ހައިކޯޓުން އެއް މައްސަލައެއްގެ، އެއް އިސްތިއުނާފެއް ތަފާތު ދެ ފަހަރެއްގެ މަތިން ބަލައިގެން މައްސަލައެއް ފެންމަތިވެއްޖެއެވެ.

އާއިލީ މައްސަލައެއްގައި ފެމެލީ ކޯޓުން ކުރި ހުކުމެއްގެ އިސްތިއުނާފު މައްސަލަ ފެމިލީ ކޯޓުގެ ހުކުމަށް ތާއީދުކޮށް މިދިޔަ އަހަރުގެ މާޗް މަހު ހައިކޯޓުން ވަނީ ނިންމާފައެވެ. އެފަދައިން ނިންމާފައި ވަނިކޮށް އަނެއްކާވެސް އެ މައްސަލަ މިއަހަރުގެ ފެބްރުއަރީ މަހު ހައިކޯޓަށް އަލުން ހުށަހަޅައި އެ ކޯޓުން އެ މައްސަލަ ބަލައިވެސް ގަނެފައިވެއެވެ. އެ މައްސަލަ ހައިކޯޓުގައި އިސްތިއުނާފު ކޮށްފައިވަނީ ވެސް އިސްތިއުނާފު ކުރަން އޮތް މުއްދަތަށް ވުރެ ފަހުންނެވެ. އެކަމަކު، މައްސަލަ ބެއްލެވި ފަނޑިޔާރުންގެ ބެންޗުން ވަނީ އެ މައްސަލަ ބަލައިގަންނަން ނިންމާފައެވެ.

އެހެންވެ، ދެވަނަ ފަހަރަށް ހުށަހެޅި މައްސަލައާއި ގުޅިގެން ހައިކޯޓުން ކުރި ހުކުމުގައި ބުނެފައިވަނީ މައްސަލައަކީ މީގެ ކުރިން އެކޯޓުން ބަލާފައިވާ ގަޒިއްޔާ އެއްކަން މައްސަލަ ބަލައިގެން އިރު ރަޖިސްޓްރާގެ ސެކްޝަނުން ފަނިޑޔާރުންނަށް އަންގާފައިނުވާ ކަމަށެވެ. އަދި، އަންގާފައިވާނަމަ އެ މައްސަލަ އަލުން ބަލަން، ހުއްދަ ނުދެއްވާނެ ކަމަށެވެ.

"މިއީ ކުރިން ބަލައި ނިމިފައިވާ ޤަޟިއްޔާއެއްކަން ފަނޑިޔާރުންނަށް ރަޖިސްޓްރާރގެ ސެކްޝަނުން އެހިނދު ސާފުކޮށް ދިންނަމަ މައްސަލަ އިސް ތިއުނާފްކުރުމުގެ ހުއްދައެއް ފަނޑިޔާރުން ދެއްވަފާނެކަމުގައި ނުބެލެވެއެވެ. އަދި މި މައްސަލާގައި ރަޖިސްޓްރާރގެ ޒިންމާ އެކަށީގެންވާ ގޮތެއްގައި އަދާކުރެވުނު ނަމަ، މި މައްސަލައިގައި އިސްރާފުވެގެންދިޔަ ޚަސްމުންގެ ވަގުތާއި ވަޞީލަތުގެ އިތުރުން ކޯޓުގެ ވަގުތާއި ވަޞީލަތްވެސް އިސްރާފުނުވެ ސަލާމަތް ކުރެވުނީހެވެ" ހައިކޯޓުގައި ނިންމުމުގައި ވެއެވެ.