ގދ. ރަތަފަންދޫގައި ޖަޕާނު ސަރުކާރުގެ ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓްސް (ޖީޖީޕީ)އިން ގާއިމްކުރި ދެ ކްލާސްރޫމް ސްކޫލާ ހަވާލުކޮށްފިއެވެ.
އިއްޔެ ރަތަފަންދޫ ސްކޫލުގައި ބޭއްވި ހާއްސަ ރަސްމިއްޔާތެއްގައި އެ ކްލާސް ރޫމުތައް ސުކޫލާއި ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ އެ ގައުމުގެ ސަފީރު ޓަކެއުޗި މިދޮރިއެވެ.
އެ ރަސްމިއްޔާތުގައި އެޑިއުކޭޝަން މިނިސްޓްރީގެ ސީނިއާ ޕޮލިސީ ޑިރެކްޓަރާއި މިނިސްޓްރީގެ އިތުރު ބޭފުޅުން ބައިވެރިވެވަޑައިގަނެފައިވެއެވެ.
ރަތަފަންދޫގައި ގާއިމުކުރި ދެ ކްލާސް ރޫމަކީ 2019 ވަނަ އަހަރުގެ ފެބްރުއަރީ މަހުގެ 19 ވަނަ ދުވަހު ޖަޕާން އެމްބަސީ އާއި ރަތަފަންދޫ ސްކޫލާ ދެމެދުވީ އެއްބަސްވުމުގެ ދަށުން ހެދި ކްލާސްރޫމްތަކެކެވެ.
81757 ޑޮލަރުގެ މި މަޝްރޫއުގެ ދަށުން ސައިންސް ލެބޯޓަރީއަކާއި އޯޑިއޯ ވިޝުއަލް ރޫމެއް ވެސް އިމާރާތްކޮށްފައިވެއެވެ.
މި މަޝްރޫއުގެ ސަބަބުން ދަރިވަރުންނަށް އެކަށީގެންވާ މާހައުލެއްގައި ސައިންސް ފަދަ މާއްދާތައް ކިޔެވުމުގެ މަގު ފަހިވާނެކަމަށް ދެކޭ ކަމަށް ޖަޕާނުން ބުނެފައިވެއެވެ.
ޖީޖީޕީއަކީ ޖަޕާން އެމްބަސީގެ ދަށުން ރާއްޖޭގެ ތަރައްގީއަށް އެހީވުމަށް 1996 ގައި އުފެއްދި ޕްރޮޖެކްޓެކެވެ.
Advertisement
This content is created and paid for by advertisers and does not involve Voice Journalists
