އެކަމުގައި ފުލުހުންގެ ނުބައި ނިޔަތެއް ފެންނަން ނެތް ކަމަށާ، އޭނާ ދައުވާއަށް އިންކާރު ކުރިޔަސް، ޝައްކެއް ނެތް މިންވަރަށް ދައުވާ ސާބިތުވާ ކަމަށް ޝަރީއަތުންވަނީ ނިންމާފައެވެ.

ވުމާއެކު އެ މައްސަލައިގައި ކްރިމިނަލް ކޯޓުން ހުކުމްކުރީ އޭނާ އެއްލައްކަ ރުފިޔާއިން ޖޫރިމަނާކޮށް، އުމުރަށް ޖަލަށް ލުމަށެވެ. އެކަމަކު އޭނާ ދެ އަހަރާއި 23 ދުވަހު ބަންދުގައި ހޭދަ ކޮށްފައިވާތީ ތަންފީޒު ކުރަން ޖެހޭނީ 22 އަހަރާއި 11 މަހުގެ ޖަލު ހުކުމެއް ކަމަށްވެސް ކްރިމިނަލް ކޯޓުން ބުނެފައިވެއެވެ.